Read hausa LITTAFIN KIDAYA 1 Bible Online

LITTAFIN KIDAYA 1 - hausa bible

LITTAFIN KIDAYA 1

¹A rana ta fari ga wata na biyu a shekara ta biyu bayan da Isra'ilawa suka bar Masar, Ubangiji ya yi magana da Musa a cikin alfarwa ta sujada a jejin Sinai. Ya ce,

²“Da kai da Haruna ku ƙidaya Isra'ilawa, bisa ga kabilansu da iyalansu. Ku tsara sunayen dukan mazaje

³daga mai shekara ashirin zuwa sama waɗanda suka isa zuwa yaƙi.

⁴Ku roƙi shugaban kowace kabila ya taimake ku.”

⁵Waɗannan su ne mutanen da aka zaɓa. [Kabila] — [Shugaban Kabila] Ra'ubainu — Elizur ɗan Shedeyur Saminu — Shelumiyel ɗan Zurishaddai Yahuza — Nashon ɗan Amminadab Issaka — Netanel ɗan Zuwar Zabaluna — Eliyab ɗan Helon Ifraimu — Elishama ɗan Ammihud Manassa — Gamaliyel ɗan Fedazur Biliyaminu — Abidan ɗan Gideyoni Dan — Ahiyezer ɗan Ammishaddai Ashiru — Fagiyel ɗan Okran Gad — Eliyasaf ɗan Deyuwel Naftali — Ahira ɗan Enan

¹⁶Waɗannan shugabannin kabilai waɗanda suke manya cikin kabilansu, an zaɓe su daga cikin jama'a domin wannan aiki.

¹⁷Musa da Haruna suka ɗauki waɗannan mutane goma sha biyu,

¹⁸suka kuma kira dukan jama'a wuri ɗaya a ran ɗaya ga watan biyu. Dukan mutanen kuwa aka rubuta su bisa ga kabilansu da iyalansu, da kuma sunayen dukan mazaje masu shekara ashirin ko fi, duk aka ƙidaya su aka rubuta,

¹⁹kamar yadda Ubangiji ya umarta. Musa ya rubuta jama'a a jeji ta Sinai.

²⁰Mazaje masu shekara ashirin ko fi da suka isa yaƙi aka rubuta su suna suna, bisa ga kabilansu da iyalansu, aka fara da kabilar Ra'ubainu, babban ɗan Yakubu. Ga yadda jimillarsu take. [Kabila] — [Jimilla] Ra'ubainu — (46,500) Dubu arba'in da shida da ɗari biyar. Saminu — (59,300) Dubu hamsin da tara da ɗari uku. Gad — (45,650) Dubu arba'in da biyar da ɗari shida da hamsin. Yahuza — (74,600) Dubu saba'in da huɗu da ɗari shida. Issaka — (54,400) Dubu hamsin da huɗu da ɗari huɗu. Zabaluna — (57,400) Dubu hamsin da bakwai da ɗari huɗu. Ifraimu — (40,500) Dubu arba'in da ɗari biyar. Manassa — (32,200) Dubu talatin da biyu da ɗari biyu. Biliyaminu — (35,400) Dubu talatin da biyar da ɗari huɗu. Dan — (62,700) Dubu sittin da biyu da ɗari bakwai. Ashiru — (41,500) Dubu arba'in da ɗaya da ɗari biyar. Naftali — (53,400) Dubu hamsin da uku da ɗari huɗu. Jimilla duka — (603,550) dubu ɗari shida da uku da ɗari biyar da hamsin.

⁴⁷Amma ba a rubuta Lawiyawa tare da sauran kabilai ba,

⁴⁸gama Ubangiji ya ce wa Musa,

⁴⁹“Sa'ad da kake ƙidaya Isra'ilawa, kada ka haɗa da kabilar Lawi.

⁵⁰A maimakon haka, sai ka sa Lawiyawa su zama masu lura da alfarwa ta sujada da kayayyakinta. Za su ɗauki alfarwar da kayayyakinta, su yi aikinta, a zango kuma sai su sauka kewaye da ita.

⁵¹Sa'ad da kuka tashi tafiya, Lawiyawa za su kwankwance alfarwar, su ne kuma za su kafa ta, su ɗaɗɗaure, idan suka sauka a sabon wuri. Idan wani dabam ya zo kusa da alfarwar za a kashe shi.

⁵²Sauran Isra'ilawa za su sauka ƙungiya ƙungiya, kowane mutum a ƙungiyarsa a ƙarƙashin tutarsa.

⁵³Amma Lawiyawa za su sauka kewaye da alfarwa ta sujada don su yi tsaronta, domin kada wani dabam ya matsa kusa har ya sa in yi fushi in bugi jama'ar Isra'ila.”

⁵⁴Sai Isra'ilawa suka aikata kowane abu da Ubangiji ya umarci Musa.