Read Hmong Daw Yauj 14 Bible Online

Yauj 14 - Hmong Daw bible

Yauj 14

¹“Txhua tus neeg uas yug los ntawm pojniam ua neej nyob tsis ntev thiab niaj hnub muaj kev ntxhov siab.

²Peb loj hlob thiab ntsws sai ib yam li tej paj ntoos; peb dhau mus zuj zus ib yam li tus duab ntxoov ntxoo.

³Vajtswv, koj puas yuav tsa laj muag saib kuv, lossis taug kuv zaj thiab txiav txim rau kuv?

⁴Yeej tsis muaj ib yam huv yuav tawm ntawm qhov uas tsis huv li neeg los.

⁵Neeg lub hnubnyoog ua neej nyob koj twb teem tseg, thiab koj paub hais tias lawv yuav nyob pestsawg hli. Lub sijhawm uas koj teem tseg yeej tsis muaj leejtwg hloov tau li.

⁶Koj cia li tig rau ib qhov thiab tso nws tseg; cia nws tau so thiab zoo siab ib yam li tus tub zog uas ua haujlwm hnyav.

⁷“Tseem muaj kev cia siab rau tus ntoo uas luag muab ntov lawm; nws lub hauvpaus tseem ciaj thiab hlav taus kaus tuaj.

⁸Txawm yog nws tej cag laus thiab lub hauvpaus qhuav rau saum npoo av lawm

⁹los thaum muaj dej ntub nws yuav hlav kaus tuaj ib yam li tsob ntoo mos.

¹⁰Tiamsis thaum neeg tuag lawm, ces nws txojsia kawg rau hnub ntawd; thaum neeg tuag, nws mus nyob qhov twg lawm?

¹¹“Dej tu tsis ntws thiab pasdej qhuav zoo li cas,

¹²ces neeg tuag tsis sawv rov los ib yam li ntawd. Thaum lub ntuj tseem muaj nyob lawv yuav tsis sawv rov qab los; lawv yuav tsis tsim ntawm qhov chaw uas lawv pw.

¹³“Kuv xav kom koj muab kuv coj mus zais rau hauv tubtuag teb; cia kuv nraim hauv mus txog thaum koj txojkev chim dhau tso, thiab thov koj teem ib lub caij nco txog kuv.

¹⁴Yog neeg tuag lawm, nws puas yuav rov muaj sia? Tiamsis kuv yuav niaj hnub tos txog lub sijhawm uas koj tso kuv dim tej kev nyuaj siab.

¹⁵Thaum ntawd koj yuav hu kuv, thiab kuv yuav teb koj, thiab koj yuav txaus siab rau tus uas koj tsim.

¹⁶Koj yuav saib ntsoov kuv tshais txhua kauj ruam, tiamsis koj yuav tsis suav kuv tej kev txhaum lawm.

¹⁷Koj yuav zam kuv tej kev txhaum thiab muab tshem mus povtseg; txhua yam kev txhaum uas kuv tau ua, koj yuav muab ntxuav huv tibsi mus.

¹⁸“Yuav muaj ib lub sijhawm uas tej hauv roob yuav nphau tas, thiab tej roob tsuas los yuav raug tshem ntawm nws qhov chaw mus.

¹⁹Dej yuav tshoob tej pobzeb thiab tuamtsam nag yuav kuav tej av mus tas; yog li ntawd koj thiaj rhuav neeg txojkev cia siab uas ua neej nyob.

²⁰Koj muaj zog tshaj neeg thiab muab lawv tshem tawm mus ibtxhis; lawv tuag lawv lub ntsejmuag txawv hlo.

²¹Txawm yog nws tej tub tau ntsej tau muag los nws tsis paub, thiab yog lawv poob ntsej poob muag los lawv qhia tsis tau rau nws.

²²Nws tsuas hnov nws ibce mob lwj ntsuav, thiab nws quaj ntsuag rau nws tej kev nyuaj siab.”