Read Hmong Daw Khiav dim 17 Bible Online

Khiav dim 17 - Hmong Daw bible

Khiav dim 17

¹Cov Yixalayees sawv kev ntawm tiaj suabpuam Xees los, lawv tshais chaw ib qho rau ib qho ua ntu zus raws li tus TSWV hais. Lawv los tsuam chaw rau ntawm Lefidees, tiamsis thaj tsam ntawd tsis muaj dej haus hlo li.

²Lawv thiaj tuaj yws Mauxes hais tias, “Cia li nrhiav dej rau peb haus!” Mauxes teb lawv hais tias, “Vim li cas nej yuav yws li ko? Ua cas nej yuav sim tus TSWV siab?”

³Tiamsis cov neeg nqhis dej heev mas lawv thiaj pheej yws Mauxes tsis tseg li. Lawv yws hais tias, “Vim li cas koj thiaj coj peb tawm nram tebchaws Iziv los? Koj puas paub hais tias, peb cov menyuam, peb tej tsiaj txhu thiab peb twb yuav tuag dej?”

⁴Mauxes thov tus TSWV hais tias, “Kuv yuav ua li cas rau cov neeg no thiaj li zoo? Lawv twb yuav muab pobzeb ntaus kom kuv tuag.”

⁵Tus TSWV hais rau Mauxes hais tias, “Coj cov Yixalayees tej thawjcoj qee leej nrog koj, thiab nej cia li mus ua sawvdaws ntej. Nqa koj tus pas nrig uas koj nplawm tus dej Niles nrog koj mus.

⁶Kuv yuav sawv saum lub pobzeb uas nyob saum roob Xinais. Cia li ntaus lub pobzeb ntawd, dej yuav tawm hauv los rau cov neeg haus.” Mauxes ua li ntawd rau cov Yixalayees tej thawjcoj saib ntsoov.

⁷Thiaj tis npe rau qhov chaw ntawd hu ua Maxas thiab Melinpas, rau qhov cov Yixalayees tau yws thiab sim tus TSWV siab thaum lawv nug hais tias, “Tus TSWV nrog peb nyob los tsis nrog?”

⁸Cov Amalej cov tubrog tuaj tua cov Yixalayees ntawm Lefidees.

⁹Mauxes hais rau Yausuas hais tias, “Tagkis koj cia li xaiv peb cov txivneej ibtxhia mus tua cov Amalej. Kuv yuav mus sawv saum ncov roob thiab tsa tus pas nrig uas Vajtswv kom kuv nqa.”

¹⁰Yausuas ua raws li Mauxes tau samhwm rau nws, thiab tawm mus tua cov Amalej. Mauxes, Aloos thiab Hules lawv nce mus saum roob.

¹¹Thaum Mauxes tsa nws txhais tes, cov Yixalayees tua yeej, tiamsis thaum nws tso tes, cov Amalej tua yeej zuj zus.

¹²Thaum Mauxes tsaug npab lawm, Aloos thiab Hules nkawd thiaj mus nqa pobzeb los rau Mauxes zaum, nkawd ib leeg sawv ib sab tuav Mauxes ob txhais npab, thiab tsa mus txog thaum hnub poob qho.

¹³Lawv ua li ntawd, Yausuas thiaj tua yeej cov Amalej.

¹⁴Ces tus TSWV hais rau Mauxes hais tias, “Koj cia li sau zaj no tseg cia, sawvdaws thiaj li yuav nco ntsoov mus ibtxhis. Qhia rau Yausuas paub hais tias, kuv yuav ua kom cov Amalej puastsuaj tas huv tibsi mus.”

¹⁵Mauxes ua tau ib lub thaj thiab tis npe rau lub thaj ntawd hu ua “Tus TSWV yog kuv tus Chij.”

¹⁶Mauxes hais tias, “Tsa tus TSWV tus chij kom siab! Tus TSWV yuav tawmtsam cov Amalej ib tiam dhau ib tiam, mus ibtxhis li!”