Read Hmong Daw 1 Xwmtxheej Vajntxwv 12 Bible Online

1 Xwmtxheej Vajntxwv 12 - Hmong Daw bible

1 Xwmtxheej Vajntxwv 12

¹Thaum Daviv tseem nyob hauv Xikelas, ntawm qhov chaw uas nws khiav mus nkaum Vajntxwv Xa-ules, muaj ntau tus tubrog uas txawj tua rog heev thiaj tuaj koom tes nrog nws nyob qhov ntawd.

²Lawv puavleej yog xeem Npeenyamees uas yog Xa-ules cov kwvtij. Lawv txawj tua hneevnti thiab txawj ntaus zes hlua kawg li, tsis hais sab tes xis lossis sab teslaug txawj ib yam nkaus.

³Lawv puavleej yog cov uas nyob qab tswjhwm ntawm Ahi-exes thiab Yau-ases uas yog Sema-as ob tug tub uas nyob hauv Nkinpe-as tuaj. Cov no yog cov tubrog: Yexiyees thiab Peletes uas yog Axemaves ob tug tub Npelakas thiab Yehus uas nyob hauv lub nroog Anathaus tuaj Isemayas uas nyob hauv Nkinpe-oos tuaj, yog ib tug tubrog uas nto moo heev thiab yog ib tug thawjcoj ntawm “Peb Caug Leej” Yelemis, Yahaxiyees, Yauhanas thiab Yauxanpas uas nyob hauv Nkedelas tuaj Eluxais, Yelimaus, Npe-aliyas, Semaliyas thiab Sefatiyas uas nyob hauv Halifas tuaj Ekanas, Isesiyas, Axalees, Yau-exes thiab Yasaunpe-as uas yog xeem Kaulas Yau-elas thiab Xenpadiyas, Yelauhas ob tug tub uas nyob hauv Nkedaus tuaj.

⁸Cov no yog cov npe tubrog uas txawj tua rog thiab nto moo heev; lawv tuaj cuag Daviv thiab ua nws cov tubrog rau hauv tiaj suabpuam ntawm qhov chaw uas Daviv mus nkaum; lawv nqa rawv daim thaiv hniav ntaj thiab nqa rawv hmuv. Lawv tej ntsejmuag zoo li tsov ntxhuav, thiab khiav ceev npaum nkaus li sai khiav saum tej ncov roob.

⁹Exelas yog tus thawjcoj, Aunpadiyas yog tus ob, Eli-as yog tus peb,

¹⁰Misemanas yog tus plaub, Yelemis yog tus tsib,

¹¹Atais yog tus rau, Eliyees yog tus xya,

¹²Yauhanas yog tus yim, Elexanpas yog tus cuaj,

¹³Yelemis yog tus kaum, Manpanais yog tus kaum ib.

¹⁴Tagnrho xeem Khas no muaj ibtxhia yog thawj tubrog qib siab saib ib txhiab leej, muaj ibtxhia yog cov thawj tubrog qib qis saib ib puas leej.

¹⁵Muaj ib xyoos thaum lub ib hlis ntuj uas tus dej Yauladees tabtom huam puv ntug nkaus, cov tubrog no thiaj hla mus rau sab tid thiab muab tej neeg faib mus nyob thoob plaws hauv tej hav ntawd, tsis hais nyob sab hnubtuaj thiab hnubpoob.

¹⁶Muaj ib pab txivneej uas yog xeem Npeenyamees thiab Yudas tuaj cuag Daviv rau ntawm lub chaw uas nws nkaum.

¹⁷Daviv tawm mus ntsib lawv thiab hais rau lawv hais tias, “Yog nej tuaj ua phoojywg rau kuv thiab pab kuv, kuv txaus siab tos txais nej. Tiamsis yog nej ntxeev siab thiab ua yeebncuab rau kuv, txawm yog kuv tsis ua rau nej raug mob dabtsi los thov kom peb cov yawgkoob tus Vajtswv pom thiab rau txim rau nej.”

¹⁸Ces Vajtswv tus ntsujplig txawm tswj kiag lawv cov ntawd ib tug lub siab, tus ntawd yog Amaxais uas tom qab no nws tau los ua tus thawj tubrog ntawm “Peb Caug Leej,” thiab nws tsa hlo suab hu hais tias: “Daviv uas yog Yexais tus tub, peb yog cov tuaj koj tog ntag! Vajtswv tuaj koj tog, thov kom koj thiab cov uas pab koj muaj yeej lauj!” Daviv Zoo siab hlo tos txais lawv thiab muab lawv tsa ua cov thawj ntawm nws cov tubrog.

¹⁹Xeem Manaxes muaj ibtxhia tubrog mus tuaj Daviv tog thaum Daviv nrog cov Filitees mus tua Vajntxwv Xa-ules. Tiamsis tsis yog nws mus pab cov Filitees, vim li ntawd lawv cov vajntxwv thiaj ntshai nyob tsam Daviv ntxeev siab rau lawv, coj lawv tej taubhau mus cob rau Xa-ules uas yog nws tus vajntxwv. Yog li ntawd, lawv thiaj xa Daviv rov qab mus rau tom Xikelas lawm.

²⁰Cov no yog cov tubrog Manaxes uas mus cuag Daviv thiab tuaj nws tog, thaum nws rov qab los lawm: Adinas, Yauxanpas, Yedi-ales, Mikhayees, Yauxanpas, Elihus thiab Xilethais. Tagnrho cov Manaxes cov thawj tubrog no mas nyias muaj nyias pawg txhiab tubrog.

²¹Lawv tuaj ua Daviv cov tubrog pab nws tua cov rog tubsab, vim lawv yog cov tubrog uas muaj siab tawv heev, thiab lawv puavleej yog cov thawj tubrog.

²²Txhua hnub yeej muaj neeg tshiab tuaj ua tubrog pab Daviv mus txog thaum uas muaj tubrog coob heev ib yam li Vajtswv cov tubrog lawm.

²³Cov no yog tej pab tubrog coob heev uas tuaj cuag Daviv rau hauv lub nroog Henploos, thiab muab Xa-ules lub tebchaws los cob rau Daviv raws li tus TSWV tau coglus tseg lawm.

²⁴Cov tubrog Yudas uas muaj daim thaiv hniav ntaj thiab hmuv muaj rau txhiab yim puas leej.

²⁵Cov tubrog Xime-oos uas siab tawv heev muaj xya txhiab ib puas leej.

²⁶Cov Levis muaj plaub txhiab rau puas leej.

²⁷Yehauyadas uas yog tus thawj ntawm Aloos tsevneeg coj peb txhiab xya pua leej tubrog nrog nws.

²⁸Xadaus yog ib tug tub hluas uas siab tawv heev; nws coj nees nkaum ob tug thawj tubrog uas yog nws cov kwvtij nrog nws.

²⁹Cov Npeenyamees uas yog Xa-ules cov kwvtij muaj peb txhiab leej tubrog; cov no feem coob puavleej yog cov uas ibtxwm zov Xa-ules tsevneeg los lawm xwb.

³⁰Cov Efalayees muaj nees nkaum txhiab yim pua leej; lawv puavleej yog cov tubrog uas siab tawv thiab yog cov txivneej uas nto moo heev ntawm lawv cov yawgkoob tsevneeg los lawm xwb.

³¹Ib nrab xeem Manaxes muaj kaum yim txhiab leej, lawv puavleej yog cov uas muaj npe tuaj tsa Daviv ua vajntxwv.

³²Cov Ixakhas uas paub saib caij saib nyoog, paub txog tej yam uas cov Yixalayees yuav tsum tau ua, muaj ob puas leej thawjcoj, thiab tagnrho lawv cov kwvtij puavleej nyob qab tswjhwm ntawm lawv.

³³Cov Xenpuloos muaj tsib caug txhiab leej tubrog puavleej yog cov uas txawj tua rog thiab paub siv tej cuabyeej ua rog tuaj pab Daviv ntawm lub siab ncaj ncees.

³⁴Cov Nathalis muaj ib txhiab leej yog cov thawj tubrog thiab muaj peb caug xya txhiab leej tubrog uas muaj daim thaiv hniav ntaj thiab hmuv huv tibsi.

³⁵Cov Das muaj nees nkaum yim txhiab rau puas leej tubrog uas yog cov kawm tiav kev tua rog los lawm.

³⁶Cov Aseles muaj plaub caug txhiab leej tubrog uas npaj nroos mus sib tua.

³⁷Cov Lunpees, cov Khas thiab ib nrab xeem Manaxes uas nyob ntawm tus dej Yauladees sab hnubtuaj muaj ib puas nees nkaum txhiab leej tubrog thiab kawm siv tej cuabyeej tua rog tiav huv tibsi lawm.

³⁸Tagnrho cov tubrog uas muaj siab tawv no tau mus rau hauv lub nroog Henploos thiab tsa Daviv ua vajntxwv kav tebchaws Yixalayees. Thiab tagnrho cov Yixalayees los puavleej koom siab nrog huv tibsi.

³⁹Lawv thiaj nrog Daviv nyob hauv lub nroog Henploos tau peb hnub, lawv noj tej zaub mov thiab haus tej dej uas yog lawv cov phoojywg pem tej roob mojsab nqa tuaj rau lawv noj.

⁴⁰Xeem Ixakhas, Xenpuloos thiab xeem Nathalis uas tuaj pem qaumteb tuaj, lawv yeej npaj zaub mov uas yog tej hmoov nplej, txiv ncuavpias, txiv hmab qhuav, cawv txiv hmab thiab roj txiv ntoo, npaj tiav log rau lawv tej neesluav, ntxhuav thiab nyuj thauj tuaj. Thiab lawv tseem cab nyuj thiab yaj tuaj tua ua zaub noj huv tibsi. Tagnrho tej no puavleej yog cov neeg uas nyob hauv lub tebchaws Yixalayees txaus siab muab xwb.