Read hausa WAƘAR WAƘOƘI 1 Bible Online

WAƘAR WAƘOƘI 1 - hausa bible

WAƘAR WAƘOƘI 1

¹Ga waƙar Sulemanu mafi daɗi.

²Leɓunanka sun lulluɓe ni da sumba, Ƙaunarka ta fi ruwan inabi zaƙi.

³Akwai ƙanshi kuma kewaye da kai, Jin amon sunanka yana tunasar da ni. Ba wata matar da za ta ƙi ƙaunarka.

⁴Ka ɗauke ni mana, mu gudu, Ka zama sarkina, ka kai ni ɗakinka. Da yake kana nan za mu yi farin ciki, Za mu sha ruwan inabi, mu yi murna da ƙaunarki. Ya dace a ƙaunace ka!

⁵Rana ta sa na zama akawala kyakkyawa. Matan Urushalima, bisa ga launi, ni ƙasa ƙasa ce, Kamar alfarwar hamada, Kamar labulen fādar Sulemanu.

⁶Kada ka raina ni saboda launina, Domin rana ta dafe ni. 'Yan'uwana suna fushi da ni, Sun sa ni aiki a gonar inabi. Ba ni da zarafin da zan lura da kaina.

⁷Faɗa mini, ƙaunataccena, Ina za ka kai garkenka kiwo? Ina za su huta sa'ad da rana ta take? Ina zan neme ka a cikin garkunan makiyaya?

⁸Mafi kyau cikin mata, ashe, ba ki san wurin ba? Tafi, ki bi garken, Ki samar wa awakinki wurin kiwo Kusa da alfarwan makiyaya.

⁹Ke ƙaunatacciyata, kina ɗauke hankalina Kamar yadda goɗiya take ɗauke hankalin ingarmun karusan Fir'auna.

¹⁰Kitsonki yana da kyau a kumatunki, Ya sauka a wuyanki kamar lu'ulu'ai.

¹¹Mu kuma za mu ƙera miki sarƙar zinariya, A yi miki ado da azurfa.

¹²A sa'ad da sarki yake kan kujerarsa, Yana jin daɗin ƙanshin turarena ƙwarai.

¹³Ƙaunataccena yana da ƙanshin mur Lokacin da yake kwance a ƙirjina.

¹⁴Ƙaunataccena kamar furen jeji yake Wanda yake huda a gonar inabi a En-gedi.

¹⁵Ke kyakkyawa ce ƙwarai, kyakkyawa ce ke, ya ƙaunatacciyata, Idonki suna haskaka da ƙauna.

¹⁶Kai kyakkyawa ne ƙwarai, ya ƙaunataccena, kana da bansha'awa. Koriyar ciyawa ita ce gadonmu.

¹⁷Itatuwan al'ul su ne jigajigan gidanmu, Itatuwan fir su ne rufin gidan.