Read Hmong Daw Yauj 10 Bible Online

Yauj 10 - Hmong Daw bible

Yauj 10

¹“Kuv dhuav ua neej nyob heev lawm. Thov mloog kuv yws kuv tej kev lwj siab!

²Vajtswv, thov tsis txhob rau txim rau kuv. Thov qhia rau kuv saib! Yog li cas koj thiaj rau txim rau kuv?

³Puas tsimnyog koj ua nruj ua tsiv rau kuv, saib tsis taus tej uas koj tsim, thiab luag ntxhi rau tej neeg siab phem tej haujlwm?

⁴Koj puas muaj qhovmuag li neej muaj? Koj puas pom li neeg pom?

⁵Koj hnubnyoog puas luv li neeg lossis koj txojsia puas luv li neeg txoj?

⁶Vim li cas koj pheej nrhiav kuv tej kev txhaum thiab tshawb tej uas kuv ua tsis yog?

⁷Koj yeej paub hais tias kuv tsis muaj txim thiab tsis muaj leejtwg cawm kom kuv dim ntawm koj.

⁸“Koj txhais tes tsim thiab puab kuv, nimno los yog koj ob txhais tes rhuav kuv.

⁹Nco ntsoov hais tias koj muab av nplaum puab kuv; koj yuav muab kuv tsoo kom rov ua hmoov av los?

¹⁰Koj pub kuv txiv tsim muaj kuv; koj cia kuv loj hlob hauv kuv niam plab.

¹¹Koj tsim kuv lub cev muaj pobtxha thiab muaj leeg thiab kom muaj nqaij muaj tawv qhwv tej pobtxha.

¹²Koj pub kuv muaj sia thiab muaj kev hlub tsis tu, thiab koj tsomkwm kom kuv muaj sia nyob.

¹³Tiamsis nimno kuv paub hais tias, koj nyas nrhw ua rau kuv raug mob txhua lub sijhawm.

¹⁴Koj tos ntsoov saib kuv puas ua txhaum, ces koj yuav tsis zam txim rau kuv.

¹⁵Thaum twg kuv ua txhaum, ces txawm tsis haum koj siab ntag, tiamsis yog kuv ua ncaj, koj yeej tsis qhuas kuv li. Kuv txajmuag kawg, tsa tsis tau taubhau li.

¹⁶Kuv lub neej nyuam qhuav pib zoo xwb, koj txawm siv txo kuv lub neej ib yam li tsov ntxhuav caum tsiaj tom; thiaj koj tseem ua tej txujci tawmtsam kuv.

¹⁷Koj ibtxwm muaj timkhawv nkaug kuv; koj txojkev chim huam loj zuj zus tuaj tawmtsam kuv; koj ibtxwm nrhiav lub tswvyim tshiab tawmtsam kuv.

¹⁸“Vajtswv, vim li cas koj thiaj li cia kuv yug los? Tsimnyog koj cia kuv tuag ua ntej thaum tsis tau muaj leejtwg pom kuv.

¹⁹Yog kuv ncaj nraim hauv kuv niam plab mus rau hauv qhov ntxa, mas yuav zoo ib yam li uas kuv tsis tau yug los.

²⁰Puas yog kuv lub neej twb yuav dua? Tsis txhob thab kuv! Cia kuv muaj kev zoo siab thaum kuv tseem tshuav sijhawm.

²¹Kuv twb yuav mus sai sai no thiab yuav tsis rov qab los li lawm, yuav mus rau hauv lub tebchaws uas tsaus ntuj dub nciab,

²²yog lub tebchaws uas muaj duab tsaus ntuj, txawm yog qhov kaj los zoo li qhov tsaus ntuj.”