Read Hmong Daw Khiav dim 25 Bible Online

Khiav dim 25 - Hmong Daw bible

Khiav dim 25

¹Tus TSWV hais rau Mauxes hais tias,

²“Koj hais rau cov Yixalayees kom coj khoom tuaj fij rau kuv. Koj cia li txais txhua yam uas cov neeg txaus siab coj tuaj fij rau kuv ntawd.

³Cov khoom uas lawv coj tuaj fij no mas yog: kub, nyiaj, tooj;

⁴xov xiav, xov tsamxem, xov liab thiab tej ris tsho uas muab plaub tshis los ntos ua;

⁵thiab tej tawv yaj uas muab kob tsamxem zas, tej tawv nyuj uas zoo heev, ntoo kubtwm;

⁶thiab roj sam teeb, tej roj txhawb meejthawj, thiab tej hmoov tshuaj tsw qab;

⁷tej qe zeb kanelias thiab lwm yam hlaws uas coj mus dai rau ntawm tus Povthawj Hlob lub tsho efaus thiab nws daim ntaub npog hauvsiab.

⁸Lawv yuav tsum ua ib lub Tsevntaub rau kuv, kuv thiaj nrog lawv nyob.

⁹Ua lub Tsevntaub no thiab npaj ua tej khoom siv rau hauv lub Tsevntaub ntawd raws li uas kuv yuav qhia koj ua ntag.

¹⁰“Muab cov ntoo kubtwm los ua ib lub Phijxab, qhov ntev ob tshim thiab ib dos, qhov dav ib tshim thiab ib dos, thiab qhov siab ib tshim thiab ib dos.

¹¹Muab cov tseem kub vuam lub Phijxab ntawd sab nraud thiab sab hauv nruab nrog, thiab muab kub los ua tus ntug thoob plaws.

¹²Muab kub ua plaub lub khawb ntsia rau ntawm plaub tus ceg, ntsia ib sab ob lub khawb.

¹³Muab ntoo kubtwm ua ob tug nqaj uas kwv thiab muab kub vuam ob tug nqaj ntoo ntawd huv tibsi,

¹⁴thiab muab ob tug nqaj ntawd ntxig rau hauv cov khawb ntawm lub Phijxab ib sab ib tug nqaj.

¹⁵Thaum ntxig rau hauv cov khawb lawm tsis txhob rho li.

¹⁶Cia li muab ob daim txiag zeb uas kuv sau kuv cov lus samhwm uas kuv yuav muab rau koj tso rau hauv lub Phijxab ntawd.

¹⁷“Muab cov tseem kub ua daim khwb, qhov ntev ob tshim thiab ib dos, qhov dav ib tshim thiab ib dos.

¹⁸Muab kub ntaus ua ob tug qhelunpees muaj tis

¹⁹txawb ib tug rau ib tog hau Phijxab. Muab ob tug qhelunpees cog keevxeeb rau lub hau Phijxab ib tug rau ib tog.

²⁰Tso ob tug qhelunpees ntawd tig xubntiag tuaj ua ke, kom cov koojtis nthuav los roos lub Phijxab.

²¹Muab ob daim txiag zeb cia rau hauv lub Phijxab thiab muab lub hau khwb lub Phijxab.

²²Kuv yuav ntsib koj qhov ntawd, thiab kuv nyob saum lub hau Phijxab kis nruab nrab ntawm ob sab qab koojtis qhelunpees, kuv yuav muab kuv tej kevcai rau koj coj mus qhia cov Yixalayees.

²³“Muab ntoo kubtwm los ua ib lub rooj ntev ob tshim, dav ib tshim thiab siab ib tshim thiab ib dos.

²⁴Muab kub vuam lub rooj ntawd, thiab muab kub nchuav ua ib tug ntug ncig thoob plaws lub npoo rooj.

²⁵Lub npoo rooj ntawd ua tuab nkaus li ib xib, thiab muab kub ua ib tug ntswg thoob plaws lub npoo rooj.

²⁶Muab kub ntaus ua plaub lub khawb ntsia rau plaub lub kaum rooj ntawm plaub tug ceg.

²⁷Cov khawb uas ntxig nqaj kwv lub rooj ntawd, muab ntsia kom ze rau ntawm tus npoo.

²⁸Muab ntoo kubtwm los txua ua ob tug nqaj thiab muab kub vuam rau ob tug nqaj ntawd.

²⁹Ua phaj, khob, hub thiab tais los tau hliv cawv txiv hmab ua khoom fij. Tej twj taig no yuav tsum muab cov tseem kub ua xwb.

³⁰Lub rooj ntawd yuav tsum txawb rau ntawm hauv ntej lub Phijxab uas ntim Vajtswv tej lus cog tseg, thiab cov ncuav dawbhuv uas fij rau kuv yuav tsum cia nyob saum lub rooj.

³¹“Muab cov tseem kub ntaus ua ib lub teeb. Lub taw thiab tus ncej txawb teeb los muab tej tseem kub ntaus ua ib cov paj, ib cov cos paj thiab ib cov nplai paj kom keevxeeb rau ntawm tus ncej txawb teeb.

³²Thiab ua kom ncau ua rau ces, ib sab peb ceg.

³³Rau ces ntawd, ib ceg ua peb lub paj zoo li paj txiv duaj, nrog cov cos paj thiab cov cos nplooj.

³⁴Tus ncej txawb teeb mas zaig ua plaub lub paj zoo li paj txiv duaj, nrog cov cos paj thiab cov cos nplooj.

³⁵Ntawm rau tus ceg teeb ntawd, ua ib lub paj rau hauv qab ntawm cov ceg ncau.

³⁶Cov cos paj, cov ceg thiab tus ncej txawb teeb yog muab tib thooj kub ntaus ua xwb.

³⁷Ua xya lub teeb rau ntawm tus ncej txawb teeb, thiab taws kom cig pom kev lam lug rau tom hauv ntej.

³⁸Muab cov tseem kub ntaus ua rab txiab uas txiav cov teebxeeb thiab ua lub phaj rau txiab.

³⁹Muab xya caum tsib choj kub los ntaus ua tus ceg teeb, thiab tej twj taig uas siv rau lub teeb.

⁴⁰Yuav tsum ua txhua yam no raws li kuv tau qhia rau koj saum roob lawm.