Read Hmong Daw 1 Xwmtxheej Vajntxwv 24 Bible Online

1 Xwmtxheej Vajntxwv 24 - Hmong Daw bible

1 Xwmtxheej Vajntxwv 24

¹Aloos cov xeebntxwv yog muaj raws li nram no. Aloos muaj plaub tug tub: Nadas, Anpihus, Ele-axas thiab Ithamas.

²Nadas thiab Anpihus xub tuag ua ntej dua nkawd txiv, thiab nkawd tsis tau muaj menyuam li. Yog li ntawd, nkawd ob tug kwv uas yog Ele-axas thiab Ithamas thiaj tau los ua povthawj.

³Vim muaj Xadaus uas yog Ele-axas tus xeebntxwv thiab muaj Ahimelej uas yog Ithamas tus xeebntxwv pab Daviv, nws thiaj sau tau Aloos cov xeebntxwv los ua tej pab raws li lawv tej luag haujlwm.

⁴Vim cov txivneej uas yog Eli-axas cov xeebntxwv ua thawjcoj coob dua Ithamas cov xeebntxwv, lawv thiaj muab Ele-axas cov xeebntxwv faib ua kaum rau pab, thiab muab Ithamas cov xeebntxwv faib ua yim pab.

⁵Ele-axas thiab Ithamas cov xeebntxwv uas ua thawjcoj hauv lub Tuamtsev thiab coj sab ntsujplig, lawv rho ntawv saib tau tes haujlwm twg ua.

⁶Ele-axas thiab Ithamas cov xeebntxwv tuaj rho ntawv ib tug dhau rau ib tug. Lawv tuaj sau npe rau ntawm tus teev ntawv uas yog Nethanees tus tub Semayas uas yog ib tug Levis. Muaj vajntxwv thiab nws cov nomtswv, tus povthawj Xadaus, Ahimelej tus tub Anpiyathas, cov thawjcoj ntawm cov povthawj thiab cov Levis cajces ua timkhawv.

⁷Rho ntawv thawj zaug tau rau Yehauyalis, rho zaum ob tau rau Yedayas,

⁸zaum peb tau rau Halees, zaum plaub tau rau Xe-aulimes,

⁹zaum tsib tau rau Makhiyas, zaum rau tau rau Miyamees,

¹⁰zaum xya tau rau Hakauxes, zaum yim tau rau Anpiyas,

¹¹zaum cuaj tau rau Yesuas, zaum kaum tau rau Sekaniyas,

¹²zaum kaum ib tau rau Eli-asis, zaum kaum ob tau rau Yakees,

¹³zaum kaum peb tau rau Hupas, zaum kaum plaub tau rau Yesenpe-as,

¹⁴zaum kaum tsib tau rau Npilenkas, zaum kaum rau tau rau Imeles,

¹⁵zaum kaum xya tau rau Hexiles, zaum kaum yim tau rau Hapixes,

¹⁶zaum kaum cuaj tau rau Pethahiyas, zaum nees nkaum tau rau Yehekees,

¹⁷zaum nees nkaum ib tau rau Yakhees, zaum nees nkaum ob tau rau Nkamules,

¹⁸zaum nees nkaum peb tau rau Delayas thiab zaum nees nkaum plaub tau rau Ma-axias.

¹⁹Cov neeg no nyias muaj nyias tes haujlwm ua hauv tus TSWV lub Tuamtsev raws li lawv yawgkoob Aloos twb muab cob rau lawv thiab raws li tus TSWV uas yog cov Yixalayees tus Vajtswv tau samhwm tseg rau nws lawm.

²⁰Levis cov xeebntxwv lwm pab muaj raws li no: Yedeyas, yog Amelas ib tug xeebntxwv uas yog Senpuyees cajces;

²¹Isiyas yog tus thawjcoj, nws yog Lehanpiyas tus xeebntxwv;

²²Yahaj yog Ixehas ib tug xeebntxwv uas yog Selaumis cajces;

²³Yeliyas, Amaliyas, Yehaxiyees thiab Yekamees yog Henploos cov tub raws li lawv tej hnubnyoog;

²⁴Samiles yog Uxiyees ib tug xeebntxwv uas yog Mikhas cajces;

²⁵Xakhaliyas yog Uxiyees ib tug xeebntxwv uas yog Mikhas tus kwv Isiyas cajces;

²⁶Mahelis, Musis thiab Yaxiyas yog Melalis cov xeebntxwv.

²⁷Yaxiyas muaj peb tug tub: Sauhas, Xakules thiab Inpelis.

²⁸Mahelis tus tub Ele-axas tsis muaj tub li;

²⁹tiamsis Mahelis tus tub Kises muaj ib tug tub hu ua Yelamees.

³⁰Musis muaj peb tug tub: Mahelis, Edeles thiab Yelemaus. Cov no puavleej yog Levis cajces raws li lawv cov yawgkoob.

³¹Txhua tus thawj ntawm txhua tsevneeg thiab ntawm nws tus kwv ntxawg puavleej tau rho ntawv ib yam nkaus li lawv cov kwvtij uas yog Aloos cov xeebntxwv tabmeeg Vajntxwv Daviv, Xadaus, Ahimelej thiab txhua tus thawjcoj ntawm cov povthawj thiab cov Levis.