Read Hmong Daw Chivkeeb 3 Bible Online

Chivkeeb 3 - Hmong Daw bible

Chivkeeb 3

¹Nab yog ib tug uas ntse tshaj txhua yam tsiaj qus uas tus TSWV uas yog Vajtswv tau tsim huv tibsi. Nab thiaj nug tus pojniam hais tias, “Vajtswv yeej txwv kom neb tsis txhob noj txhua yam txiv ntoo uas nyob hauv lub vaj no tiag los?”

²Tus pojniam teb hais tias, “Wb yeej noj tau txhua yam txiv ntoo uas nyob hauv lub vaj no,

³tsuas yog tshwj tsob txiv ntoo hauv plawv vaj thiaj tsis noj xwb. Vajtswv yeej txwv tsis pub wb noj tsob ntoo ntawd tej txiv lossis tsis pub kov tsob ntoo ntawd; yog wb noj, wb yuav tuag.”

⁴Nab teb tus pojniam hais tias, “Tej lus ntawd tsis tseeb, neb yuav tsis tuag ib zaug li.

⁵Vajtswv hais li ntawd, rau qhov nws paub hais tias thaum twg neb noj tsob txiv ntoo ntawd, neb yuav paub qhov phem thiab qhov zoo.”

⁶Tus pojniam pom hais tias, tsob ntoo ntawd zoo nkauj thiab tej txiv ntxim qab kawg li, tsis yog li ntawd xwb, nws xav hais tias tej txiv ntoo ntawd tseem yuav ua rau nws muaj tswvyim thiab. Ces nws txawm cev tes mus de cov txiv los noj. Nws muab rau nws tus txiv noj thiab.

⁷Thaum nkawd noj tas lawm, nkawd txawm pom tseeb thiab paub hais tias nkawd liabqab, nkawd thiaj mus de nplooj txiv ncuavpias los xaws hnav.

⁸Thaum yuav tsaus ntuj nkawd hnov tus TSWV uas yog Vajtswv lub suab mus kev hauv lub vaj, nkawd thiaj khiav mus nkaum rau hauv cov ntoo lawm.

⁹Tiamsis tus TSWV uas yog Vajtswv hu tus txivneej hais tias, “Koj nyob qhov twg?”

¹⁰Nws teb hais tias, “Kuv hnov koj los rau hauv lub vaj no, kuv ntshai koj heev kuv thiaj khiav mus nkaum lawm, rau qhov kuv liabqab.”

¹¹Vajtswv nug hais tias, “Leejtwg hais rau koj tias koj liabqab? Tsis yog koj noj tsob txiv ntoo uas kuv txwv tsis pub koj noj lawm los?”

¹²Tus txivneej teb hais tias, “Twb yog tus pojniam uas koj muab rau kuv, nws muab cov txiv ntoo ntawd rau kuv noj, kuv thiaj li tau noj lawm.”

¹³Vajtswv nug tus pojniam hais tias, “Vim li cas koj thiaj ua li ko?” Nws teb hais tias, “Nab ntxias kuv noj!”

¹⁴Tus TSWV uas yog Vajtswv thiaj hais rau nab hais tias, “Koj yuav raug txim vim qhov uas koj ntxias tus pojniam no ua txhaum. Tagnrho tej tsiaj huv tibsi, koj yog tus uas yuav tau ris lo lus foom tsis zoo no: txij hnub no mus, koj yuav muab koj lub plab luag saum npoo av mus li thiab noj hmoov av mus tas koj lub neej.

¹⁵Kuv yuav ua kom koj thiab tus pojniam no ua yeebncuab, nws tus xeebntxwv thiab koj tus xeebntxwv yuav ua yeebncuab mus li. Nws tus xeebntxwv yuav tsoo koj taubhau kom ntsoog, thiab koj yuav tom nws lub lujtaws.”

¹⁶Vajtswv hais rau tus pojniam ntawd tias, “Kuv yuav tsub kev txomnyem rau koj thaum koj suab menyuam thiab tsub kev mob rau koj thaum koj yug menyuam. Txawm yog li ntawd los koj tseem xav nrog koj tus txiv ua txij ua nkawm, tiamsis nws yuav tswjhwm koj.”

¹⁷Vajtswv hais rau Adas hais tias, “Twb yog vim koj mloog koj tus pojniam lus thiab noj cov txiv ntoo uas kuv txwv tsis pub koj noj. Vim koj tau ua li ntawd av thiaj raug foom tsis zoo. Koj yuav tau siv zog khwv mus tas simneej, koj thiaj tau noj tau haus.

¹⁸Av yuav tuaj nroj thiab tuaj pos, thiab koj yuav de nroj tsuag tom tej teb los ua zaub noj.

¹⁹Koj yuav ua teb khwv lub hws nrog, koj thiaj tau noj mus txog thaum koj rov mus rau hauv cov av uas koj tawm los. Kuv muab av los puab koj, thiab koj yuav rov mus ua av dua.”

²⁰Adas tis nws tus pojniam npe hu ua Evas, rau qhov Evas yog txhua haivneeg leej niam.

²¹Tus TSWV uas yog Vajtswv txawm muab tawv tsiaj los ua ris tsho rau Adas thiab nws tus pojniam, thiab muab rau nkawd hnav.

²²Tus TSWV uas yog Vajtswv hais tias, “Nimno tus txivneej no nws zoo li peb thiab nws paub qhov phem thiab qhov zoo lawm. Yuav tsis pub nws mus de tsob txiv ntoo uas cawm tau txojsia los noj, nyob tsam nws yuav muaj txojsia nyob mus ibtxhis.”

²³Tus TSWV uas yog Vajtswv thiaj ntiab Adas khiav tawm hauv lub Vaj Edees thiab kom nws mus khawb av ua noj ua haus, ntawm cov av uas Vajtswv muab coj los puab nws.

²⁴Thaum Vajtswv muab tus txivneej ntawd ntiab tawm lawm, Vajtswv tso ib cov qhelunpees tuav ib rab ntaj nplaim taws uas tig tau mus rau txhua phab los zov lub Vaj Edees sab hnubtuaj, tsis pub leejtwg mus ze tsob txiv ntoo uas cawm tau txojsia.