Read Hmong Daw Yauj 11 Bible Online

Yauj 11 - Hmong Daw bible

Yauj 11

¹Xaufas uas yog neeg Namas teb hais tias: “Txawm tsis muaj leejtwg teb tej lus uas tsis muaj qabhau no li? Tus neeg uas hais lus ntau puas yog neeg ncaj ncees?

³Yauj, koj xav hais tias peb teb tsis tau koj tej lus no los? Koj tej lus txob thuam yuav ua rau peb nyob twjywm no los?

⁴Koj khav hais tias koj hais lus tseeb; koj khav hais tias koj dawbhuv tabmeeg Vajtswv.

⁵Kuv xav kom Vajtswv teb koj tej lus!

⁶Nws yuav qhia ntau lub tswvyim rau koj; muaj ntau yam kev txawj ntse uas neeg tsis paub. Vajtswv rau txim rau koj sib tshaj qhov uas koj tsimnyog raug.

⁷“Koj puas paub txog Vajtswv lub peevxwm, koj puas paub Vajtswv lub hwjchim uas loj kawg nkaus?

⁸Saum nruab ntug yeej tsis muaj ciam tiamsis koj qhovmuag pom tsis tas. Vajtswv paub tubtuag teb huv tibsi, tiamsis koj tsis paub.

⁹Vajtswv lub hwjchim loj tshaj lub ntiajteb thiab dav dua hiavtxwv.

¹⁰Yog Vajtswv kom koj thiab coj koj mus rau rau hauv tsev tu plaub leejtwg yuav cheem tau nws?

¹¹Vajtswv paub tej neeg uas tsis muaj nqis; Vajtswv pom neeg tej kev phem kev qias.

¹²Thaum twg tus neesluav qus yug tau los ua neeg, mas tus neeg ruam thiaj yuav txawj ntse.

¹³“Yauj, koj cia li ua siab ncaj, koj thiaj mus cuag tau Vajtswv.

¹⁴Tshem tej kev phem kev qias thiab kev txhaum tawm hauv koj tsev mus.

¹⁵Koj thiaj muaj ntsejmuag fim neeg ntiajteb thiab nyob tso siab lug tsis ntshai leejtwg.

¹⁶Koj yuav tsis nco qab txog koj tej kev nyuaj siab, koj tej kev nyuaj siab yuav dhau mus ib yam li dej ntws, koj yuav nco tsis txog li lawm.

¹⁷Koj lub neej yuav ci tshaj lub hnub ci thaum tavsu, thiab koj lub neej uas tsaus ntuj nti yuav kaj nrig ib yam li thaum sawv ntxov.

¹⁸Koj yuav ua lub neej nyob kaj siab lug, thiab muaj kev cia siab; Vajtswv yuav tsomkwm koj thiab pub kom koj tau so.

¹⁹Koj yuav tsis ntshai koj tej yeebncuab; neeg coob leej yuav tuaj thov koj pab.

²⁰Tiamsis cov neeg siab phem yuav saib ncig lees tsis muaj chaw cia siab thiab lawv yuav nrhiav tsis tau kev khiav dim li. Lawv txojkev cia siab tsuas yog txojkev tuag xwb.”