Read Hmong Daw 2 Vajntxwv 15 Bible Online

2 Vajntxwv 15 - Hmong Daw bible

2 Vajntxwv 15

¹Thaum Yelaunpau-as uas vajntxwv kav lub tebchaws Yixalayees tau nees nkaum xya xyoo lawm, Amaxiyas tus tub Uxiyas mam li ua vajtswv kav lub tebchaws Yudas

²thaum nws hnubnyoog muaj kaum rau xyoo, thiab nws nyob hauv lub nroog Yeluxalees kav tau tsib caug ob xyoo. Nws niam hu ua Yekauliyas uas nyob hauv lub nroog Yeluxalees.

³Uxiyas ua lub neeg raws li tus TSWV siab nyiam ib yam li nws txiv Amaxiyas.

⁴Tiamsis nws tsis tau muab tej chaw teev dab rhuav povtseg, tej neeg thiaj pheej mus tua tsiaj fij thiab hlawv hmoov tshuaj tsw qab rau ntawm tej chaw teev dab ntawd.

⁵Tus TSWV ua rau Uxiyas mob ruas mus tas nws simneej li. Nws nyob nws ib lub tsev rau ib qho, nws tso txhua yam haujlwm tseg, thiab nws tus tub Yauthas ua tus tswjhwm lub tebchaws.

⁶Dua li lwm yam uas Uxiyas ua puavleej muab sau cia rau hauv Phau Ntawv Keebkwm uas teev cov Yudas cov Vajntxwv lub neej lawm.

⁷Uxiyas tuag thiab luag coj nws mus faus rau ntawm cov vajntxwv lub toj ntxas hauv Daviv lub Nroog, thiab nws tus tub Yauthas ua vajntxwv hloov nws chaw.

⁸Thaum Uxiyas ua vajntxwv kav lub tebchaws Yudas tau peb caug yim xyoo lawm, Yelaunpau-as tus tub Xakhaliyas mam li ua vajntxwv kav lub tebchaws Yixalayees, thiab nws nyob hauv lub nroog Xamalis kav tau rau hli.

⁹Xakhaliyas ua txhaum rau tus TSWV ib yam li nws cov yawgkoob. Nws ua phem ua qias ib yam li Vajntxwv Yelaunpau-as uas yog Nenpas tus tub uas coj cov Yixalayees mus ua txhaum.

¹⁰Yanpes tus tub Salumes thiaj ntxeev siab rau Vajntxwv Xakhaliyas thiab muab nws tua tuag rau hauv lub nroog Inpele-as, thiab Salumes txawm ua vajntxwv hloov Xakhaliyas chaw.

¹¹Dua li lwm yam uas Xakhaliyas ua puavleej muab sau cia rau hauv Phau Ntawv Keebkwm uas teev cov Yixalayees cov Vajntxwv lub neej lawm.

¹²Ua li ntawd thiaj tiav raws li tus TSWV tau hais rau Vajntxwv Yehus lawm hais tias, “Koj cov xeebntxwv yuav tau ua vajntxwv kav cov Yixalayees mus txog plaub tiam.”

¹³Thaum Uxiyas ua vajntxwv kav lub tebchaws Yudas tau peb caug cuaj xyoo lawm, Yanpes tus tub Salumes mam li ua vajntxwv kav lub tebchaws Yixalayees, thiab nws nyob hauv lub nroog Xamalis kav tau ib hlis.

¹⁴Nkadis tus tub Menahees tuaj nram lub nroog Tilexas tuaj rau hauv lub nroog Xamalis thiab muab Salumes tua, thiab nws ua vajntxwv hloov Salumes chaw.

¹⁵Dua li lwm yam uas Salumes ua thiab qhov uas nws ntxeev siab ua phem puavleej muab sau cia rau hauv Phau Ntawv Keebkwm uas teev cov Yixalayees cov Vajntxwv lub neej lawm.

¹⁶Thaum Menahees tuaj hauv lub nroog Tilexas tuaj, nws tua cov neeg hauv lub nroog Tapuas, thiab cov neeg uas nyob cheebtsam ibncig lub nroog ntawd puastsuaj tas, rau qhov cov neeg hauv lub nroog tsis kam zwm rau nws. Nws tseem muab cov pojniam uas tabtom suab menyuam phais plab huv tibsi.

¹⁷Thaum Uxiyas ua vajntxwv kav lub tebchaws Yudas tau peb caug cuaj xyoo lawm, Nkadis tus tub Menahees mam li ua vajntxwv kav lub tebchaws Yixalayees, thiab nws nyob hauv lub nroog Xamalis kav tau kaum xyoo.

¹⁸Menahees ua txhaum rau tus TSWV, nws ua phem ua qias ib yam li Vajntxwv Yelaunpau-as uas yog Nenpas tus tub uas coj cov Yixalayees mus ua txhaum tas nws simneej.

¹⁹Tilas Pilexes uas yog tus vajntxwv kav lub tebchaws Axilias tau tuaj tua cov Yixalayees, Menahees muab tau peb caug yim tas nyiaj los thov Tinkelas Pilexes pab Menahees kom muaj cuabkav tswj tau lub tebchaws nyob ruaj khov.

²⁰Menahees tau tej nyiaj ntawd los ntawm cov Yixalayees uas npluanuj, nws yuam kom lawv ib tug muab tsib caug daim nyiaj rau nws coj mus rau Tinkelas Pilexes; yog li ntawd, Tilas Pilexes thiaj rov qab mus rau pem nws lub tebchaws lawm.

²¹Dua li lwm yam uas Menahees ua puavleej muab sau cia rau hauv Phau Ntawv Keebkwm uas teev cov Yixalayees cov Vajntxwv lub neej lawm.

²²Menahees tuag thiab luag coj nws mus faus, thiab nws tus tub Pekahiyas ua vajntxwv hloov nws chaw.

²³Thaum Uxiyas ua vajntxwv kav lub tebchaws Yudas tau tsib caug xyoo lawm, Menahees tus tub Pekahiyas mam li ua vajntxwv kav lub tebchaws Yixalayees, thiab nws nyob hauv lub nroog Xamalis kav tau ob xyoos.

²⁴Pekahiyas ua txhaum rau tus TSWV, nws ua phem ua qias ib yam li Vajntxwv Yelaunpau-as uas yog Nenpas tus tub uas coj cov Yixalayees mus ua txhaum.

²⁵Pekahiyas tus thawj tubrog Pekas uas yog Lemaliyas tus tub txawm ntxeev siab rau nws thiab coj tau tsib caug leej tubrog hauv lub nroog Nkile-as tuaj muab Pekahiyas tua tuag rau hauv chav fajxwm ntawm lub loog hauv lub nroog Xamalis, ces Pekas txawm ua vajntxwv hloov Pekahiyas chaw.

²⁶Dua li lwm yam uas Pekahiyas ua, puavleej muab sau cia rau hauv Phau Ntawv Keebkwm uas teev cov Yixalayees cov Vajntxwv lub neej lawm.

²⁷Thaum Uxiyas ua vajntxwv kav lub tebchaws Yudas tau tsib caug ob xyoos lawm, Lemaliyas tus tub Pekas mam li ua vajntxwv kav lub tebchaws Yixalayees, thiab nws nyob hauv lub nroog Xamalis kav tau nees nkaum xyoo.

²⁸Pekas ua txhaum rau tus TSWV, nws ua phem ua qias ib yam li Vajntxwv Yelaunpau-as uas yog Nenpas tus tub uas coj cov Yixalayees mus ua txhaum.

²⁹Ntu uas Pekas ua vajntxwv kav lub tebchaws, Vajntxwv Tinkelas Pilexes uas kav lub tebchaws Axilias tuaj txeeb tau lub nroog Iyoos, Anpees Npethes Ma-akas, Yanau-as, Kedes, Haxaules thiab cheebtsam Nkile-as, Kalilais, thiab Nathalis thiab ntes cov neeg coj mus rau pem tebchaws Axilias lawm.

³⁰Thaum Uxiyas tus tub Yauthas ua vajntxwv kav lub tebchaws Yudas tau nees nkaum xyoo, Elas tus tub Hauseyas ntxeev siab muab Vajntxwv Pekas tua tuag, thiab nws ua vajntxwv hloov Pekas chaw.

³¹Dua li lwm yam uas Pekas ua puavleej muab sau cia rau hauv Phau Ntawv Keebkwm uas teev cov Yixalayees cov Vajntxwv lub neej lawm.

³²Thaum Lemaliyas tus tub Pekas ua vajntxwv kav lub tebchaws Yixalayees tau ob xyoo lawm, Uxiyas tus tub Yauthas mam li ua vajntxwv kav lub tebchaws Yudas

³³thaum nws hnubnyoog muaj nees nkaum tsib xyoos, thiab nws nyob hauv lub nroog Yeluxalees kav tau kaum rau xyoo. Nws niam hu ua Yelusas uas yog Xadaus tus ntxhais.

³⁴Yauthas ua lub neej raws li tus TSWV siab nyiam ib yam li nws txiv Uxiyas ua.

³⁵Tiamsis nws tsis muab tej chaw teev dab rhuav povtseg, tej neeg thiaj pheej mus tua tsiaj fij thiab hlawv hmoov tshuaj tsw qab rau ntawm tej chaw teev dab ntawd. Yauthas yog tus uas ua lub Roojvag Qaumteb ntawm lub Tuamtsev.

³⁶Dua li lwm yam uas Yauthas ua puavleej muab sau cia rau hauv Phau Ntawv Keebkwm uas teev cov Yudas cov Vajntxwv lub neej lawm.

³⁷Ntu uas Yauthas ua vajntxwv kav tebchaws, yog thawj zaug uas tus TSWV cia Vajntxwv Lexees uas kav lub tebchaws Xilias thiab Vajntxwv Pekas uas kav lub tebchaws Yixalayees tuaj tua cov Yudas.

³⁸Yauthas tuag thiab luag coj nws mus faus rau ntawm cov vajntxwv lub toj ntxas hauv Daviv lub nroog, thiab nws tus tub Ahas ua vajntxwv hloov nws chaw.