Read Hmong Daw 2 Xwmtxheej Vajntxwv 29 Bible Online

2 Xwmtxheej Vajntxwv 29 - Hmong Daw bible

2 Xwmtxheej Vajntxwv 29

¹Thaum Hexekiyas ua vajntxwv kav lub tebchaws Yudas nws hnubnyoog muaj nees nkaum tsib xyoos, thiab nws nyob hauv lub nroog Yeluxalees kav tau nees nkaum cuaj xyoos. Nws niam hu ua Anpiyas thiab yog Xakhaliyas tus ntxhais.

²Hexekiyas ua lub neej raws li tus TSWV lub siab nyiam, ib yam li nws yawgkoob uas yog Vajntxwv Daviv.

³Thawj xyoo uas Hexekiyas ua vajntxwv, thaum lub ib hlis ntuj, nws mus qhib lub Tuamtsev tej roojvag thiab rov kho dua tshiab.

⁴Nws hu cov povthawj thiab cov Levis tuaj sib sau rau hauv lub tshavpuam ntawm lub Tuamtsev sab hnub tuaj,

⁵thiab nws hais rau lawv tias, “Nej cov Levis cia li ua kevcai ntxuav kom nej huv thiab ua kevcai ntxuav tus TSWV uas yog nej cov yawgkoob tus Vajtswv lub Tuamtsev kom dawbhuv, thiab nej cia li muab txhua yam uas ua rau lub Tuamtsev tsis huv tshem mus povtseg huv tibsi.

⁶Peb cov yawgkoob tsis muab siab npuab tus TSWV uas yog peb tus Vajtswv thiab lawv ua phem ua qias tabmeeg nws. Lawv tso nws tseg thiab tig nraubqaum rau nws.

⁷Lawv muab lub Tuamtsev tej qhovrooj kaw, cia tej teeb tuag tas, thiab lawv tsis hlawv hmoov tshuaj tsw qab fij rau hauv cov Yixalayees tus Vajtswv lub Tuamtsev lawm.

⁸Twb yog vim li ntawd, tus TSWV thiaj chim heev rau cov Yudas thiab cov neeg uas nyob hauv lub nroog Yeluxalees, tej uas nws ua rau lawv thiaj ua rau txhua tus ceeb thiab ntshai kawg li. Nej yeej paub tej no zoo.

⁹Cov uas yog peb txiv raug tua tuag tas rau hauv tshavrog, thiab peb tej pojniam menyuam raug luag ntes coj mus tas.

¹⁰“Nimno kuv txiav txim siab hais tias kuv yuav coglus rau tus TSWV uas yog cov Yixalayees tus Vajtswv kom nws thiaj tsis chim rau peb lawm.

¹¹Kuv cov menyuam, nej tsis txhob cia sijhawm dhau mus. Nej yog cov uas tus TSWV xaiv los ua cov hlawv hmoov tshuaj tsw qab fij rau nws thiab coj sawvdaws pehawm nws.”

¹²Cov Levis ntawd yog cov uas muaj npe li nram no: 1 Cuab Kauhas yog Amaxais tus tub — Mahas thiab Axaliyas tus tub — Yau-ees Cuab Melalis yog — Adis tus tub Kises thiab — Yehalelees tus tub Axaliyas Cuab Nkesoos yog Ximenas tus tub — Yau-as thiab Yau-as tus tub Edees Cuab Elisafas yog Simelis thiab — Ye-ules Cuab Asafas yog Xakhaliyas thiab — Mataniyas Cuab Hemas yog Yehules thiab — Sime-is Cuab Yeduthoos yog Semayas thiab — Uxiyees

¹⁵Cov Levis no hu lawv cov kwvtij tuaj ua ke ua kevcai ntxuav kom lawv huv. Ces vajntxwv kom lawv ua kevcai ntxuav lub Tuamtsev kom huv raws li tus TSWV hais.

¹⁶Cov povthawj mus rau hauv lub Tuamtsev thiab ua kevcai ntxuav lub Tuamtsev kom dawbhuv thiab muab txhua yam uas ua rau lub Tuamtsev tsis huv tshem tawm los rau hauv lub tshavpuam ntawm lub Tuamtsev; thiab cov Levis mam li nqa mus povtseg rau hauv lub Hav Kiloos uas nyob sab nraum ntug nroog.

¹⁷Lawv pib ua kevcai ntxuav rau thaum lub ib hlis ntuj hnub xiab ib mus txog hnub xiab yig, thiab lawv kho lub Tuamtsev tej qhovrooj tau yim hnub ntxiv; lub ib hlis hnub kaum rau ntawd, lawv ua txhua yam tiav tas thiaj tau lub Tuamtsev ua qhov chaw pehawm tus TSWV.

¹⁸Cov Levis mus tshabxo rau Vajntxwv Hexekiyas hais tias, “Peb twb ua kevcai ntxuav lub Tuamtsev kom huv tiav tas lawm, tsis hais lub thaj hlawv tej khoom fij los yog lub rooj uas rau cov ncuav dawbhuv, thiab txhua yam cuabyeej huv tibsi.

¹⁹Ntu uas Vajntxwv Ahas tsis muab siab npuab Vajtswv, nws rho txhua yam hauv lub Tuamtsev mus lawm, nimno peb rov muab tej ntawd fij rau tus TSWV thiab muab tso rau ntawm hauv ntej tus TSWV lub thaj.”

²⁰Vajntxwv Hexekiyas sawv ntxov hu tagnrho cov thawjcoj hauv lub nroog tuaj sib sau thiab lawv ua ke mus rau hauv lub Tuamtsev.

²¹Lawv tua xya tus heev nyuj, xya tus laug yaj, xya tus thav yaj thiab xya tus tshis fij daws Vajntxwv tsevneeg thiab cov Yudas tej kev txhaum thiab ua kevcai ntxuav lub Tuamtsev kom huv. Vajntxwv hais kom cov povthawj uas yog Aloos cov xeebntxwv muab cov tsiaj tua hlawv fij rau saum lub thaj.

²²Cov povthawj tua cov heev nyuj ua ntej mam li tua cov laug yaj, cov thav yaj thiab muab txhua tus tsiaj uas tua fij ntawd cov ntshav nchos rau lub thaj.

²³Tom qab ntawd, lawv mam muab cov tshis uas tua daws txim los rau vajntxwv thiab rau cov pejxeem tsa tes rau saum cov tshis.

²⁴Ces cov povthawj muab cov tshis tua thiab muab cov ntshav nchos rau lub thaj daws cov pejxeem lub txim. Rau qhov vajntxwv samhwm kom muab tsiaj tua hlawv fij daws cov Yixalayees tej kev txhaum.

²⁵Vajntxwv uas raws li tej lus uas tus TSWV hais rau Nkas uas yog Vajntxwv Daviv tus cev Vajtswv lus thiab Nathas tus uas cev Vajtswv lus. Vajntxwv kom cov Levis nqa nkauj nogncas thiab nruas npuaj sawv ua ke rau ntawm lub Tuamtsev,

²⁶cov ntawd zoo ib yam li tej uas thaum ub Vajntxwv Daviv siv, thiab cov povthawj los tuav rawv lawv tej raj xyu sawv ntawd thiab.

²⁷Hexekiyas kom muab cov khoom fij hlawv; thaum pib hlawv cov khoom, cov pejxeem txawm hu nkauj qhuas tus TSWV, thiab cov ntaus suab nkauj txawm ntaus nkauj nogncas thiab tshuab raj tshuab xyu.

²⁸Txhua tus uas tuaj pehawm tus TSWV hnub ntawd puavleej zoo siab, lawv hu nkauj thiab tshuab raj tshua xyu mus txog thaum hlawv tej khoom fij tas.

²⁹Ces Vajntxwv Hexekiyas thiab cov pejxeem txawm txhos caug ntua pehawm Vajtswv.

³⁰Vajntxwv thiab cov thawjcoj kom cov Levis hu tej nkauj uas Daviv thiab Axafes tus uas cev Vajtswv lus sau qhuas tus TSWV. Yog li ntawd, lawv txhua tus thiaj hu nkauj zoo siab thiab txhos caug pehawm Vajtswv.

³¹Hexekiyas hais rau cov pejxeem sawvdaws tias, “Nimno nej sawvdaws yog neeg huv lawm, nej cia li coj tsiaj mus tua fij ua tus TSWV tsaug.” Lawv sawvdaws mloog vajntxwv lus, thiab muaj ibtxhia txaus siab hlo coj lawv tej tsiaj mus tua hlawv fij rau tus TSWV.

³²Lawv coj xya caum tus heev nyuj, ib puas tus laug yaj thiab ob puas tus thav yaj mus tua hlawv fij rau tus TSWV;

³³lawv tseem coj rau pua tus heev nyuj thiab peb txhiab tus yaj mus tua fij thiab faib rau cov pejxeem sawvdaws noj.

³⁴Vim cov povthawj tsis coob, lawv thiaj kom cov Levis los pab lawv tua cov tsiaj mus txog thaum tes haujlwm ntawd tiav, thiab cov povthawj ua kevcai ntxuav kom lawv huv. (Rau qhov cov Levis muaj lub siab ua kevcai ntxuav kom huv dua cov povthawj.)

³⁵Dua li tej khoom fij uas ntau heev ntawd, cov povthawj tseem muab tej roj luas tawm ntawm tej nqaij uas muab faib rau cov pejxeem noj, muab cawv txiv hmab hliv rau thiab coj mus hlawv fij. Yog li ntawd, thiaj rov pib muaj kev pehawm Vajtswv nyob hauv lub Tuamtsev dua.

³⁶Vajntxwv Hexekiyas thiab cov pejxeem sawvdaws zoo siab kawg, rau qhov Vajtswv tau pab lawv ua tes haujlwm ntawd tiav sai heev.