Read hausa KARIN MAGANA 5 Bible Online

KARIN MAGANA 5 - hausa bible

KARIN MAGANA 5

¹Ɗana, ka mai da hankali, ka kasa kunne ga hikimata da basirata.

²Sa'an nan ne za ka san yadda za ka yi kome daidai, kalmominka za su nuna kana da ilimi.

³Leɓunan matar wani, mai yiwuwa ne, su yi zaƙi kamar zuma, sumbace-sumbacenta kuma su fi man zaitun taushi.

⁴Amma bayan an gama duka, ba abin da za ta bar maka sai baƙin ciki, da azaba.

⁵Za ta gangara da kai zuwa lahira, hanyar da take bi hanyar mutuwa ce.

⁶Ba a kan hanyar rai take ba, tana ragaita nesa da hanyar, amma kai ba ka ankara ba.

⁷'Ya'yana, ku kasa kunne gare ni yanzu, kada ko kusa ku manta da abin da nake faɗa.

⁸Ku yi nesa da irin wannan mace! Kada ku yarda ku yi ko kusa da ƙofarta!

⁹Idan kuwa kun yi, girmamawar da ake yi muku za ta zama ta waɗansu. Za ku yi mutuwar ƙuruciya ta hannun mutane marasa imani.

¹⁰Hakika, baƙi za su kwashe dukan dukiyarku, abin da kuka sha wahalar samu kuma zai zama rabon wani dabam.

¹¹Za ku kwanta kuna nishi a kan gadon mutuwa, namanku da tsokokinku za su zagwanye.

¹²Sa'an nan za ku ce, “Me ya sa ban taɓa koyo ba? Me ya sa ban yarda wani ya kwaɓe ni ba?

¹³Ban kasa kunne ga malamaina ba. Ban mai da hankalina gare su ba.

¹⁴Farat ɗaya sai aka kunyatar da ni a bainar jama'a.”

¹⁵Ka yi aminci ga matarka, ka ƙaunace ta ita kaɗai.

¹⁶Idan kuma waɗansu mata sun haifa maka 'ya'ya, 'ya'yan nan ba za su yi maka wani amfani ba.

¹⁷'Ya'yanka za su yi girma su taimake ka, ba na baƙi ba.

¹⁸Saboda haka ka yi farin ciki tare da matarka, ka yi murna da budurwa da ka auro,

¹⁹kyakkyawa mai kyan gani kamar barewa. Bari kyanta ya ɗau hankalinka. Bari ƙaunarta ta kewaye ka.

²⁰Ɗana, don me za ka fi son matar wani? Don me za ka bar matar wani ta lallame ka da daɗin bakinta?

²¹Ubangiji yana ganin dukan abin da kake yi. Inda ka shiga duk yana kallonka.

²²Zunuban mutum tarko ne, komar zunubinsa ce take kama shi.

²³Yakan mutu saboda rashin kamewarsa, cikakkiyar wautarsa za ta kai shi kabarinsa.