Read Hmong Daw Chivkeeb 11 Bible Online

Chivkeeb 11 - Hmong Daw bible

Chivkeeb 11

¹Thaum chivkeeb tej neeg uas nyob hauv ntiajteb no puavleej paub ib yam lus thiab hais ib yam lus xwb.

²Thaum lawv tsiv mus rau sab hnubtuaj, lawv thiaj mus txog rau ntawm lub tiaj nrag Npanpiloos thiab lawv txawm ua zej ua zos nyob rau ntawm lub tiaj nrag ntawd.

³Lawv ib leeg hais rau ib leeg hais tias, “Cia li tuaj! Peb yuav khawb av los puab ua thwvcib thiab coj mus hlawv kom tawv.” Yog li ntawd, lawv thiaj muab cov thwvcib ntawd thiab roj av nplaum lo ua ke kom ruaj khov.

⁴Lawv hais tias, “Nimno peb cia li tsim ua ib lub nroog thiab puab ib tug pejthuam kom siab nto ntuj, peb thiaj muaj koob muaj npe nyob nto moo lug thiab tsis tawg khiav mus nyob ua sab ua sua thoob ntiajteb.”

⁵Ces tus TSWV thiaj los saib lub nroog thiab tus pejthuam uas cov neeg ntawd puab.

⁶Thiab tus TSWV hais tias, “Nimno lawv yog ib pab thiab hais ib yam lus; qhov no yog tej uas lawv nyuam qhuav pib ua xwb. Tsis ntev ntshai lawv yuav ua tau txhua yam raws li lawv xav ua!

⁷Peb cia li mus ua kom lawv tej lus sib txawv thiab nyias hais nyias ib yam lus ib leeg tsis totaub ib leeg.”

⁸Yog li ntawd, tus TSWV thiaj los ua rau lawv tawg mus nyob ri sua thoob plaws hauv lub ntiajteb, thiab lawv thiaj tso tseg tsis tsim lub nroog ntawd ntxiv lawm.

⁹Yog li ntawd, thiaj muab lub nroog ntawd hu ua Npanpiloos, rau qhov tus TSWV ua rau txhua haivneeg nyias hais nyias ib yam lus, thiab nws ua rau lawv tawg ri sua ntawm qhov chaw ntawd mus nyob thoob plaws hauv lub ntiajteb no.

¹⁰Ntawm no mus yog Xees cov xeebntxwv. Tom qab uas dej nyab ntiajteb tas tau ob xyoos, Xees muaj hnubnyoog ib puas xyoo, nws muaj ib tug tub hu ua Apakhesas;

¹¹dhau ntawd, nws tseem ua neej nyob tau tsib puas xyoo thiab muaj menyuam coob leej ntxiv.

¹²Thaum Apakhesas hnubnyoog muaj peb caug tsib xyoos, nws muaj ib tug tub hu ua Selas,

¹³dhau ntawd, nws tseem ua neej nyob tau plaub puas peb xyoos thiab muaj menyuam coob leej ntxiv.

¹⁴Thaum Selas hnubnyoog muaj peb caug xyoo, nws muaj ib tug tub hu ua Enpes;

¹⁵dhau ntawd, nws tseem ua neej nyob tau plaub puas peb xyoos thiab muaj menyuam coob leej ntxiv.

¹⁶Thaum Enpes hnubnyoog muaj peb caug plaub xyoos, nws muaj ib tug tub hu ua Pelej;

¹⁷dhau ntawd, nws tseem ua neej nyob tau plaub puas peb caug xyoo thiab muaj menyuam coob leej ntxiv.

¹⁸Thaum Pelej hnubnyoog muaj peb caug xyoo, nws muaj ib tug tub hu ua Le-us;

¹⁹dhau ntawd, nws tseem ua neej nyob tau ob puas cuaj xyoos thiab muaj menyuam coob leej ntxiv.

²⁰Thaum Le-us hnubnyoog muaj peb caug ob xyoos, nws muaj ib tug tub hu ua Selus;

²¹dhau ntawd, nws tseem ua neej nyob tau ob puas xya xyoo thiab muaj menyuam coob leej ntxiv.

²²Thaum Selus hnubnyoog muaj peb caug xyoo, nws muaj ib tug tub hu ua Nahaus;

²³dhau ntawd, nws tseem ua neej nyob tau ob puas xyoo thiab muaj menyuam coob leej ntxiv.

²⁴Thaum Nahaus hnubnyoog muaj nees nkaum cuaj xyoos, nws muaj ib tug tub hu ua Telas;

²⁵dhau ntawd, nws tseem ua neej nyob tau ib puas kaum cuaj xyoos thiab muaj menyuam coob leej ntxiv.

²⁶Tom qab uas Telas hnubnyoog muaj xya caum xyoo, nws mam li muaj peb tug tub uas yog: Anplas, Nahaus thiab Halas.

²⁷Ntawm no mus yog Telas cov xeebntxwv. Telas cov tub yog Anplas, Nahaus thiab Halas. Halas yog Lauj txiv,

²⁸Halas tuag ua ntej nws txiv thaum tseem nyob hauv lub nroog Ules, hauv tebchaws Npanpiloos uas yug nws lawm.

²⁹Anplas yuav Xalais ua pojniam thiab Nahaus yuav Halas uas yog Ixakhas txiv tus ntxhais Milekas ua pojniam.

³⁰Xalais yeej ibtxwm xeeb tsis taus tub.

³¹Telas coj nws tus tub Anplas, nws tus xeebntxwv Lauj uas yog Halas tus tub, thiab nws tus nyab Xalais uas yog Anplas tus pojniam, tsiv tawm hauv lub nroog Ules hauv tebchaws Npanpiloos mus nyob rau tebchaws Kana-as. Tiamsis thaum lawv tsiv los txog ntawm Halas, lawv txawm los nyob rau qhov ntawd.

³²Telas tuag rau hauv lub nroog ntawd, thaum nws hnubnyoog muaj ob puas tsib xyoo.