Read Hmong Daw Chivkeeb 36 Bible Online

Chivkeeb 36 - Hmong Daw bible

Chivkeeb 36

¹Ntawm no mus yog Exaus cov xeebntxwv uas muaj dua ib lub npe hu ua Edoos.

²Exaus mus yuav cov neeg Kana-as tej ntxhais los ua pojniam: Eloos uas yog neeg Hitis tus ntxhais uas hu ua Adahes, thiab Xinpe-oos uas yog neeg Hivis tus tub Anas tus ntxhais uas hu ua Auhaulinpamas,

³thiab Yisamayees tus ntxhais Npasemas ua yog Nenpayaus tus muam.

⁴Adahes yug tau Elifas, Npasemas yug tau Le-uyees

⁵thiab Auhaulinpamas yug tau Ye-uses, Yalas thiab Kaulas. Tagnrho cov no puavleej yog Exaus cov tub uas yug hauv lub tebchaws Kana-as.

⁶Ces Exaus coj nws cov pojniam, cov tub, cov ntxhais thiab tagnrho nws tsevneeg, nrog nws tej tsiaj txhu thiab txhua yam uas nws khwv tau hauv tebchaws Kana-as, tsiv mus nyob rau ib lub tebchaws uas nyob deb ntawm nws tus kwv Yakhauj.

⁷Nws tsiv mus vim lub tebchaws uas nws thiab Yakhauj ibtxwm nyob nqaim rau nkawd heev, thiab nkawd muaj tsiaj txhu coob thiaj ua rau nkawd nyob tsis tau ua ke.

⁸Yog li ntawd, Exaus (uas yog neeg Edoos) thiaj mus nyob rau pem lub laj roob uas nyob pem tebchaws Xe-iles lawm.

⁹Ntawm no yog Exaus cov xeebntxwv uas yog cov neeg Edoos cov yawgkoob uas nyob pem lub laj roob pem tebchaws Xe-iles.

¹⁰Ntawm no yog Exaus cov tub tej npe: nws tus pojniam uas hu ua Adahes yug tau Elifas, thiab nws tus pojniam uas hu ua Npasemas yug tau Le-uyees.

¹¹Elifas cov tub yog: Temas, Aumas, Xefaus, Nkatas thiab Kenaxes.

¹²Exaus tus tub Elifas tseem muaj ib tug niamyau hu ua Teenas. Teenas yug tau ib tug tub hu ua Amalej. Cov no puavleej yog Exaus tus pojniam uas hu ua Adahes cov xeebntxwv.

¹³Le-uyees cov tub yog: Nahas, Zelas, Samas thiab Mixexas. Cov no puavleej yog Exaus tus pojniam uas hu ua Npasemas cov xeebntxwv.

¹⁴Exaus tus pojniam uas hu ua Auhaulinpamas uas yog Xinpe-oos tus tub Anas tus ntxhais, yug tau peb tug tub rau Exaus: Ye-uses, Yalas thiab Kaulas.

¹⁵Ntawm no yog cov thawjcoj uas yog Exaus cov xeebntxwv. Exaus tus tub hlob Elifas yog yawgkoob ntawm cov thawjcoj nram qab no: Temas, Aumas, Xefaus, Kenaxes,

¹⁶Kaulas, Nkatas thiab Amalej. Cov thawjcoj no puavleej yog cajces los ntawm Elifas uas nyob hauv tebchaws Edoos, thiab yog Exaus tus pojniam uas hu ua Adahes cov xeebntxwv.

¹⁷Exaus tus tub Le-uyees yog yawgkoob ntawm cov thawjcoj nram qab no: Nahas, Zelas, Samas thiab Mixexas. Cov thawjcoj no puavleej yog cajces los ntawm Le-uyees uas nyob hauv tebchaws Edoos, thiab yog Exaus tus pojniam uas hu ua Npasemas cov xeebntxwv.

¹⁸Cov thawjcoj nram qab no, puavleej yog cajces los ntawm Exaus tus pojniam uas hu ua Auhaulinpamas uas yog Anas tus ntxhais: Ye-uses, Yalas thiab Kaulas.

¹⁹Tagnrho cov thawjcoj no puavleej yog Exaus (uas yog neeg Edoos) cov xeebntxwv.

²⁰Ntawm no yog Xe-iles uas yog neeg Haulis cov tub, lawv yog cov neeg uas nyob hauv lub tebchaws Edoos thiab lawv yeej ibtxwm nyob hauv cheebtsam ntawd. Xe-iles cov tub yog: Lautas, Saunpas, Xinpe-oos, Anas,

²¹Disoos, Exeles thiab Disas. Xe-iles cov tub uas nyob hauv tebchaws Edoos puavleej yog cov neeg Haulis cov thawjcoj.

²²Lautas cov tub yog: Haulis thiab Hemas. Teenas yog Lautas tus muam.

²³Saunpas cov tub yog: Alevas, Manahas, Enpales, Sefaus thiab Aunas.

²⁴Xinpe-oos muaj ob tug tub yog: Ayihas thiab Anas. (Ntawm no yog Anas tus uas mus pom lub qhovdej kub uas nyob tom roob mojsab qhua, thaum nws coj nws txiv cov neesluav mus noj zaub.)

²⁵Anas cov menyuam yog: Disoos thiab Auhaulinpamas uas yog Anas tus ntxhais.

²⁶Disoos cov tub yog: Heedas, Esenpas, Ithalas thiab Kelas.

²⁷Exeles cov tub yog: Npihas, Xavas thiab Akas.

²⁸Disas cov tub yog: Uxes thiab Alas.

²⁹Cov ntawm no yog cov Haulis cov thawjcoj: Lautas, Saunpas, Xinpe-oos, Anas,

³⁰Disoos, Exeles thiab Disas. Lawv cov no puavleej yog cov Haulis cov thawjcoj, raws li lawv muab faib ua tej pab tej pawg, nyob hauv lub tebchaws Xe-iles.

³¹Cov no yog cov vajntxwv uas kav lub tebchaws Edoos ua ntej cov Yixalayees muaj vajntxwv.

³²Npe-aules tus tub Npelas ua vajntxwv kav tebchaws Edoos, nws lub nroog hu ua Dihanpas.

³³Thaum Npelas tuag lawm, Zelas tus tub Yaunpaj uas nyob hauv Npauxelas ua vajntxwv hloov nws chaw.

³⁴Thaum Yaunpaj tuag lawm, Husas uas nyob hauv tebchaws Temas ua vajntxwv hloov nws chaw.

³⁵Thaum Husas tuag lawm, Npedas tus tub Hadas, (Npedas yog tus mus tua yeej cov neeg Midias hauv lub tebchaws Mau-am,) ua vajntxwv hloov nws chaw. Nws lub nroog hu ua Avithas.

³⁶Thaum Hadas tuag lawm, Xamelas uas nyob hauv Malekas ua vajntxwv hloov nws chaw.

³⁷Thaum Xamelas tuag lawm, Sa-ules uas nyob hauv Lehaunpaus, pem lub hauv dej Efalates ua vajntxwv hloov nws chaw.

³⁸Thaum Sa-ules tuag lawm, Anpaus tus tub Npa-as Hanas ua vajntxwv hloov nws chaw.

³⁹Thaum Anpaus tus tub Npa-as Hanas tuag lawm, Hadas ua vajntxwv hloov nws chaw. Nws lub nroog hu ua Pa-us, (nws tus pojniam hu ua Mehetanpees uas yog Matales tus ntxhais thiab yog Mexahas tus ntxhais xeebntxwv.)

⁴⁰Cov no yog cov thawjcoj uas yog Exaus cov xeebntxwv, raws li lawv cajces tsevneeg, lawv tej chaw nyob thiab lawv tej npe: Teenas, Alevas, Yethes,

⁴¹Auhaulinpamas, Elas, Pinoos,

⁴²Kenaxes, Temas, Minpaxales,

⁴³Makediyees thiab Ilames. Cov no puavleej yog cov neeg Edoos cov thawjcoj.