Read hausa KARIN MAGANA 4 Bible Online

KARIN MAGANA 4 - hausa bible

KARIN MAGANA 4

¹'Ya'yana ku kasa kunne ga koyarwar mahaifinku. Ku mai da hankali, za ku zama haziƙai.

²Abin da nake koya muku, abu mai kyau ne, saboda haka ku tuna da shi duka.

³Sa'ad da nake ɗan yaro tilo a wurin iyayena,

⁴mahaifina yakan koya mini, yakan ce, “Ka tuna da abin da nake faɗa maka, kada ka manta. Ka yi abin da na faɗa maka za ka rayu.

⁵Ka nemi hikima da basira! Kada ka manta ko ka ƙyale abin da na faɗa.

⁶Kada ka rabu da hikima, gama za ta kiyaye ka, ka ƙaunace ta, za ta kiyaye lafiyarka.

⁷Samun hikima shi ne mafificin abin da za ka yi. Kome za ka samu dai, ka sami basira.

⁸Ka ƙaunaci hikima, za ta girmama ka. Ka rungume ta, za ta kawo maka daraja.

⁹Za ta zamar maka rawanin daraja.”

¹⁰Ɗana, ka kasa kunne gare ni. Ka ɗauki abin da nake faɗa maka, muhimmin abu ne, za ka yi tsawon rai.

¹¹Gama na koya maka hikima da hanyar zama mai kyau.

¹²Idan ka yi tafiya da hikima ba abin da zai tsare maka hanya, sa'ad da kake gudu ba za ka yi tuntuɓe ba.

¹³Kullum ka tuna da abin da ka koya, iliminka shi ne ranka, ka lura da shi da kyau.

¹⁴Kada ka tafi inda mugaye suke tafiya, kada ka bi gurbin mugaye.

¹⁵Kada ka yi mugunta! Ka nisance ta! Ka ƙi ta, yi tafiyarka.

¹⁶Mugaye ba su iya yin barci, sai sun aikata ɓarna. Ba su barci sai sun cuci wani.

¹⁷Mugunta da ta'adi kamar ci da sha suke a gare su.

¹⁸Hanyar da adalai suke bi kamar fitowar rana ce, sai ta yi ta ƙara haske, har ta take tsaka.

¹⁹Hanyar mugaye kuwa duhu ne baƙi ƙirin, kamar duhun dare. Sukan fāɗi, amma ba su san abin da ya sa suka yi tuntuɓe ba.

²⁰Ɗana, ka kula da abin da nake faɗa. Ka kasa kunne ga kalmomina.

²¹Kada ka kuskura su rabu da kai, ka tuna da su, ka ƙaunace su.

²²Za su ba da rai da lafiya ga dukan wanda ya fahimce su.

²³Tunane-tunanenka mafarin rai ne kansa, ka kiyaye su abin mallakarka ne mafi daraja.

²⁴Kada ka faɗi kowane abu da yake ba na gaskiya ba, kada wani abu ya haɗa ka da ƙarya, ko maganganun ruɗawa.

²⁵Ka duba gaba sosai gabanka gaɗi, ba tsoro.

²⁶Ka tabbata ka san abin da kake yi, duk abin da kake yi kuma zai zama daidai.

²⁷Ka rabu da mugunta ka yi tafiyarka sosai, kada ka kauce ko da taki ɗaya daga hanyar da take daidai.