Read hausa KARIN MAGANA 7 Bible Online

KARIN MAGANA 7 - hausa bible

KARIN MAGANA 7

¹Ɗana, ka tuna da abin da na faɗa, kada ka manta da abin da na ce maka ka yi.

²Ka yi abin da na faɗa maka, za ka rayu. Ka natsu, ka bi koyarwata, ka tsare ta kamar ƙwayar idonka.

³Kullayaumi ka riƙe koyarwata tare da kai, ka rubuta ta a zuciyarka.

⁴Ka mai da hikima 'yar'uwarka, basira kuwa ta zama ƙawarka ta jikinka.

⁵Za su nisanta ka da matan mutane, daga kuma mata masu maganganun alfasha.

⁶Wata rana ina leƙawa ta tagar ɗakina,

⁷sai na ga waɗansu samari masu yawa waɗanda ba su gogu da duniya ba, musamman sai na lura da wani dolo a cikinsu.

⁸Yana tafe a kan titi kusa da kusurwar da take a zaune, yana wucewa kusa da gidanta,

⁹da magariba cikin duhu.

¹⁰Sai ta tarye shi, ta ci ado kamar karuwa, tana shirya yadda za ta yaudare shi.

¹¹(Ba ta jin tsoro, ba ta kuma jin kunya, ko yaushe tana ta gantali a tituna.

¹²Takan tsaya tana jira a kowace kusurwa, wani lokaci a tituna, wani lokaci kuma a kasuwa.)

¹³Ta rungumi saurayin, ta sumbace shi, ta dubi tsabar idonsa ta ce,

¹⁴“Na miƙa hadayu yau, ina da nama na hadayu.

¹⁵Shi ya sa na fito ina nemanka, ina so in gan ka, ga shi kuwa, na gan ka!

¹⁶Na lulluɓe gadona da zannuwan lilin masu launi iri iri daga Masar.

¹⁷Na yayyafa musu turaren mur da na aloyes da na kirfa.

¹⁸Ka zo mu sha daɗin ƙauna, mu more dukan dare, mu yi farin ciki rungume da juna.

¹⁹Mijina ba ya gida, ya yi tafiya mai nisa.

²⁰Ya tafi da kuɗi masu yawa, ba zai komo ba sai bayan mako biyu.”

²¹Ta jarabce shi da kwarkwasarta, sai ya ba da kai ga daɗin bakinta.

²²Nan da nan ya bi ta kamar sā zuwa mayanka, kamar barewa tana tsalle zuwa cikin tarko,

²³inda kibiya za ta soke zuciyarta. Yana kama da tsuntsun da yake zuwa cikin tarko, bai kuwa sani ransa yana cikin hatsari ba.

²⁴Yanzu fa 'ya'yana, ku kasa kunne gare ni, ku mai da hankali ga abin da nake faɗa.

²⁵Kada ku yarda irin wannan mace ta rinjayi zuciyarku, kada ku yi ta yawon nemanta.

²⁶Ita ce sanadin hallakar mutane da yawa, ta sa mutane da yawa mutuwa, har ba su ƙidayuwa.

²⁷Tafiya gidanta kuna kan hanya zuwa mutuwa ke nan, gajeruwar hanya ce zuwa lahira.