Read hausa MAI HADISHI 1 Bible Online

MAI HADISHI 1 - hausa bible

MAI HADISHI 1

¹Maganar Mai Wa'azi ɗan Dawuda, Sarkin Urushalima.

²Banza a banza ne, in ji Mai Hadishi, Banza a banza ne, dukan kome banza ne.

³Wace riba ce mutum zai samu daga cikin aikinsa, Da yake yi a duniya?

⁴Zamani yakan wuce, wani zamani kuma ya zo, Amma abadan duniya tana nan yadda take.

⁵Rana takan fito, takan kuma faɗi, Sa'an nan ta gaggauta zuwa wurin fitowarta.

⁶Iska takan hura zuwa kudu, ta kuma hura zuwa arewa, Ta yi ta kewayawa, har ta koma inda ta fito.

⁷Kowane kogi yakan gangara zuwa teku, Amma har yanzu teku ba ta cika ba. Ruwan yakan koma mafarin kogin, Ya sāke gangarawa kuma.

⁸Kowane abu yana sa gajiya, Gajiyar kuwa ta fi gaban magana. Idanunmu ba sā ƙoshi da gani, Haka kuma kunnuwanmu ba sā ƙoshi da ji.

⁹Abin da ya faru a dā, shi zai sāke faruwa, Abin da aka yi a dā, shi za a sāke yi. A duniya duka ba wani abu da yake sabo.

¹⁰Da akwai wani abu da za a ce, “Duba, wannan sabon abu ne”? Abin yana nan tuntuni kafin zamaninmu.

¹¹Ba wanda yake iya tunawa da abin da ya faru a dā, Da abin da zai faru nan gaba. Ba wanda zai iya tunawa da abin da zai faru A tsakanin wannan lokaci da wancan.

¹²Ni Mai Hadishi sarki ne, na sarauci Isra'ilawa a Urushalima.

¹³Na ɗauri aniya in jarraba, in bincika dukan abubuwan da ake yi a duniyan nan. Allah ya ƙaddara mana abu mai wuya.

¹⁴Na ga dukan abin da ake yi a duniya, duk aikin banza ne da ɓata lokaci kawai.

¹⁵Ba za a iya miƙar da abin da ya tanƙware ba, ba kuma za a iya ƙidaya abin da ba shi ba.

¹⁶Na ce wa kaina, “Na zama babban mutum, na fi duk wanda ya taɓa mulkin Urushalima hikima. Hakika na san hikima da ilimi.”

¹⁷Na ɗaura aniya in san bambancin da yake tsakanin ilimi da wauta, da a tsakanin hikima da gāɓanci. Amma na gane harbin iska nake yi kawai.

¹⁸Gwargwadon hikimarka gwargwadon damuwarka, gwargwadon ƙarin iliminka gwargwadon jin haushinka.