Read Hmong Daw Chivkeeb 39 Bible Online

Chivkeeb 39 - Hmong Daw bible

Chivkeeb 39

¹Cov neeg Yisamayees coj Yauxej mus txog nram tebchaws Iziv, thiab lawv muab nws muag rau Pautifas uas yog Falaus tus thawj tubrog saib cov tubrog uas zov Falaus lub loog.

²Tus TSWV nrog nraim Yauxej thiab pub nws tes haujlwm vammeej heev. Nws nyob hauv nws tus tswv Pautifas uas yog neeg Iziv lub tsev,

³Pautifas pom hais tias tus TSWV nrog nraim Yauxej thiab ua rau txhua tes haujlwm uas Yauxej ua puavleej tiav.

⁴Pautifas txaus siab heev rau Yauxej thiab tsa Yauxej ua nws tus tubtxib, thiab tso plhuav nws lub cuabtam rau Yauxej ua tus saib.

⁵Txij thaum ntawd los tus TSWV thiaj foom koob hmoov rau tus neeg Iziv ntawd tsevneeg, thiab txhua yam uas nws muaj nyob hauv nws lub vaj lub tsev thiab hauv nws tej teb, vim Yauxej nrog nws nyob.

⁶Pautifas muab txhua yam uas nws muaj cob rau Yauxej saib thiab nws tso siab plhuav tsis txhawj txog ib yam dabtsi li, tsuas yog tshwj cov zaub mov uas nws noj nkaus xwb. Yauxej yog ib tug hluas uas cev yiag thiab zoo nraug heev,

⁷ces tau tsis ntev Yauxej tus tswv tus pojniam txawm nyiam Yauxej, thiab nws taij Yauxej hais tias, “Koj mus nrog kuv pw.”

⁸Yauxej tsis kam mus, thiab nws hais rau Pautifas tus pojniam hais tias, “Koj saib, txij thaum kuv los nyob ntawm no, kuv tus tswv tso siab plhuav rau kuv tsis muaj kev nyuaj siab txhawj txog ib yam dabtsi nyob hauv nws lub tsev hlo li. Nws muab txhua yam uas nws muaj tso plhuav rau kuv ua tus saib.

⁹Hauv lub tsev no kuv thiaj yog tus uas muaj peevxwm ib yam li nws muaj xwb. Kuv tus tswv yeej tsis txwv kuv ib yam dabtsi li, tsuas tshwj koj uas yog nws tus pojniam, nws thiaj txwv tsis pub kuv kov, kuv yuav ua li cas muaj pluaj siab deev koj thiab ua txhaum rau Vajtswv?”

¹⁰Txawm yog nws niaj hnub taij kom Yauxej mus nrog nws pw los Yauxej yeej tsis kam mus li.

¹¹Tiamsis muaj ib hnub Yauxej mus ua haujlwm hauv tsev raws li nws pheej txeev ua, hnub ntawd tej tubtxib tsis muaj ib tug nyob hauv tsev li lawm.

¹²Pautifas tus pojniam txawm los tuav nkaus Yauxej lub tsho thiab hais tias, “Koj cia li mus nrog kuv pw xwb.” Tiamsis Yauxej hle hlo Yauxej lub tsho rau nws, thiab Yauxej tawm plaws khiav rau nraum zoov lawm.

¹³Thaum Pautifas tus pojniam pom hais tias, Yauxej hle Yauxej lub tsho rau nws thiab khiav tawm rau nraum zoov lawm,

¹⁴nws txawm hu cov tubtxib uas zov nws lub tsev los thiab ntxeev lus hais tias, “Nej sim saib! Tus neeg Henplais uas kuv tus txiv coj los rau hauv tsev no, nws ua saib tsis taus peb kiag li. Nws cia li los hauv kuv txaj thiab mos kuv, tiamsis kuv qw tawg ntho,

¹⁵ces nws cia li khiav dua nraum zoov lawm, thiab tseg nws lub tsho rau ntawm kuv ib sab.”

¹⁶Pautifas tus pojniam thiaj khaws Yauxej lub tsho cia mus txog thaum Yauxej tus tswv rov qab los txog tsev.

¹⁷Ces nws txawm piav zaj no rau nws tus txiv mloog hais tias: “Tus tubtxib Henplais uas koj coj los nrog wb nyob, nws los mov kuv hauv txaj.

¹⁸Tiamsis thaum kuv qw tawg ntho, nws tso plhuav kuv tseg thiab khiav dua nraum zoov lawm, nws tseg nws lub tsho rau ntawm kuv ib sab.”

¹⁹Thaum Yauxej tus tswv hnov dheev tej lus uas nws tus pojniam hais tias, “Koj tus tubtxib tau ua li no rau kuv lawm ntag.” Thiaj ua rau nws chim heev.

²⁰Yauxej tus tswv thiaj coj Yauxej mus kaw rau hauv qhov chaw uas kaw Falaus cov neeg raug txim, ces Yauxej txawm mus nyob rau hauv lub tsev lojcuj ntawd lawm.

²¹Tiamsis tus TSWV yeej nrog nraim Yauxej thiab foom koob hmoov rau Yauxej, ces tus uas saib lub tsev lojcuj thiaj txaus siab heev rau Yauxej.

²²Nws tsa Yauxej ua tus saib tagnrho cov neeg raug txim thiab ua tus saib txhua yam uas nyob hauv lub tsev lojcuj.

²³Tus uas saib lub tsev lojcuj tso siab plhuav, tsis mus saib tej haujlwm uas nws tso rau Yauxej ua li, rau qhov tus TSWV nrog nraim Yauxej thiab pub tswvyim rau Yauxej ua tau txhua yam haujlwm tiav huv tibsi.