Read hausa WAƘAR WAƘOƘI 2 Bible Online

WAƘAR WAƘOƘI 2 - hausa bible

WAƘAR WAƘOƘI 2

¹Ni fure ce na Sharon, Furen bi-rana na cikin kwari.

²Kamar yadda furen bi-rana yake a cikin ƙayayuwa, Haka ƙaunatacciyata take a cikin sauran mata.

³Kamar yadda itacen gawasa yake a cikin itatuwan jeji, Haka ƙaunataccena yake a cikin sauran maza. Da farin ciki na zauna a inuwarsa, Ina jin daɗin halinsa ƙwarai.

⁴Ya kai ni babban ɗakin da ake liyafa, Ƙauna ita ce tutarsa a gare ni.

⁵Ka ciyar da ni da wainar zabibi, Ka ba ni 'ya'yan gawasa in sha in wartsake! Gama na cika da sha'awarka.

⁶Bari ka ta da kaina da hannun hagunka, Ka rungume ni da hannun damanka.

⁷Ku 'yan matan Urushalima, Ku rantse da bareyi, da batsiyoyi, Ba za ku shiga tsakaninmu ba, Ku bar ta kurum.

⁸Na ji muryar ƙaunataccena! Ya zo a guje daga kan tuddai, Ya sheƙo daga tuddai zuwa wurina.

⁹Ƙaunataccena kamar barewa yake, Kamar sagarin kishimi. Ga shi can, yana tsaye a bayan katangarmu. Yana leƙe ta tagogi, Yana kallona ta cikin asabari.

¹⁰Ƙaunataccena ya yi magana da ni. Tashi mu tafi, ƙaunatacciyata, kyakkyawa.

¹¹Gama lokacin sanyi ya wuce, Ruwa kuma ya ɗauke.

¹²Furanni suna hudowa a itatuwa ko'ina. Lokacin raira Waƙoƙi ya yi, Lokacin da kurciyoyi suke kuka ya yi.

¹³'Ya'yan ɓaure sun nuna, Tohon inabi yana ƙanshi. Tashi mu tafi, ƙaunatacciyata, kyakkyawa!

¹⁴Ya kurciyata kina zaune a kogon dutse mai tsayi. Bari in ga fuskarki, in kuma ji muryarki, Gama muryarki tana da daɗin ji, Fuskarki kuma tana da kyan gani.

¹⁵Ku kama mana 'yan ƙananan diloli Waɗanda suke ɓata gonakin inabi, Gama gonakin inabinmu sun yi fure.

¹⁶Ƙaunataccena nawa ne, ni ma tasa ce, Yana kiwon garkensa a cikin furannin bi-rana,

¹⁷Har hurowar iskar safiya, Sa'ad da duhu ya kawu. Komo ya ƙaunataccena, yi kamar barewa, Kamar sagarin kishimi a kan duwatsu.