Read Hmong Daw Khiav dim 1 Bible Online

Khiav dim 1 - Hmong Daw bible

Khiav dim 1

¹Yakhauj cov tub uas nyias coj nyias pojniam tubse nrog Yakhauj mus nyob nram tebchaws Iziv npe hu li no:

²Lunpees, Xime-oos, Levis, Yudas,

³Ixakhas, Xenpuloos, Npeenyamees,

⁴Das, Nathalis, Khas thiab Aseles.

⁵Yakhauj tsevneeg uas nws coj mus muaj xya caum leej. Nws tus tub Yauxej twb xub mus nyob nram tebchaws Iziv lawm.

⁶Tom qab ntawd Yauxej txawm tuag lawm, ces tagnrho nws cov tijlaug thiab cov neeg uas nyob tiam ntawd puavleej tuag tas huv tibsi.

⁷Tiamsis lawv cov tubki uas yog cov Yixalayees muaj menyuam huamvam coob nyob puv nkaus tebchaws Iziv.

⁸Tus vajntxwv tshiab uas los kav lub tebchaws Iziv, nws tsis paub Yauxej.

⁹Nws hais rau nws cov pejxeem hais tias, “Cov Yixalayees huamvam coob thiab muaj zog heev, nyob tsam lawv ua phem rau peb.

¹⁰Ces thaum muaj tsov muaj rog tuaj tua peb, lawv yuav sau nthwv tuaj yeebncuab tog tua peb, thiab lawv yuav khiav tawm hauv peb lub tebchaws mus. Peb yuav tsum nrhiav kev txov cov neeg no tsis pub kom lawv huamvam ntxiv lawm.”

¹¹Yog li ntawd, cov Iziv thiaj txib neeg mus yuam cov Yixalayees ua haujlwm hnyav kawg nkaus kom lawv poob siab. Cov Yixalayees ua lub nroog Phithoos thiab lub nroog Lamexes rau Falaus tej cuabyeej.

¹²Txawm yog cov Iziv yuav quab yuam cov Yixalayees npaum li cas los lawv hajyam huamvam coob npaum li ntawd, thiab rhawv zej zos dav zuj zus ua rau cov Iziv ntshai lawv heev.

¹³Cov Iziv yuam cov Yixalayees ua qhev txomnyem ntsuav,

¹⁴thiab yuam lawv ua cov Iziv tej vajtse, tej liaj teb thiab ua txhua yam haujlwm hnyav, lawv tsis hlub cov Yixalayees hlo li.

¹⁵Muaj ib hnub cov Iziv tus vajntxwv hais rau ob tug pojniam uas yog Sifalas thiab Puahas uas pheej mus pab cov Henplais tej pojniam daws cev.

¹⁶Nws hais rau nkawd hais tias, “Thaum neb mus pab cov Henplais tej pojniam daws cev, tus menyuam twg yog tus tub, neb cia li muab tua povtseg, tiamsis tus twg yog tus ntxhais, neb mam li cia nyob.”

¹⁷Tiamsis ob tug pojniam ntawd paub ntshai Vajtswv, nkawd thiaj tsis ua raws li vajntxwv hais, nkawd tsis tua tej menyuam tub povtseg.

¹⁸Yog li ntawd, vajntxwv thiaj tso neeg mus hu nkawd tuaj cuag nws, thiab nws nug nkawd hais tias, “Vim li cas neb ua li no? Vim li cas neb tseem tseg cov menyuam tub nyob thiab?”

¹⁹Nkawd teb hais tias, “Cov pojniam Henplais tsis zoo li peb cov pojniam Iziv, lawv tau menyuam sai heev, thiab lawv twb tau menyuam ua ntej wb mus txog lawm.”

²⁰Vim nkawd paub ntshai Vajtswv, Vajtswv thiaj ua zoo rau nkawd thiab pub nkawd muaj tubki coob.

²¹Cov Yixalayees pheej huamvam coob zuj zus thiab muaj zog heev.

²²Thaum kawg Falaus samhwm rau nws cov pejxeem sawvdaws hais tias, “Cia li muab cov Henplais tej menyuam tub uas nyuam qhuav yug tau los txhua tus pov rau hauv tus Dej Niles, tiamsis tseg cov menyuam ntxhais cia.”