Read Hmong Daw Yauj 15 Bible Online

Yauj 15 - Hmong Daw bible

Yauj 15

¹Elifas uas yog neeg Temas teb Yauj hais tias: “Yauj, koj hais lus tso ncua! Koj tso ncua xwb!

³Yeej tsis muaj ib tug neeg ntse hais lus li koj hais lossis hais tej lus tsis muaj lub ntsiab tseemceeb uas txaus luag yuav.

⁴Yog ua li uas koj hais yuav tsis muaj leejtwg hwm Vajtswv thiab tsis muaj leejtwg thov Vajtswv li.

⁵Koj tej kev phem kev qias ua rau koj hais tej lus ko ntag; koj khaws luag tej lus txawj ntse hais xwb.

⁶Tsis tas kuv yuav rau txim rau koj li; tej lus uas koj hais rov ua timkhawv tawmtsam koj.

⁷“Koj yog thawj tus neeg uas yug los rau hauv lub ntiajteb no los? Koj nyob ua ntej Vajtswv tsim tej hauv roob los?

⁸Koj puas tau hnov tej uas Vajtswv npaj yuav ua? Puas yog neeg txojkev txawj ntse yog koj li?

⁹Puas muaj ib yam dabtsi uas koj paub uas peb tsis paub.

¹⁰Peb kawm kev txawj ntse los ntawm tej laus plaubhau dawb paug uas lawv yug ua ntej koj txiv.

¹¹“Vajtswv twb nplig koj siab, ua cas koj tsis yuav? Tej uas peb hais rau koj, twb yog lus mos lus muag ntag.

¹²Ua cas koj yuav ua ywj koj lub siab thiab hais lus npautaws vog rau peb xwb.

¹³Koj chim rau Vajtswv, koj thiaj hais tej lus ko tawmtsam nws.

¹⁴“Yuav ua li cas neeg thiaj ua tau zoo? Yuav ua li cas neeg thiaj ua tau neeg ncaj ncees tabmeeg Vajtswv?

¹⁵Txawm yog Vajtswv cov timtswv los nws yeej tsis ntseeg siab; rau qhov cov timtswv los twb tsis ncaj tabmeeg Vajtswv.

¹⁶Neeg haus kev phem kev qias ib yam li haus dej; qhov tseeb neeg yeej tsis ncaj; neeg yeej tsis muaj nqis li.

¹⁷“Yauj, nimno koj cia li mloog kuv hais tej uas kuv paub.

¹⁸Tej neeg txawj ntse yeej qhia tej lus tseeb rau kuv, lawv kawm tej kev txawj ntse ntawd ntawm lawv txiv, lawv qhia txhua yam rau kuv tsis zais li.

¹⁹Lawv lub tebchaws yeej yog lawv tug; lwm haivneeg yuav tsis tuaj tsuj lawv lub tebchaws.

²⁰“Tus neeg siab phem uas tsimtxom lwm tus nws yuav raug luag tsimtxom mus tas simneej.

²¹Nws lub qhovntsej yuav hnov tej suab quaj suab qw tsis tu, thiab tubsab yuav tuaj huab nws thaum nws xav hais tias nws tau zoo nyob tso siab lug.

²²Nws tsis muaj kev cia siab uas yuav khiav dim ntawm qhov tsaus ntuj, rau qhov muaj ib rab ntaj tos rawv yuav tua nws povtseg,

²³thiab dav npoj tos rawv yuav noj nws lub cev. Nws yeej paub nws lub neej tom hauv ntej tsaus ntuj nti.

²⁴Kev puastsuaj muaj hwjchim ib yam li tug vajntxwv uas tos rawv yuav tawmtsam nws.

²⁵“Tus neeg uas tsa tes tawmtsam Vajtswv thiab twv tus uas muaj hwjchim loj kawg nkaus,

²⁶tus ntawd yog neeg khavtheeb thiab ntxeev siab rau Vajtswv; nws muaj lub siab tawv tsa nws daim thaiv hniav ntaj dhia mus tawmtsam Vajtswv.

²⁸“Tus neeg ntawd mus txeeb tej nroog thiab huab tej tsev uas cov tswv khiav lawm, tiamsis yuav muaj tsov muaj rog tuaj txeeb tej nroog thiab huab tej vajtse ntawd.

²⁹Nws txojkev npluanuj yuav nyob tsis ntev; thiab tej uas nws khwv tau yuav tsis nyob mus ibtxhis. Txawm yog nws tus duab los yuav dua mus,

³⁰thiab nws yuav khiav tsis dim tej kev tsaus ntuj li. Nws yuav zoo ib yam li tsob ntoo uas hluavtaws kub tej ceg tas, thiab cua ntsawj tej paj ya tas lawm.

³¹Yog nws txojkev ruam ua rau nws cia siab rau txojkev ua phem ua qias, ces nws yuav tau kev phem kev qias ua nqi zog.

³²Nws yuav ntsws ua ntej uas tsis tau txog nws lub sijhawm thiab nws yuav qhuav ib yam li tus ceg ntoo uas hlav tsis taus nplooj.

³³Nws zoo ib yam li tsob hmab uas cov txiv zeeg thaum tsis tau siav; thiab zoo ib yam li tsob txiv ntoo roj uas tej paj zeeg tas lawm.

³⁴Cov neeg uas tsis hwm Vajtswv yuav tsis muaj xeebntxwv, thiab hluavtaws yuav kub lawv tej vajtse uas muab tej nyiaj xiab los ua.

³⁵Lawv yog cov neeg uas tsim kev kub ntxhov thiab ua phem; lawv lub siab npaj rawv dag ntxias lwm tus.”