Read Hmong Daw Yauj 13 Bible Online

Yauj 13 - Hmong Daw bible

Yauj 13

¹“Tej uas koj hais ntawd, kuv twb hnov tas lawm. Kuv totaub txhua yam; kuv paub ib yam li koj paub. Kuv lub qhovmuag yeej pom tej no lawm. Kuv tsis tau swb koj.

³Tiamsis yog kuv nrog Vajtswv sib hais, tsis yog nrog koj sib cav; kuv xav nrog Vajtswv sib hais txog kuv zaj.

⁴Koj muab tej lus dag los npog koj txojkev ruam; koj zoo li tej kws tshuaj uas kho tsis tau luag tej mob zoo.

⁵Koj tsis txhob hais lus, luag thiaj xav hais tias koj yog neeg ntse!

⁶“Koj cia li mloog kuv hais kuv zaj.

⁷Vim li cas koj hais lus dag? Koj xav hais tias koj tej lus dag muaj nqis rau Vajtswv no los?

⁸Koj yuav tuaj Vajtswv tog txheem los? Koj yuav nrog Vajtswv hais nws zaj hauv tsev tu plaub los?

⁹Yog Vajtswv ua tib zoo saib koj, nws puas pom koj muaj ib qhov zoo? Koj xav hais tias koj dag tau Vajtswv li koj dag neeg no los?

¹⁰Yog hais tias koj ua tsis ncaj rau ib tog, Vajtswv yuav rau txim hnyav rau koj,

¹¹thiab nws lub hwjchim yuav ua rau koj ntshai kawg nkaus li.

¹²Koj tej pajlug tsis muaj nqis ib yam li tej hmoov tshauv; koj tej lus sib cav muag ib yam li tej av nplaum.

¹³Koj cia li nyob twjywm kuv thiaj li muaj sijhawm hais lus, cia saib thaum kawg tej ntawd yuav zoo li cas.

¹⁴“Kuv pheej hmoo ua kuv lub neej.

¹⁵Kuv tas kev cia siab lawm, Vajtswv yuav muab kuv tua povtseg los xijpeem. Kuv yeej yuav mus nrog nws hais kuv zaj xwb.

¹⁶Tej zaum qhov uas kuv muaj lub siab tawv li no yuav pab tau kuv, rau qhov cov neeg siab phem tsis muaj ib tug mus cuag tau Vajtswv li.

¹⁷Nimno koj cia li ua tib zoo mloog tej lus uas kuv qhia koj.

¹⁸Kuv yeej npaj rawv yuav mus hais kuv zaj, rau qhov kuv paub hais tias kuv tsis tau ua txhaum.

¹⁹“Vajtswv, koj yuav kom kuv ntag los? Yog koj kom kuv, ces kuv yeej hais tsis taus thiab tuag xwb!

²⁰Cia kuv thov ob yam; thov kom koj pom li no, kuv yuav tsis khiav nkaum koj;

²¹tsis txhob rau txim rau kuv thiab tsis txhob ua rau kuv ntshai dhau.

²²“Vajtswv, koj hais ua ntej kuv mam li teb. Lossis cia kuv hais ua ntej, koj mam li teb.

²³Kuv tej kev txhaum yog dabtsi? Kuv tau ua txhaum dabtsi? Thov koj cia li phua kuv tej kev txhaum rau kuv.

²⁴“Vim li cas koj tso kuv tseg? Vim li cas koj saib kuv zoo li tus yeebncuab?

²⁵Puas yog koj ua kom kuv ntshai? Kuv tsis tseemceeb dabtsi li, kuv zoo li daim nplooj xwb; koj lam tawmtsam tej nyuag quavnyab qhuav los?

²⁶“Koj muab kev iab siab los tawmtsam kuv, koj sau tej kev txhaum uas kuv ua thaum kuv tseem hluas los rau kuv ris.

²⁷Koj muab saw hlau khi kuv kotaw; koj saib ntsoov kuv tshais txhua kauj ruam, thiab koj tu ciam rau kuv tsuj.

²⁸Thaum kawg kuv zoo ib yam li yav cav ntoo lwj, thiab zoo ib yam li lub tsho uas ntsaum kabrwg noj.