Read hausa MAIMAITAWAR SHARI'A 14 Bible Online

MAIMAITAWAR SHARI'A 14 - hausa bible

MAIMAITAWAR SHARI'A 14

¹“Ku 'ya'ya ne ga Ubangiji Allahnku, kada ku yi wa jikinku zāne, kada kuma ku yi wa kanku sanƙo saboda wani wanda ya rasu.

²Gama ku keɓaɓɓun mutane ne na Ubangiji Allahnku. Ubangiji Allahnku kuwa ya zaɓo ku daga cikin dukan al'umman duniya ku zama mutanensa, wato abin gādonsa.”

³“Kada ku ci abin da yake haram.

⁴Ga dabbobin da za ku ci, da saniya, da tunkiya, da akuya,

⁵da mariri, da barewa, da mariya, da mazo, da makwarna, da gada, da ɓauna, da ragon dutse.

⁶Za ku iya cin kowace dabbar da take da rababben kofato, wadda kuma take tuƙa.

⁷Amma duk da haka cikin waɗanda suke tuƙa, da waɗanda suke da rababben kofato ba za ku ci raƙumi, da zomo, da rema ba, ko da yake suna tuƙa, amma ba su da rababben kofato. Haram ne su a gare ku.

⁸Ba kuma za ku ci alade ba, ko da yake yana da rababben kofato, amma ba ya tuƙa. Haram ne shi a gare ku. Kada ku ci naman irin waɗannan dabbobi, ko ku taɓa mushensu.

⁹“Daga dukan irin abin da yake zaune a ruwa za ku iya cin duk abin da yake da ƙege da ɓamɓaroki.

¹⁰Kada ku ci duk irin abin da ba shi da ƙege ko ɓamɓaroki, gama haram yake a gare ku.

¹¹“Kuna iya cin dukan halattattun tsuntsaye.

¹²Amma waɗannan tsuntsaye ne ba za ku ci ba, mikiya, da gaggafa, da ungulun kwakwa,

¹³da duki, da buga zabi, da kowace irin shirwa,

¹⁴da kowane irin hankaka,

¹⁵da jimina, da ƙururu, da bubuƙuwa, da kowane irin shaho,

¹⁶da mujiya, da babbar mujiya, da ɗuskwi,

¹⁷da kwasakwasa, da ungulu, da dimilmilo,

¹⁸da zalɓe, da kowane irin jinjimi, da katutu, da yaburbura.

¹⁹“Dukan 'yan ƙwari masu fikafikai masu rarrafe haram ne a gare ku, kada ku ci su.

²⁰Za ku iya cin duk abin da yake da fikafikai in dai shi halattacce ne.

²¹“Kada ku ci mushe. Amma mai yiwuwa ne ku ba baren da yake zaune a garuruwanku, ko kuma ku sayar wa baƙo. Gama ku jama'a ce keɓaɓɓiya ga Ubangiji Allahnku. “Kada ku dafa ɗan akuya a madarar uwarsa.”

²²“Ku fitar da zakar dukan amfanin da kuka shuka a gonarku kowace shekara.

²³Ku ci zakar sabon hatsinku, da ruwan inabinku, da manku, da 'yan fari na shanunku, da tumakinku, a gaban Ubangiji Allahnku, a wurin da zai zaɓa ya tabbatar da sunansa, don ku koyi tsoron Ubangiji Allahnku har abada.

²⁴Idan ya zamana wurin ya yi muku nisa, har ba za ku iya kai zakar a wurin ba, saboda wurin da Ubangiji Allahnku ya zaɓa domin ya tabbatar da sunansa ya yi muku nisa sa'ad da Ubangiji Allahnku ya sa muku albarka,

²⁵to, sai ku sayar da zakar, ku tafi da kuɗin wurin da Ubangiji Allahnku ya zaɓa,

²⁶ku kashe kuɗin a kan duk abin da kuke so, ko sa ne, ko tunkiya, ko ruwan inabi, ko abin sha mai gafi, ko dai duk irin abin da ranku yake so. Nan za ku yi liyafa a gaban Ubangiji Allahnku, ku yi murna tare da iyalan gidanku.

²⁷“Amma fa, kada ku manta da Balawen da yake garuruwanku gama ba shi da gādo kamarku.

²⁸A ƙarshen kowace shekara uku, sai ku kawo dukan zakar abin da kuka girbe a wannan shekara, ku ajiye a ƙofofinku.

²⁹Sa'an nan sai Balawe, da yake shi ba shi da gādo kamarku, da baƙo, da maraya, da gwauruwa ta gaske, waɗanda suke zaune a garuruwanku, su zo, su ci, su ƙoshi, domin Ubangiji Allahnku ya sa muku albarka cikin dukan aikin da hannunku zai yi.”