Read Hmong Daw Chivkeeb 9 Bible Online

Chivkeeb 9 - Hmong Daw bible

Chivkeeb 9

¹Vajtswv foom koob hmoov rau Nau-es thiab nws cov tub hais tias, “Nej yuav muaj tub muaj ki coob, kom nej thiaj muaj xeebntxwv huamvam mus nyob puv ntiajteb.

²Txhua yam tsiaj, tsis hais tsiaj nyeg, tsiaj qus, nab, qav, nas, noog thiab tej ntses puavleej ntshai nej. Kuv yuav muab tej tsiaj ntawd tso rau nej kav.

³Txij no mus kuv pub txhua yam tsiaj, noog thiab ntses rau nej noj, ib yam li tej zaub uas kuv twb pub rau nej noj lawm.

⁴Tiamsis nej tsis txhob noj tej nqaij uas txheem ntshav, rau qhov ntshav yog yam uas ua kom muaj txojsia.

⁵Yog leejtwg tua neeg, kuv yuav rau txim tuag rau tus ntawd. Yog tej tsiaj tom neeg tuag, kuv yuav rau txim tuag rau tej tsiaj ntawd ib yam nkaus.

⁶Yog leejtwg tua neeg, mas lwm tus yuav muab tus ntawd tua ib yam nkaus, rau qhov Vajtswv tsim neeg muaj tus yam ntxwv zoo li Vajtswv.

⁷“Nej yuav muaj tubki coob, kom nej tej xeebntxwv huamvam mus nyob puv lub ntiajteb.”

⁸Vajtswv hais rau Nau-es thiab nws cov tub hais tias,

⁹“Txij no mus kuv coglus tseg rau koj thiab koj cov xeebntxwv,

¹⁰thiab txhua yam uas muaj sia, txhua yam noog, thiab txhua yam tsiaj uas nrog nej tawm hauv lub nkoj los.

¹¹Kuv coglus tseg rau nej hais tias: kuv yuav tsis tso dej los nyab txhua yam uas muaj sia kom puastsuaj li zaum no, thiab dej yuav tsis nyab lub ntiajteb kom puastsuaj li no ib zaug ntxiv lawm.

¹²Lub cim uas kuv coglus tseg mus ibtxhis rau nej thiab txhua yam uas muaj sia,

¹³mas yog kuv yuav ua kom muaj ib tug duab zaj sawv rau saum cov huab. Tus duab zaj ntawd yog lub cim uas kuv coglus tseg nrog neeg ntiajteb ntag.

¹⁴Thaum twg kuv ua kom muaj huab roos saum nruab ntug, ces tus duab zaj ntawd yuav tshwm tuaj rau saum cov huab.

¹⁵Kuv yuav nco ntsoov tej lus uas kuv cog tseg rau nej thiab txhua yam tsiaj, mas kuv yuav tsis tso dej los nyab txhua yam uas muaj sia kom puastsuaj ib zaug ntxiv li lawm.

¹⁶Thaum tus duab zaj sawv tshwm saum cov huab, kuv pom tus duab zaj ntawd, kuv yuav nco txog tej lus uas kuv tau cog tseg mus ibtxhis rau nej thiab txhua yam uas muaj sia nyob hauv ntiajteb no lawm.

¹⁷Tus duab zaj no yog lub cim uas kuv coglus tseg rau txhua yam uas muaj sia nyob hauv ntiajteb.”

¹⁸Nau-es cov tub uas tawm hauv lub nkoj los yog: Xees, Has thiab Yafej. (Has yog Kana-as txiv.)

¹⁹Nau-es peb leeg tub no yog txhua haivneeg uas nyob hauv ntiajteb no cov yawgkoob.

²⁰Nau-es yog neeg ua liaj ua teb, nws yog thawj tug uas xub cog txiv hmab ntag.

²¹Thaum nws haus kua txiv hmab, ua rau nws qaug heev, thiab nws cia li hle ris tsho pw liabqab hauv tsevntaub.

²²Thaum Has uas yog Kana-as txiv, pom nws txiv pw liabqab li ntawd, nws txawm tawm mus hais qhia rau nws ob tug tijlaug.

²³Ces Xees thiab Yafej thiaj mus muab tau ib lub tsho ntev nthuav kiag rau nraum nkawd nraubqaum thiab muab khuam rau saum nkawd xubpwg. Nkawd thiaj kwv thaub qab mus rau hauv lub tsevntaub coj mus npog nkawd txiv, nkawd tig ntsejmuag rau ib cag vim nkawd tsis xav pom nkawd txiv liabqab li ntawd.

²⁴Thaum Nau-es zoo cawv tsim los Nau-es paub tej uas nws tus tub ntxawg ua rau nws,

²⁵Nau-es thiaj hais tias, “Kana-as raug foom tsis zoo lawm! Nws yuav ua nws ob tug tijlaug qhev.

²⁶Cia li ua tus TSWV uas yog Xees tus Vajtswv tsaug! Kana-as yuav ua Xees qhev mus li.

²⁷Thov kom Vajtswv ua rau Yafej cajces huamvam! Thov Vajtswv cia Yafej tej xeebntxwv nrog Xees haivneeg nyob ua ke. Kana-as yuav ua Yafej qhev.”

²⁸Tom qab uas dej nyab ntiajteb tas lawm, Nau-es tseem ua neej nyob tau peb puas tsib caug xyoo ntxiv,

²⁹thiab nws tuag rau thaum nws hnubnyoog muaj cuaj pua tsib caug xyoo.