Read Hmong Daw Khiav dim 37 Bible Online

Khiav dim 37 - Hmong Daw bible

Khiav dim 37

¹Npexalees muab ntoo kubtwm los txua ua lub Phijxab uas ntim Vajtswv tej lus cog tseg, qhov ntev ob tshim thiab ib dos, qhov dav ib tshim thiab ib dos, qhov siab ib tshim thiab ib dos.

²Nws muab cov tseem kub vuam sab hauv, sab nraud thiab ua ib tug ntug thi thoob plaws lub Phijxab.

³Nws ua plaub lub khawb kub rau lub Phijxab, thiab muab ntsia rau ntawm plaub ceg kaum taw Phijxab ib sab ob lub.

⁴Nws muab ntoo kubtwm ua ob tug nqaj kwv lub Phijxab, thiab vuam kub huv tibsi rau,

⁵thiab muab ob tug nqaj ntawd ntxig rau cov khawb, ib sab Phijxab ib tug.

⁶Nws muab cov tseem kub los ua lub hau Phijxab, qhov ntev ob tshim thiab ib dos, qhov dav ib tshim thiab ib dos.

⁷Nws muab kub ntaus ua ob tug qhelunpees,

⁸ib tug txawb rau ib tog hau Phijxab. Nws muab ob tug qhelunpees ntawd ham kiag rau lub hau Phijxab.

⁹Ob tug qhelunpees ntawd puavleej tig ntsejmuag tuaj ua ke, thiab ob tug qhelunpees ntawd puavleej nthuav tis npog lub Phijxab.

¹⁰Npexalees muab ntoo kubtwm txua ua ib lub rooj ntev ob tshim, dav ib tshim, siab ib tshim thiab ib dos.

¹¹Nws muab cov tseem kub vuam lub rooj, thiab muab kub ua ib tug ntug thi thoob plaws lub rooj ntawd.

¹²Nws ua ib tug npoo siab li ib xib ncig tus ntug thiab muab kub ua tus ntug thoob plaws tus npoo.

¹³Nws ua plaub lub khawb kub ntsia rau plaub lub kaum rooj ntawm plaub tug ceg.

¹⁴Cov khawb uas ntxig ob tug nqaj kwv lub rooj, muab ntsia ze rau ntawm tus ntug.

¹⁵Nws muab ntoo kubtwm ua ob tug nqaj uas kwv lub rooj thiab muab kub vuam rau ob tug nqaj ntawd huv tibsi.

¹⁶Nws tseem muab tej tseem kub nchuav ua ib co twj taig tau siv rau lub rooj: phaj, khob, hub thiab tais tau siv rau cawv txiv hmab ua khoom fij.

¹⁷Npexalees muab cov tseem kub ua tus ncej txawb teeb. Nws muab kub ntaus ua tus taw thiab tus ncej txawb teeb; ntaus ua ib cov paj, ib cov cos paj thiab nplai paj keevxeeb nrog tus ncej txawb teeb.

¹⁸Thiab ua kom ncau ua rau ceg, ib sab peb ceg.

¹⁹Rau ceg ntawd, ib ceg ua peb lub paj zoo li paj txiv duaj nrog cov cos paj thiab cov nplai paj.

²⁰Tus ncej txhawb teeb mas zaig ua plaub lub paj zoo li paj txiv duaj, nrog cov cos paj thiab cov nplai paj.

²¹Ntawm rau tus ceg teeb ntawd, ua ib lub paj rau hauv qab ntawm cov ceg ncau.

²²Cov cos paj, cov ceg thiab tus ncej txawb teeb yog muab tib co kub ntaus ua xwb.

²³Ua xya lub teeb rau ntawm tus ncej txawb teeb, thiab nws muab tej tseem kub ntaus ua phaj thiab txiab txiav teebxeeb.

²⁴Nws muab xya caum tsib choj kub ntaus ua tus ncej txawb teeb thiab tej twj uas siv rau lub teeb.

²⁵Npexalees muab ntoo kubtwm txua lub thaj hlawv hmoov tshuaj tsw qab. Lub thaj ntawd txua ua plaub fab, ntev ib tshim thiab dav ib tshim, thiab siab ob tshim. Txua plaub tug kub koom hlo rau plaub ceg kaum thaj.

²⁶Nws muab tej tseem kub vuam rau plaub sab, thiab plaub tug kub huv tibsi, thiab muab ib pluaj kub ntsia puab tus ntug thoob plaws.

²⁷Ua khawb kub rau lub thaj thiab muab ntsia rau ob sab hauv qab tus ntug, ib sab twg ob lub ua chaw ntxig tus nqaj kwv lub thaj.

²⁸Nws muab ntoo kubtwm txua ua ob tug nqaj kwv lub thaj thiab muab kub vuam ob tug nqaj ntawd huv tibsi.

²⁹Npexalees tseem ua cov roj txhawb meejthawj dawbhuv thiab muab cov nroj tsw qab los tov ib yam li tov tej tshuaj tsw qab.