Read hausa 1 TASALONIKAWA 5 Bible Online

1 TASALONIKAWA 5 - hausa bible

1 TASALONIKAWA 5

¹Amma ga zancen ainihin lokaci ko rana, ba lalle sai an rubuto muku kome ba.

²Domin ku da kanku kun sani sarai, ranar Ubangiji za ta zo ne kamar ɓarawo da dare.

³Lokacin da mutane suke cewa, “Muna zaman salama da zaman lafiya,” wuf; sai halaka ta auko musu, kamar yadda naƙuda take kama mace mai ciki, ba kuwa hanyar tsira.

⁴Amma, ai, ba a cikin duhu kuke ba, 'yan'uwa, har da ranar nan za ta mamaye ku kamar ɓarawo.

⁵Domin duk mutanen haske kuke, na rana kuma. Mu ba na dare ko na duhu ba ne.

⁶Ashe, saboda haka kada mu yi barci yadda waɗansu suke yi, sai dai mu zauna a faɗake, da natsuwa.

⁷Don masu barci da daddare suke barci, masu sha su bugu ma da daddare suke sha su bugu.

⁸Amma da yake mu na rana ne, sai mu natsu, muna saye da sulken bangaskiya da ƙauna, muna begen samun ceto, shi ne kuma kwalkwakinmu.

⁹Allah bai ƙaddara mu ga fushinsa ba, sai dai ga samun ceto ta wurin Ubangijinmu Yesu Almasihu,

¹⁰wanda ya mutu saboda mu, domin ko muna a raye, ko muna barci, mu zama muna tare da shi.

¹¹Saboda haka, sai ku ƙarfafa wa juna zuciya, kuna riƙa inganta juna, kamar dai yadda kuke yi.

¹²Amma muna roƙonku 'yan'uwa, ku girmama masu fama da aiki a cikinku, wato waɗanda suke shugabanninku cikin Ubangiji, suke kuma yi muku gargaɗi.

¹³Ku riƙe su da mutunci ƙwarai game da ƙauna saboda aikinsu. Ku yi zaman lafiya da juna.

¹⁴Muna kuma yi muku gargaɗi, 'yan'uwa, ku tsawata wa malalata, ku ƙarfafa masu rarraunar zuciya, ku taimaki marasa tsayayyiyar zuciya, ku yi haƙuri da kowa da kowa.

¹⁵Ku lura fa, kada kowa ya rama mugunta da mugunta. Sai dai kullum ku nace yi wa juna aiki nagari, da kuma dukkan mutane.

¹⁶Ku riƙa yin farin ciki a kullum.

¹⁷Ku riƙa yin addu'a ba fāsawa.

¹⁸Ku godiya ga Allah a kowane hali, domin shi ne nufin Allah a game da ku ta wurin Almasihu Yesu.

¹⁹Kada ku danne maganar Ruhu.

²⁰Kada ku raina annabci,

²¹sai dai ku jarraba kome, ku riƙi abin da yake nagari kankan.

²²Ku yi nesa da kowace irin mugunta.

²³Allah kansa, mai zartar da salama, yă tsarkake ku sarai, ya kuma kiyaye ruhunku da ranku da jikinku ƙalau, ku kasance marasa abin zargi a ranar komowar Ubangijinmu Yesu Almasihu.

²⁴Wanda yake kiranku ɗin nan mai alkawari ne, zai kuwa zartar.

²⁵Ya ku 'yan'uwa, ku yi mana addu'a.

²⁶Ku gai da dukkan 'yan'uwa da tsattsarkar sumba.

²⁷Na gama ku da Ubangiji, a karanta wa dukkan 'yan'uwa wasiƙar nan.

²⁸Alherin Ubangijinmu Yesu Almasihu yă tabbata a gare ku.