Read hausa 1 KORANTIYAWA 16 Bible Online

1 KORANTIYAWA 16 - hausa bible

1 KORANTIYAWA 16

¹To, a yanzu kuma ga zancen ba da gudunmawa ga tsarkaka, kamar yadda na umarci ikilisiyoyin Galatiya, haka ku ma za ku yi.

²A kowace ranar farko ta mako, kowannenku ya riƙa tanada wani abu, yana ajiyewa gwargwadon samunsa, kada sai na zo tukuna, a tara gudunmawa.

³Sa'ad da na iso, sai in aiki waɗanda kuka amince da su da wasiƙa, su kai taimakonku Urushalima.

⁴In ya kyautu ni ma in tafi, to, sai su raka ni.

⁵Zan zo gare ku bayan na zazzaga ƙasar Makidoniya, don kuwa ta Makidoniya zan bi.

⁶Watakila zan jima a wurinku, ko ma in ci damina, don ku yi mini rakiya duk in da za ni.

⁷Ba sona ne in gan ku a yanzu in wuce kawai ba, a'a, ina sa zuciya ma in yi kwanaki a wurinku, in Ubangiji ya yarda.

⁸Amma zan dakata a Afisa har ranar Fentikos.

⁹Don kuwa, an buɗe mini wata hanya mai fāɗi ta yin aiki mai amfani, akwai kuma magabta da yawa.

¹⁰In Timoti ya zo, ku tabbata ya sami sakewa a cikinku, domin aikin Ubangiji yake yi kamar yadda nake yi.

¹¹Kada fa kowa yă raina shi. Ku raka shi lafiya, ya komo a gare ni, domin ina duban hanyarsa tare da 'yan'uwa.

¹²Ga zancen ɗan'uwanmu Afolos kuwa, na roƙe shi ƙwarai, don yă zo wurinku, tare da saurar 'yan'uwa, amma ko kusa bai yi nufin zuwa a yanzu ba. Zai zo dai sa'ad da ya ga ya dace.

¹³Ku zauna a faɗake, ku dāge ga bangaskiyarku, ku yi ƙwazo, ku yi ƙarfi.

¹⁴Duk abin da za ku yi, ku yi shi da ƙauna.

¹⁵To, 'yan'uwa, kun sani fa jama'ar gidan Istifanas su ne nunan fari a ƙasar Akaya, sun kuwa ba da kansu ga yi wa tsarkaka hidima.

¹⁶Ina roƙonku ku yi wa irin waɗannan mutane biyayya, har ma ga duk waɗanda suke abokan aikinmu da wahalarmu.

¹⁷Na yi farin ciki da zuwan Istifanas, da Fartunatas, da Akaikas, domin sun ɗebe mini kewarku.

¹⁸Sun dai wartsakar da ni da kuma ku. Sai ku kula da irin waɗannan mutane.

¹⁹Ikilisiyoyin ƙasar Asiya suna gaishe ku. Akila da Bilkisu, tare da ikkilisiyar da take taruwa a gidansu, suna gaishe ku da kyau da kyau saboda Ubangiji.

²⁰Dukan 'yan'uwa suna gaishe ku. Ku gaggai da juna da tsattsarkar sumba.

²¹Ni Bulus, ni nake rubuta gaisuwar nan da hannuna.

²²Duk wanda ba ya ƙaunar Ubangiji yă zama la'ananne. Ubangijinmu fa yana zuwa!

²³Alherin Ubangijinmu Yesu yă tabbata a gare ku.

²⁴Ina gaishe ku duka, gaisuwar ƙauna, albarkar Almasihu Yesu.