Read Hmong Daw Chivkeeb 13 Bible Online

Chivkeeb 13 - Hmong Daw bible

Chivkeeb 13

¹Anplas thiaj coj nws tus pojniam thiab txhua yam uas yog nws tug, thiab Lauj nrog nws tawm hauv tebchaws Iziv mus txog rau pem Nenkes hauv tebchaws Kana-as sab qabteb.

²Anplas yog ib tug neeg muaj txiag npluanuj, muaj yaj, muaj tshis, muaj nyuj, muaj nyiaj thiab muaj kub ntau heev.

³Ces Anplas tawm ntawm qhov chaw ntawd thiab nws tsiv ib qho dhau rau ib qho, rov los rau hauv Npethees. Nws los txog ntawm qhov chaw uas nyob nruab nrab ntawm Npethees thiab A-is uas yav thaud nws tau los tsuam chaw nyob ib ntus

⁴thiab nws tau teeb ib lub thaj. Nws thiaj pehawm tus TSWV nyob qhov ntawd.

⁵Lauj tus uas nrog Anplas tsiv ua ke, kuj muaj yaj, muaj tshis, muaj nyuj, muaj cuab muaj yig thiab muaj tubtxib huv tibsi.

⁶Yog li ntawd, thiaj tsis muaj tshav zaub txaus rau nkawd tej tsiaj nyob ua ke, rau qhov nkawd muaj tsiaj txhu coob heev.

⁷Ces Anplas cov tub yug tsiaj thiab Lauj cov tub yug tsiaj thiaj sib cav sib ceg nyob tsis taus ua ke. (Lub sijhawm ntawd cov neeg Kana-as thiab cov neeg Pelixes tseem nyob hauv lub tebchaws ntawd.)

⁸Anplas thiaj hais rau Lauj hais tias, “Wb yog kwvtij txiv tub tsis tsimnyog cia koj cov neeg thiab kuv cov neeg sib cav sib ceg li no.

⁹Wb cia li sib faib nyias mus nyob nyias. Xaiv saib koj nyiam thaj chaw twg. Yog koj mus nyob sab laug, kuv mam mus nyob sab xis, yog koj mus nyob sab xis, kuv mam mus nyob sab laug.”

¹⁰Lauj tig saib ibncig ntawd thiab pom tagnrho lub Hav Yauladees mus thoob plaws rau ntawm Xau-as, mas muaj dej txhawv txhua qhov, ib yam li tus TSWV lub Vaj lossis zoo ib yam li lub tebchaws Iziv ntag. (Lub sijhawm ntawd yog ua ntej tus TSWV hlawv lub nroog Xaudoos thiab lub nroog Kaumaulas.)

¹¹Yog li ntawd, Lauj thiaj hom tagnrho lub Hav Yauladees thiab nws thiaj tsiv mus nyob rau sab hnubtuaj lawm. Qhov uas nkawd tau sib ncaim yog li ntawd.

¹²Anplas nyob rau sab tebchaws Kana-as, thiab Lauj mus nyob hauv tej nroog uas nyob raws hav thiab mus tsa tsevntaub nyob ze lub nroog Xaudoos.

¹³Cov neeg Xaudoos ua phem ua qias thiab ua txhaum tawmtsam tus TSWV loj kawg li.

¹⁴Tom qab uas Lauj ncaim lawm, tus TSWV hais rau Anplas hais tias, “Koj tuaj ntawm qhov chaw uas koj nyob ko, tsa qhovmuag ua tib zoo saib mus rau sab qabteb thiab qaumteb, hnubtuaj thiab hnubpoob.

¹⁵Kuv yuav muab tagnrho lub tebchaws uas koj qhovmuag pom ntawd pub rau koj thiab koj cov xeebntxwv, thiab lub tebchaws ntawd yuav yog koj tug mus ibtxhis li.

¹⁶Kuv yuav pub kom koj muaj xeebntxwv coob heev uas tsis muaj leejtwg yuav suav txheeb li, yog leejtwg suav txheeb tej hmoov av hauv ntiajteb no, mas thiaj yuav suav txheeb koj cov xeebntxwv!

¹⁷Nimno, koj cia li sawv kev mus kom thoob plaws lub tebchaws no, rau qhov kuv yuav muab tagnrho lub tebchaws no pub rau koj.”

¹⁸Yog li ntawd, Anplas thiaj li tsiv tawm ntawm thaj chaw ntawd thiab mus tsa tsevntaub nyob ze tsob ntoo xeeb ntawm thaj chaw Males hauv lub nroog Henploos, thiab thaum nyob ntawd nws teeb tau ib lub thaj ua chaw fij khoom rau tus TSWV.