Read Hmong Daw Yauj 18 Bible Online

Yauj 18 - Hmong Daw bible

Yauj 18

¹Npeledas uas yog neeg Sus teb hais tias: “Yauj, koj txawm yuav hais lus tsis paub xaus li los? Yog koj tsum peb thiaj yuav zoo hais rau koj mloog.

³Yog li cas koj xav hais tias peb ruam ib yam li tej nyuj?

⁴Qhov uas koj chim hajyam ua rau koj mob heev xwb. Koj txojkev chim puas yuav ua rau lub ntiajteb no hloov ua suabpuam? Vajtswv puas yuav muab tej hauv roob tshem kom koj zoo siab?

⁵“Tus neeg siab phem lub teeb twb tuag thiab nws lub cubtawg yuav tsis cig lawm.

⁶Lub teeb uas nyob hauv nws lub tsevntaub yuav tsaus mus.

⁷Thaum ub nws tshais ruam khov kho, tiamsis nimno nws ntog lawm; qhov uas nws ntog twb yog vim nws ua ywj nws lub siab.

⁸Nws taug kev mus rau ntawm luag lub vojhlua, thiab lub vojhlua yuav soo nws kotaw,

⁹rab cuamkoob yuav tais nws lujtaws ruaj nrees cia.

¹⁰Luag faus vojhlua rau hauv av thiab cuab hmuv tos nws kev.

¹¹“Muaj kev txhawj ntshai nyob ibncig nws, thiab caum nws mus txhua kauj ruam.

¹²Nws ibtxwm npluanuj, tiamsis nimno nws tshaib nqhis; kev puastsuaj sawv ntawm nws ib sab tos nws.

¹³Muaj mob ua pawg viag thoob plaws nws lub cev, ua rau nws ob txhais npab thiab ob txhais ceg qawj tob zuj zus.

¹⁴Nws raug muab rho ntawm hauv lub tsevntaub uas nws nyob kaj siab lug, thiab muab cab mus cuag tus Vajntxwv uas yog txojkev Tuag.

¹⁵Hluavtaws leejfaj yuav kub txhua yam hauv nws lub tsevntaub kom tas dulug, tsis tshuav ib yam dabtsi nyob hauv li lawm!

¹⁶Nws tej cag yuav qhuav thiab tej nplooj yuav ntsws.

¹⁷Nws lub koob lub npe yuav ploj hauv ntiajteb no mus; thiab yuav tsis muaj leejtwg nco nws li lawm.

¹⁸Luag yuav muab nws tshem tawm ntawm cov uas tseem muaj sia nyob lub tebchaws mus, thiab muab nws ntiab tawm ntawm qhov kaj mus rau hauv qhov uas tsaus ntuj nti.

¹⁹Nws tsis muaj xeebntxwv seem ua neej nyob li lawm.

²⁰Tej neeg uas nyob sab hnubtuaj thiab sab hnubpoob, hnov txog tej kev puastsuaj uas los raug nws, lawv ntshai ua ibce tshee hnyo.

²¹Cov neeg uas ua phem ua qias yuav tau tej no, thiab cov neeg uas tsis quavntsej Vajtswv los yuav tau tej no ib yam nkaus.”