Read Hmong Daw Yauj 12 Bible Online

Yauj 12 - Hmong Daw bible

Yauj 12

¹Yauj teb hais tias: “Koj yog cov neeg ntawd ntag. Thaum koj tuag, koj tej kev txawj ntse yuav tuag nrog koj mus.

³Tiamsis kuv kuj muaj kev txawj ntse ib yam li koj thiab; kuv yeej tsis ntshai thiab tsis swb koj li; txhua tus puavleej paub tej uas koj hais ntawd.

⁴Txawm yog kuv tej phoojywg los niaj hnub luag kuv plig; txawm yog kuv yeej ncaj ncees thiab tsis tau ua txhaum los lawv tseem luag kuv; tiamsis kuv paub hais tias muaj ib hnub Vajtswv yuav teb kuv tej lus thov.

⁵Koj tsis muaj kev nyuaj siab dabtsi, ces koj txawm tuaj muab kuv tso daj tso luag; koj ua li ntawd, yog koj ntaus ib tug txivneej twb yuav ntog.

⁶Tiamsis cov neeg tubsab thiab tsis hwm Vajtswv nyob kaj siab lug, lawv tus vajtswv ces yog lawv lub zog xwb.

⁷“Tiamsis koj cia li mus nug tej tsiaj lossis tej noog, lawv yuav qhia koj;

⁸cia li mus thov tej tsiaj nruab nqhuab thiab tej tsiaj nruab deg qhia kev txawj ntse rau koj.

⁹Txawm yog tej tsiaj los twb paub hais tias Vajtswv yog tus tsim lawv.

¹⁰Vajtswv yog tus tswj neeg thiab tej tsiaj txojsia; Vajtswv lub hwjchim tuav txhua tus tibneeg txojsia.

¹¹Ib yam li koj lub qhovntsej nyiam mloog luag tej lus, thiab koj tus nplaig nyiam saj tej zaub mov.

¹²“Tej neeg laus muaj tswvyim, tiamsis Vajtswv muaj tswvyim thiab muaj hwjchim huv tibsi. Tej neeg laus muaj kev txawj ntse, tiamsis Vajtswv muaj kev txawj ntse thiab muaj hwjchim ua tau haujlwm tiav.

¹⁴Yog Vajtswv muab rhuav lawm, leejtwg yuav txhim kho dua; thiab leejtwg muaj cuabkav tso tau tus neeg uas Vajtswv muab kaw lawm?

¹⁵Yog Vajtswv tsis tso nag los, ces yuav muaj ntuj qhua teb nkig; yog Vajtswv tso nag los, ces yuav muaj dej nyab.

¹⁶“Vajtswv yog tus muaj zog thiab nws ibtxwm muaj yeej; tus neeg dag ntxias thiab tus uas raug luag dag ntxias puavleej yog Vajtswv kav.

¹⁷Nws rhuav cov nomtswv tej kev txawj ntse thiab ua rau cov thawjcoj kom lawv ua ib yam li tej neeg ruam.

¹⁸Nws txo tau tej vajntxwv thiab coj lawv mus kaw rau hauv tsev lojcuj;

¹⁹nws txo cov povthawj thiab tej neeg muaj hwjchim kom poob hwjchim.

²⁰Nws kaw cov tuavxam uas luag cia siab rau lub qhovncauj, thiab muab cov neeg laus tej kev txawj ntse tshem mus.

²¹Nws rhuav cov neeg muaj hwjchim kom poob ntsejmuag thiab ua rau tej nomtswv lub zog ntaug.

²²Nws ua qhov kaj ci pom kev rau hauv tubtuag teb.

²³Nws ua rau ntau haivneeg muaj zog thiab muaj hwjchim, tiamsis nws ua rau lawv swb thiab puastsuaj.

²⁴Nws ua rau lawv cov thawjcoj ua neeg ruam thiab ua rau lawv yuam kev mus mus los los tsis paub mus qhov twg;

²⁵lawv maub tsaus ntuj nti ntog pujpoog ib yam li tej neeg qaug cawv.