Read Hmong Daw Chivkeeb 32 Bible Online

Chivkeeb 32 - Hmong Daw bible

Chivkeeb 32

¹Thaum Yakhauj tabtom taug kev los cov timtswv saum ntuj los ntsib nws.

²Thaum Yakhauj pom cov timtswv ntawd, nws hais tias, “Ntawm no yog Vajtswv lub yeej”, yog li ntawd, Yakhauj thiaj tis npe rau thaj chaw ntawd hu ua Mahana-ees.

³Yakhauj tso neeg ua nws ntej mus hais rau nws tus tijlaug Exaus uas nyob hauv tebchaws Edoos.

⁴Nws qhia kom cov xa xov mus hais li no rau Exaus: “Kuv yog Yakhauj, yog koj tus tubtxib uas mloog lus, thov hais rau kuv tus tswv Exaus paub hais tias, kuv mus nrog Lanpas nyob tau ntev loo thiab tamsim no kuv tabtom rov qab los lawm.

⁵Kuv muaj nyuj, muaj neesluav, muaj yaj, muaj tshis thiab muaj qhev coob heev. Kuv muaj lus li no los thov koj uas yog tus hlob, kuv cia siab ntsoov hais tias koj yuav txaus siab rau kuv.”

⁶Thaum cov neeg uas xa xov rov qab los cuag Yakhauj, lawv hais tias, “Peb twb mus cuag koj tus tijlaug Exaus tas lawm, nws tabtom npaj sawv kev tuaj tos koj lawm ntag. Nws coj tau plaub puas leej neeg nrog nws tuaj.”

⁷Yakhauj ntshai heev thiab nyuaj siab kawg li. Nws thiaj muab nws cov neeg faib kiag ua ob pab, nws tseem muab nws cov yaj, cov tshis, cov nyuj thiab cov ntxhuav faib ua ob pab thiab.

⁸Nws xav hais tias, “Yog Exaus tuaj tua pab ua ntej los kom pab ua qab khiav tau dim.”

⁹Yakhauj thiaj thov Vajtswv hais tias, “Kuv yawgkoob Anplahas tus Vajtswv thiab kuv txiv Ixaj tus Vajtswv, thov koj mloog kuv tej lus thov lauj! Tus TSWV, koj hais kom kuv rov qab mus lawm nram kuv lub tebchaws thiab kuv cov kwvtij, thiab koj yuav pub kev tau zoo rau kuv.

¹⁰Twb tsis tsimnyog koj hlub thiab ua ncaj ncees rau kuv uas yog koj tus tubtxib hlo li. Thaum kuv hla tus Dej Yauladees tuaj kuv tsis muaj dabtsi li, tsuas muaj tib tug pas nrig xwb, tiamsis nimno muaj ob pab neeg thiab ob pab tsiaj coob kawg nrog kuv rov qab los.

¹¹Kuv thov koj pab kom kuv dim ntawm kuv tus tijlaug Exaus lauj. Kuv ntshai heev, kuv ntshai nyob tsam nws tuaj tua peb thiab ua rau peb raug kev puastsuaj, tsis hais tej pojniam thiab menyuam huv tibsi.

¹²Thov koj nco ntsoov tej lus uas koj cog tseg hais tias, koj yuav pub kev tau zoo rau kuv thiab pub kom kuv muaj xeebntxwv coob suav tsis txheeb, ib yam li tej suabzeb nram ntug hiavtxwv.”

¹³Nws thiaj pw ib hmos ntawm thaj chaw ntawd, thiab nws thiaj xaiv tej tsiaj uas nws muaj ibtxhia coj mus pub rau nws tus tijlaug Exaus li no:

¹⁴ob puas tus maum tshis thiab nees nkaum tus laug tshis, ob puas tus maum yaj thiab nees nkaum tus laug yaj,

¹⁵peb caug tus maum ntxhuav nrog cov menyuam uas tseem mos, plaub caug tus maum nyuj thiab kaum tus heev nyuj, nees nkaum tus maum neesluav thiab kaum tus txiv neesluav.

¹⁶Nws muab cov tsiaj ntawd faib ua tej pab thiab nws kom nws cov tubtxib ib leeg mus saib ib pab. Nws hais rau lawv tias, “Nej cia li mus ua kuv ntej, ib pab mus kom nrug ib pab deb tsawv.”

¹⁷Nws hais rau thawj tug tubtxib hais tias, “Thaum twg yog kuv tus tijlaug Exaus tuaj ntsib koj thiab nws nug hais tias, ‘Koj tus tswv yog leejtwg? Koj yuav mus qhov twg? Leejtwg yog tus tswv cov tsiaj uas ua koj ntej no?’

¹⁸Koj yuav tsum teb hais tias, ‘cov tsiaj no yog koj tus tubtxib Yakhauj li. Nws kom coj cov tsiaj no los pub rau Exaus uas yog nws tus tswv. Yakhauj tseem tabtom los ua peb qab.’ ”

¹⁹Yakhauj hais rau tus tubtxib ob thiab tus tubtxib peb, thiab txhua tus uas nws tsa los saib nws cov tsiaj ntawd ib yam nkaus hais tias: “Thaum nej ntsib Exaus nej yuav tsum hais tej lus no rau nws.

²⁰Nej yuav tsum hais tias, ‘Yakhauj uas yog koj tus tubtxib, tseem ua peb qab.’ ” Yakhauj xav hais tias, “Kuv twb muab kuv tej tsiaj xa ua ntej mus pub rau nws lawm, ces thaum kuv mus ntsib nws, nyaj nws yuav zam txim rau kuv.”

²¹Yakhauj xa tej khoom pub ntawd mus ua ntej, tiamsis nws tseem rov pw ib hmos ntawm lub yeej ntawd.

²²Hmo ntawd Yakhauj sawv coj nws ob tug pojniam, nws ob tug niamyau, thiab nws kaum ib leeg menyuam mus hla tus Dej Yanpaus.

²³Thaum nws xa pojniam menyuam hla dhau dej tas, nws mam muab tej khoom uas yog nws tug xa rau sab dej tim ub huv tibsi thiab,

²⁴tiamsis Yakhauj ib leeg tseem nyob tom qab. Ces txawm muaj ib tug txivneej los nrog Yakhauj sib qhau mus txog thaum kaj ntug txoog.

²⁵Thaum tus txivneej ntawd pom hais tias, nws yuav qhau tsis yeej Yakhauj, nws thiaj ntaus Yakhauj lub ntsag ua rau Yakhauj lub pob qij txha pluam plhuav.

²⁶Tus txivneej ntawm hais tias, “Hnub twb yuav tawm, koj cia li tso kuv mus.” Yakhauj teb hais tias, “Kuv yuav tsis tso koj mus txog thaum koj foom koob hmoov rau kuv tso.”

²⁷Tus txivneej ntawm nug Yakhauj hais tias, “Koj npe hu li cas?” Nws teb hais tias, “Kuv npe hu ua Yakhauj.”

²⁸Tus txivneej ntawd hais tias, “Koj lub npe yuav tsis hu ua Yakhauj ntxiv lawm. Rau qhov koj muaj peevxwm nrog Vajtswv thiab nrog neeg sib qhau, thiab ua rau koj yeej lawm, yog li ntawd, yuav muab koj lub npe tis hu ua Yixalayees.”

²⁹Yakhauj hais tias, “Thov koj qhia koj lub npe rau kuv.” Tiamsis nws teb Yakhauj hais tias, “Vim li cas koj xav paub kuv lub npe?” Ces nws txawm foom koob hmoov rau Yakhauj.

³⁰Yakhauj hais tias, “Kuv twb pom Vajtswv tim ntsej tim muag lawm, tiamsis kuv tseem muaj sia nyob.” Yog li ntawd, Yakhauj thiaj tis npe rau thaj chaw ntawd hu ua Peniyees.

³¹Thaum hnub tawm tuaj Yakhauj thiaj sawv kev hauv Peniyees mus lawm, thiab nws mus kev cegtawv pluav rau qhov mob nws lub ntsag heev.

³²Txawm yog niaj hnub nimno los Yixalayees cov xeebntxwv yeej tsis noj thooj nqaij ntawm lub ntsag ntawd hlo li, rau qhov Vajtswv ntaus Yakhauj lub ntsag ntawd lawm.