Read hausa LITTAFIN KIDAYA 34 Bible Online

LITTAFIN KIDAYA 34 - hausa bible

LITTAFIN KIDAYA 34

¹Ubangiji ya ba Musa

²waɗannan umarnai domin jama'ar Isra'ila. Sa'ad da suka shiga ƙasar Kan'ana ga yadda iyakokin ƙasashensu za su zama.

³Iyakar ƙasarsu daga wajen kudu ta miƙa tun daga wajen jejin Zin, har zuwa iyakar Edom. Iyakarsu kuwa ta wajen kudu za ta fara daga ƙarshen Tekun Gishiri wajen gabas.

⁴Sa'an nan kuma za ta nausa ta nufin hawan Akrabbim, ta ƙetare zuwa Zin, ta dangana da kudancin Kadesh-barneya, sa'an nan ta miƙa zuwa Hazar'addar, ta zarce ta bi ta Azemon.

⁵Iyakar za ta nausa daga Azemon zuwa rafin Masar, ta fāɗa bahar.

⁶Bahar Rum ita ce iyakarsu ta wajen yamma.

⁷Iyakarsu a wajen arewa kuwa ita ce tun daga Bahar Rum zuwa Dutsen Hor.

⁸Daga Dutsen Hor iyakar za ta bi zuwa Hamat ta tsaya a Zedad.

⁹Iyakar za ta miƙa har zuwa Zifron, ta tsaya a Hazar-enan, wannan ita ce iyakarsu a wajen arewa.

¹⁰Iyakarsu a wajen gabas za ta tashi tun daga Haza-enan har zuwa Shefam.

¹¹Sa'an nan za ta gangara daga Shefam zuwa Ribla wajen gabashin Ayin. Za ta kuma gangara har ta kai Tekun Galili a wajen gabas.

¹²Iyakar kuma za ta gangara har zuwa Urdun, ta tsaya a Tekun Gishiri. Wannan ita ce ƙasarsu da iyakokinta kewaye da ita.

¹³Sai Musa ya ce wa Isra'ilawa, “Wannan ita ce ƙasar da za ku gāda ta hanyar jefa kuri'a. Ƙasar da Ubangiji ya umarta a ba kabilai tara da rabi.

¹⁴Gama kabilar Ra'ubainu da ta Gad da kuma rabin kabilar Manassa sun riga sun karɓi nasu gādo.

¹⁵Kabilan nan biyu da rabi sun karɓi nasu gādo a wancan hayin Urdun a gabashin Yariko.”

¹⁶Ubangiji kuma ya ce wa Musa,

¹⁷“Ga sunayen mutanen da za su taimake ka raba gādon ƙasar, Ele'azara firist, da Joshuwa ɗan Nun.

¹⁸Za ka kuma ɗauki shugaba ɗaya daga kowace kabila don su raba gādon ƙasar.

¹⁹Waɗannan su ne sunayen mutanen, Kalibu ɗan Yefunne daga kabilar Yahuza.

²⁰Shemuyel ɗan Ammihud daga kabilar Saminu.

²¹Elidad ɗan Kislon daga kabilar Biliyaminu.

²²Bukki ɗan Yogli daga kabilar Dan.

²³Na wajen Yusufu, Haniyel ɗan Efod daga kabilar Manassa,

²⁴da Kemuwel ɗan Shiftan daga kabilar Ifraimu.

²⁵Elizafan ɗan Farnak daga kabilar Zabaluna.

²⁶Faltiyel ɗan Azzan daga kabilar Issaka.

²⁷Ahihud ɗan Shelomi daga kabilar Ashiru.

²⁸Fedahel ɗan Ammihud daga kabilar Naftali.”

²⁹Waɗannan su ne mutanen da Ubangiji ya umarta su raba wa jama'ar Isra'ila gādon ƙasar Kan'ana.