Read hausa MAKOƘI 5 Bible Online

MAKOƘI 5 - hausa bible

MAKOƘI 5

¹Ya Ubangiji, ka tuna da abin da ya same mu. Ka duba, ka ga yadda muka zama abin kunya!

²An ba baƙi gādonmu, Gidajenmu kuwa an ba bare.

³Mun zama marayu, marasa ubanni, Uwayenmu sun zama kamar matan da mazajensu sun mutu.

⁴Dole ne mu biya ruwan da za mu sha, Dole ne kuma mu sayi itace.

⁵Masu binmu a ƙyeyarmu suke, suna korarmu da zafi, Mun gaji, ba a yarda mu huta.

⁶Mun miƙa hannu ga Masar da Assuriya Don mu sami abinci.

⁷Ubanninmu sun yi zunubi, ga shi kuwa, ba su, Mu kuwa muna ɗaukar alhakin muguntarsu.

⁸Bayi suke mulkinmu, Ba kuwa wanda zai cece mu daga hannunsu.

⁹Sai mun yi kasai da ranmu kafin mu sami abinci, Domin akwai masu kisa a jeji.

¹⁰Fatar jikinmu ta yi zafi kamar murhu, Saboda tsananin yunwa.

¹¹An yi wa mata faɗe a cikin Sihiyona, Haka kuma aka yi wa budurwai a garuruwan Yahuza.

¹²An rataye shugabanni da hannuwansu, Ba a kuma girmama dattawa ba.

¹³An tilasta wa samari su yi niƙa, Yara kuma suna tagataga da kayan itace.

¹⁴Tsofaffi sun daina zama a dandalin ƙofar birni, Samari kuma sun daina bushe-bushe.

¹⁵Farin cikinmu ya ƙare, Raye-rayenmu sun zama makoki.

¹⁶Rawani ya fāɗi daga kanmu, Tamu tu ƙare, gama mun yi zunubi!

¹⁷Saboda wannan zuciyarmu ta ɓaci, Idanunmu kuma suka duhunta.

¹⁸Gama Dutsen Sihiyona ya zama kufai, Wurin yawon diloli.

¹⁹Amma ya Ubangiji, kai ne kake mulki har abada, Kursiyinka ya dawwama har dukan zamanai.

²⁰Don me ka manta da mu har abada? Don me ka yashe mu da daɗewa haka?

²¹Ya Ubangiji, ka komo da mu zuwa gare ka! Mu kuwa za mu koma. Ka sabunta kwanakinmu su zama kamar na dā.

²²Ko ka ƙi mu ne, sam sam? Ko kuwa ka husata da mu?