Read Hmong Daw 2 Xamuyees 23 Bible Online

2 Xamuyees 23 - Hmong Daw bible

2 Xamuyees 23

¹Yexais tus tub Daviv yog tus uas Vajtswv tsa ua tus muaj hwjchim loj kawg nkaus, nws yog tus uas Yakhauj tus Vajtswv xaiv los ua vajntxwv, thiab nws yog tus uas sau cov nkauj uas zoo tshaj plaws rau cov Yixalayees hu. Tej lus no yog Daviv cov lus hais thaum kawg:

²Tus TSWV tus ntsujplig hais rau kuv; nws tej lus nyob ntawm kuv tus nplaig.

³Cov Yixalayees tus Vajtswv tau hais tseg lawm; tus uas tsomkwm cov Yixalayees hais li no rau kuv: “Tus vajntxwv uas kav ncaj ncees thiab kav los ntawm txojkev hwm Vajtswv,

⁴nws zoo ib yam li lub hnub ci thaum sawv ntxov uas tsis muaj huab li, yog lub hnub uas ua rau tej nroj tsuag ci ntsais tsias thaum los nag tas.”

⁵Vajtswv yuav foom koob hmoov ntau npaug rau kuv cov xeebntxwv, rau qhov nws tau coglus ruaj khov rau kuv mus ibtxhis, thiab lo lus cog tseg ntawd yuav tsis muab rhuav ib zaug li, yog lo lus cog tseg uas tsis txawj hloov. Tej ntawd yog tej uas kuv xav tau, qhov ntawd yuav yog kuv txojkev muaj yeej; thiab Vajtswv yuav muab tej ntawd rau kuv raws li nws coglus tseg.

⁶Tiamsis cov neeg tsis hwm Vajtswv, lawv zoo ib yam li tej pos uas muab sua povtseg; tsis muaj neeg xav muab tes kov li lawm.

⁷Nej yuav tsum muab cuabyeej hlau lossis hmuv hlau mus sua lawm xwb; lawv yuav raug hlawv kub hnyiab kom tas dulug.

⁸Cov neeg no yog Daviv cov tubrog uas nto moo tej npe: tus ib yog Yauses Npasenpes uas nyob hauv lub nroog Takhemoos ua tus thawjcoj ntawm “Peb Leeg”; nws muab nws tus hmuv nrog yim pua leej txivneej sib nkaug thiab nws muab lawv nkaug tuag tas rau hauv tshavrog.

⁹Tus ob uas nto moo ntawm peb leeg ntawd, yog Daudaus tus tub Ele-axas uas yog cuab Ahaus. Muaj ib hnub nws thiab Daviv twv nrog cov Filitees uas tabtom tuaj sib txoos ua ke rau ntawm tshavrog. Cov Yixalayees swb thim rov qab,

¹⁰tiamsis Ele-axas sawv nres nroos tua cov Filitees mus txog thaum nws tsaug npab thiab tsa tsis tau nws rab ntaj lawm. Hnub ntawd tus TSWV muaj yeej loj kawg li. Tom qab uas tej ntawd dhau lawm, cov Yixalayees mam li rov los rau hauv qhov chaw uas Ele-axas nyob, thiab los hle cov neeg uas Ele-axas tua tuag tej ris tsho hlau.

¹¹Tus peb uas nto moo ntawm peb leeg ntawd yog Akhees tus tub Samas uas nyob hauv lub nroog Halales. Cov Filitees tuaj txoos ua ke rau ntawm Lehis uas yog ib thaj teb taum mog. Cov Yixalayees khiav cov Filitees,

¹²tiamsis Samas sawv nres nroos ntawm nws lub chaw hauv thaj teb ntawd tiv thiab tua cov Filitees. Hnub ntawd tus TSWV muaj yeej loj kawg li.

¹³Thaum yuav txog lub caij sau qoobloo peb leeg ntawm “Peb Caug Leej” ntawd, txawm nqis mus rau nram lub qhov tsua Adulas, qhov chaw uas Daviv nyob, thaum ntawd cov Filitees tabtom tuaj tsuam yeej nyob rau hauv lub Hav Lefayees.

¹⁴Lub sijhawm ntawd, Daviv mus nyob saum roob thiab muaj ib pab tubrog Filitees kav hlo lub nroog Npelehees.

¹⁵Daviv nco tsev heev, nws thiaj seev hais tias, “Yuav ua li cas kuv thiaj txib tau ib tug mus ce cov dej hauv lub qhovtshij uas nyob ntawm roojvag nroog Npelehees los rau kuv haus!”

¹⁶Ces peb tug tubrog uas nto moo ntawd, thiaj li khiav ceev heev mus phua plhawv cov Filitees lub yeej, mus ce cov dej hauv lub qhovtshij uas nyob ntawm lub roojvag nroog Npelehees thiab nqa los rau Daviv. Tiamsis Daviv tsis kam haus cov dej ntawd; nws muab hliv fij rau tus TSWV,

¹⁷Daviv hais tias, “Thov kuv tus Vajtswv txwv tsis txhob pub kuv haus cov dej no! Puas tsimnyog kuv haus cov ntshav uas yog cov neeg no txojsia? Vim lawv muab lawv txojsia mus pauv thiaj nqa tau cov dej no los.” Nws thiaj tsis kam haus cov dej ntawd. Tej no yog peb tug tubrog uas muaj siab tawv ntawd mus nqa tau los.

¹⁸Anpisais uas yog Yau-am tus kwv (nkawd niam hu ua Xeluyas), ua tus thawj ntawm “Peb Caug Leej uas nto moo ntawd.” Nws siv nws rab ntaj tua peb puas leej txivneej thiab muab lawv tua tuag tas huv tibsi, nws thiaj yog tus uas nto moo ntawm “Peb Caug Leej” ntawd.

¹⁹Nws yog tus uas nto moo tshaj ntawm “Peb Caug Leej” ntawd, thiab nws tau ua lawv tus thawjcoj, tiamsis nws tseem nto moo tsis npaum li “Peb Leeg” ntawd thiab.

²⁰Yehauyadas tus tub Npenayas uas nyob hauv lub nroog Kaxees tuaj, nws yog ib tug uas nto moo heev thiab; nws muaj siab tawv ua tau ntau yam zoo, nws tua ob tug tubrog Mau-am uas ua tau kawg nkaus tuag huv tibsi lawm. Muaj ib hnub uas los daus hlob heev, nws tseem nqis mus tua tau ib tug tsov ntxhuav hauv qhov av los thiab.

²¹Thiab nws tseem tua ib tug tubrog Iziv uas loj heev tuag. Tus neeg Iziv ntawd nqa ib rab hmuv, tiamsis Npenayas muab qws ntaus tus neeg Iziv ntawd, thiab txeeb taus nws rab hmuv ntawm nws tes los, thiab muab tus tubrog Iziv ntawd nkaug tuag lawm.

²²Tej ntawd twb yog tes haujlwm uas Npenayas ua, nws yog ib tug ntawm “Peb Caug Leeg” ntawd.

²³Nws yog ib tu uas nto moo heev ntawm “Peb Caug leej,” tiamsis nws tseem tsis nto moo npaum li “Peb Leeg” ntawd thiab. Daviv thiaj tsa nws ua tus saib cov tubrog uas zov Daviv.

²⁴Xam tagnrho “Peb Caug Leeg” ntawd muaj npe raws li nram no: 1 Yau-am tus kwv Axahees Daudaus tus tub Ehanas uas nyob — hauv Npelehees Samas thiab Elikas uas nyob hauv — Halaus tuaj Helexas uas yog neeg Peletes Ikes tus tub Ilas uas nyob hauv — Tekau-as tuaj Anpi-exes uas nyob hauv Anathaus — tuaj Menpunais uas yog neeg Husas Zalemoos uas yog neeg Ahaus Mahalais uas yog neeg Netaufas Npa-anas tus tub Heles uas nyob hauv — Netaufas tuaj Linpais tus tub Ithais uas nyob hauv Nkenpe-as xeev Npeenyamees tuaj Npenayas uas nyob hauv Pilathoos Hidais uas nyob hauv lub hav ze rau — ntawm Nka-as tuaj Anpi-anpoos uas yog neeg Alanpas Amaves uas nyob hauv Npahulees — tuaj, Eliyanpas uas nyob hauv Sa-anpoos — tuaj Yasees cov tub Yaunathas Samas uas yog neeg Halales Salas tus tub Ahiyas uas nyob hauv — Halales tuaj Ahanpais tus tub Elifeles uas nyob — hauv Ma(...)