Read Hmong Daw Chivkeeb 5 Bible Online

Chivkeeb 5 - Hmong Daw bible

Chivkeeb 5

¹Ntawm no mus yog hais txog Adas tej xeebntxwv. (Thaum Vajtswv tsim neeg, nws tsim zoo li nws tus yam ntxwv ntag.

²Vajtswv tsim tau ib tug txivneej thiab ib tug pojniam. Vajtswv foom koob hmoov rau nkawd, tis npe rau nkawd, thiab hu nkawd ua “Noobneej.”)

³Thaum Adas muaj ib puas peb caug xyoo lawm, nws muaj dua ib tug tub zoo li nws thiab nws tis npe hu ua Xej.

⁴Dhau ntawd los Adas tseem nyob tau yim pua xyoo, thiab nws tseem muaj menyuam coob leej ntxiv.

⁵Nws tuag rau thaum nws hnubnyoog muaj cuaj pua peb caug xyoo.

⁶Thaum Xej hnubnyoog muaj ib puas tsib xyoos, nws muaj ib tug tub hu ua Enauses,

⁷dhau ntawd los nws tseem ua neej nyob tau yim pua xya xyoo, thiab nws tseem muaj menyuam coob leej ntxiv.

⁸Nws tuag rau thaum nws hnubnyoog muaj cuaj pua kaum ob xyoos.

⁹Thaum Enauses hnubnyoog muaj cuaj caum xyoo, nws muaj ib tug tub, hu ua Kenas,

¹⁰dhau ntawd los nws tseem ua neej nyob tau yim pua kaum tsib xyoos, thiab nws tseem muaj menyuam coob leej ntxiv.

¹¹Nws tuag rau thaum nws hnubnyoog muaj cuaj pua tsib xyoos.

¹²Thaum Kenas hnubnyoog muaj xya caum xyoo, nws muaj ib tug tub hu ua Mahalalees,

¹³dhau ntawd los nws tseem ua neej nyob tau yim pua plaub caug xyoo, thiab nws tseem muaj menyuam coob leej ntxiv.

¹⁴Nws tuag rau thaum nws hnubnyoog muaj cuaj pua kaum xyoo.

¹⁵Thaum Mahalalees hnubnyoog muaj rau caum tsib xyoos, nws muaj ib tug tub hu ua Yales,

¹⁶dhau ntawd los nws tseem ua neej nyob tau yim pua peb caug xyoo, thiab nws tseem muaj menyuam coob leej ntxiv.

¹⁷Nws tuag rau thaum nws hnubnyoog muaj yim pua cuaj caum tsib xyoos.

¹⁸Thaum Yales hnubnyoog muaj ib puas rau caum ob xyoos, nws muaj ib tug tub hu ua Enauj,

¹⁹dhau ntawd los nws tseem ua neej nyob tau yim pua xyoo, thiab nws tseem muaj menyuam coob leej ntxiv.

²⁰Nws tuag rau thaum nws hnubnyoog muaj cuaj pua rau caum ob xyoos.

²¹Thaum Enauj hnubnyoog muaj rau caum tsib xyoos, nws muaj ib tug tub hu ua Methuxelas,

²²dhau ntawd los nws tseem ua neej nyob hwm thiab pehawm Vajtswv tau peb puas xyoo, thiab nws tseem muaj menyuam coob leej ntxiv.

²³Nws ua neej nyob tau peb puas rau caum tsib xyoos.

²⁴Enauj ua nws lub neej nrog Vajtswv sib raug zoo, ces nws txawm cia li ploj lawm, rau qhov Vajtswv coj nws mus lawm.

²⁵Thaum Methuxelas hnubnyoog muaj ib puas yim caum xya xyoo, nws muaj ib tug tub hu ua Lamej,

²⁶dhau ntawd los nws tseem ua neej nyob tau xya pua yim caum ob xyoos, thiab nws tseem muaj menyuam coob leej ntxiv.

²⁷Nws tuag rau thaum nws hnubnyoog muaj cuaj pua rau caum cuaj xyoos.

²⁸Thaum Lamej hnubnyoog muaj ib puas yim caum ob xyoos, nws muaj ib tug tub,

²⁹Lamej muab tis npe hu ua Nau-es, Lamej hais tias, “Tus menyuam no yuav pab peb ris lub nra hnyav ntawm thaj av uas raug Vajtswv foom tsis zoo lawm kom sib.”

³⁰Dhau ntawd los Lamej tseem ua neej nyob tau tsib puas cuaj caum tsib xyoos, thiab nws tseem muaj menyuam coob leej ntxiv.

³¹Nws tuag rau thaum nws hnubnyoog muaj xya pua xya caum xya xyoo.

³²Thaum Nau-es hnubnyoog muaj tsib puas xyoo lawm, nws mam li muaj peb leeg tub, Xees, Has thiab Yafej.