Read Hmong Daw 1 Vajntxwv 4 Bible Online

1 Vajntxwv 4 - Hmong Daw bible

1 Vajntxwv 4

¹Xalumoos ua vajntxwv kav lub tebchaws Yixalayees,

²thiab cov no yog nws cov nomtswv: Tus povthawj yog Xadaus uas yog Axaliyas tus tub;

³Ob tug teev ntawv yog Sisas ob tug tub Elihaules thiab Ahiyas; Tus saib tej ntaub ntawv yog Ahilus tus tub Yehausafas;

⁴Tus thawj tubrog yog Yehauyadas tus tub Npenayas; Ob tug povthawj yog Xadaus thiab Anpiyathas;

⁵Tus thawj ntawm cov tswvxeev yog Nathas tus tub Axaliyas; Vajntxwv tus tuavxam yog Nathas tus tub Xanpus uas yog tus povthawj;

⁶Tus uas saib cov tubtxib hauv lub loog yog Ahisas; Tus uas saib cov ua haujlwm yog Anpidas tus tub Adaunilas.

⁷Xalumoos tsa kaum ob leeg txivneej los ua tswvxeev kav cov Yixalayees txhua lub xeev. Lawv yog cov coj zaub mov hauv tej cheebtsam tuaj rau vajntxwv thiab nws tsevneeg noj. Ib tug tswvxeev coj zaub mov tuaj rau vajntxwv tsevneeg ib xyoos twb ib hlis.

⁸Ntawm no mus yog kaum ob tug tswvxeev ntawd cov npe thiab tej cheebtsam uas lawv saib: Npehus: saib sablaj roob Efalayees

⁹Npedekes: saib lub nroog Makaxes, Sa-anpimes Npethes Semes, Eloos thiab Npethes Hanas

¹⁰Npehexes saib lub nroog Alunpus, Xukaus thiab tagnrho cheebtsam Hefeles;

¹¹Npenanpinadas (tus uas yuav Xalumoos tus ntxhais Tafas) saib tagnrho cheebtsam Dules;

¹²Ahilus tus tub Npa-anas yog tus saib lub nroog Ta-anas, Menkidaus thiab tagnrho cheebtsam uas nyob ze Npethes Se-as, thiab ze rau ntawm lub nroog Xalethas sab qabteb ntawm lub nroog Yexelees, mus txog ntua rau tim lub nroog Anpees Mehaulas thiab tim lub nroog Yaumees;

¹³Npenkenpes saib lub nroog Lamaus-nkile-as thiab cov zos uas nyob hauv cheebtsam Nkile-as uas yog Manaxes tus tub Yailes tus xeebntxwv tug, thiab cheebtsam Ankaunpes hauv lub xeev Npasas, tagnrho rau caum lub nroog loj uas muaj ntsa yeej thaiv khov kho thiab muaj tej nqaj roojvag tooj;

¹⁴Idaus tus tub Ahinadas saib cheebtsam Mahana-ees;

¹⁵Ahima-as (tus uas yuav Xalumoos tus txhais Npasemas) saib cheebtsam Nafetalis;

¹⁶Husais tus tub Npa-anas saib cheebtsam Aseles thiab lub nroog Npe-alaus;

¹⁷Palu-as tus tub Yehausafas saib cheebtsam uas cov Ixakhas nyob;

¹⁸Elas tus tub Sime-is saib cheebtsam uas cov Npeenyamees nyob;

¹⁹Ulis tus tub Nkenpeles saib cheebtsam Nkili-as uas cov Amaules tus Vajntxwv Xihoos kav thiab cheebtsam Npasas uas Vajntxwv Aunkas kav. Dua li kaum ob tug tswvxeev no lawm, tseem muaj ib tug thawj uas saib tagnrho lub tebchaws thiab.

²⁰Cov Yudas thiab cov Yixalayees huamvam coob ib yam li tej suabzeb nram ntug hiavtxwv; lawv muaj noj muaj haus thiab muaj kev zoo siab kawg li.

²¹Xalumoos kav tagnrho cov tebchaws uas nyob ibncig ze ntawd, txij ntua ntawm tus dej Efalates mus txog rau tim tebchaws Filitees thiab mus txog rau nram Iziv tus ciamteb. Lawv puavleej them se rau Xalumoos thiab ua nws qhev mus tas nws tiam neej ntawd li.

²²Tej zaub mov uas Xalumoos xav tau txhua hnub yog ib puas tsib caug tawb hmoov nplej thiab peb puas tawb zaub;

²³kaum tus nyuj rog rog uas hwv hauv nkuaj, nees nkaum tus nyuj uas tso rau hauv tshav zaub thiab ib puas tus yaj. Dua li ntawd, tseem muaj maum muaslwj, kauv, phaw muaslwj thiab qaibsis.

²⁴Xalumoos kav tagnrho cov tebchaws uas nyob sab hnubpoob txij ntua ntawm tus dej Efalates mus txog rau ntawm lub nroog Nkaxas. Tagnrho cov vajntxwv uas nyob sab hnubpoob ntawm tus dej Efalates puavleej coj khoom tuaj rau Xalumoos, thiab nws mus cog kev phoojywg nrog tej tebchaws nruab ze tagnrho.

²⁵Txij li Xalumoos tiam, cov Yudas thiab cov Yixalayees ua neej nyob kaj siab lug, txhua yim nyias thiaj cog muaj nyias txiv hmab thiab txiv ncuavpias.

²⁶Xalumoos muaj plaub caug txhiab lub nkuaj nees kaw nws cov nees luag tsheb thiab muaj kaum ob txhiab tus tubrog caij nees.

²⁷Xalumoos kaum ob tug tswvxeev, ib tug twg raug ua haujlwm rau nws ib lub hlis, yog muab tej zaub mov uas Vajntxwv Xalumoos xav tau coj tuaj rau nws, kom cov neeg uas nyob hauv lub loog tau noj; lawv muab txhua yam uas Xalumoos xav tau tuaj rau nws.

²⁸Thiab txhua tus tswvxeev puavleej coj lawv tej nplej thiab quavnyab npleg pub nees tuaj rau ntawm qhov chaw uas cia tej ntawd rau cov nees luag tsheb thiab cov nees uas siv ua lwm yam haujlwm tau noj.

²⁹Vajtswv pub rau Xalumoos muaj tswvyim thiab kev txawj ntse tob heev ntsuas tsis tau thiab ntau ib yam li tej suabzeb nram ntug hiavtxwv.

³⁰Xalumoos ntse tshaj cov tub txawg tub ntse uas nyob sab hnubtuaj lossis tej tub txawg tub ntse uas nyob nram tebchaws Iziv lawm thiab.

³¹Nws ntse tshaj lwm tus txivneej huv tibsi: ntse tshaj Ethas uas yog neeg Exelas, Hemas, Kakaus thiab Dadas uas yog Mahaules cov tub, thiab Xalumoos lub koob meej nrov ncha moo lug mus thoob plaws tej tebchaws uas nyob ibncig ntawd.

³²Nws sau tau peb txhiab zaj pajlug thiab ib txhiab tsib zaj nkauj.

³³Nws hais txog tej ntoo thiab tej nroj tsuag, tej ntoo ciab pem roob Lenpanoos mus rau tej nroj hixauv uas tuaj ntawm tej ntsa yeej; nws hais txog tej tsiaj, tej noog, tej kab thiab tej ntses huv tibsi.

³⁴Tagnrho tej vajntxwv uas nyob hauv ntiajteb no puavleej hnov Xalumoos tej tswvyim thiab xa lawv cov neeg tuaj mloog Xalumoos piav nws tej kev txawj ntse.