Read hausa 1 TIMOTI 2 Bible Online

1 TIMOTI 2 - hausa bible

1 TIMOTI 2

¹Da farko dai ina gargaɗi, cewa a yi ta roƙon Allah, ana addu'a, ana godo, ana gode wa Allah saboda dukkan mutane,

²da sarakuna da kuma duk waɗanda suke a manyan maƙamai, don mu zauna lafiya, rai a kwance, muna bin Allah sosai a cikin natsuwa.

³Wannan kyakkyawan abu ne, kuma abin karɓa ne a gun Allah Mai Cetonmu,

⁴wanda yake son dukkan mutane su sami ceto, su kuma kai ga sanin gaskiya.

⁵Domin Allah ɗaya ne, matsakanci kuma ɗaya ne, a tsakanin Allah da mutane, Almasihu Yesu, mutum,

⁶wanda ya ba da kansa fansa saboda kowa da kowa. An kuwa yi shaidar wannan a daidai lokacinsa.

⁷Don haka ne aka sa ni mai wa'azi, da manzo kuma (gasikya nake faɗa, ba ƙarya ba), mai koya wa al'ummai al'amarin bangaskiya da kuma na gaskiya.

⁸Saboda haka, a kowane wuri ina so maza su yi addu'a, suna ɗaga hannuwa tsarkakakku, ba tare da fushi ko jayayya ba.

⁹Mata kuma su riƙa sa tufafin da suka dace da su saboda kunya da kamunkai, ba adon kitso, ko kayan zinariya, ko lu'ulu'u, ko tufafi masu tsada ba,

¹⁰sai dai su yi aiki nagari, yadda ya dace da mata masu bayyana shaidar ibadarsu.

¹¹Mace ta riƙa koyo da kawaici da matuƙar biyayya.

¹²Ban yarda mace ta koyar, ko kuma ta yi iko da maza ba, sai dai ta zama shiru.

¹³Ai, Adamu aka fara halitta, sa'an nan Hawwa'u.

¹⁴Ba kuma Adamu aka yaudara ba, amma matar ce aka yaudara, har ta keta umarni.

¹⁵Duk da haka kuwa, ta wurin haifar 'ya'ya sai ta kai ga kammala, muddin ta nace wa bangaskiya, da ƙauna, da zama a tsarkake, da kuma kamunkai.