Read Hmong Daw Yauj 19 Bible Online

Yauj 19 - Hmong Daw bible

Yauj 19

¹Yauj teb hais tias, “Ua li cas nej pheej hais lus twm kuv?

³Nej niaj hnub hais lus saib tsis taus kuv, nej pheej cem kuv, nej tsis txajmuag li.

⁴Txawm yog kuv tau ua txhaum tiag los tej kev txhaum ntawd tsuas raug kuv xwb.

⁵Nej xav hais tias nej yog neeg zoo dua kuv, thiab nej suav hais tias qhov uas kuv raug kev txomnyem yog kuv ua txhaum.

⁶Nej tsis paub hais tias Vajtswv yog tus ua tej no los? Vajtswv cuab hlua kom mag kuv.

⁷Kuv cam qhov uas nws quab yuam kuv, tiamsis tsis muaj leejtwg mloog kuv hais; tsis muaj leejtwg hnov kuv lub suab quaj thov kev ncaj ncees.

⁸Vajtswv tav kuv txoj haukev, kuv thiaj mus tsis dhau; nws ua rau kuv txoj haukev tsaus ntuj nti.

⁹Nws sau kuv tej nyiaj tej kub lawm tas thiab txo kuv lub koob lub npe.

¹⁰Nws puav kuv ntaus txhua ces kaum. Nws rho kuv txojkev cia siab ib yam li dob nroj kom kuv qhuav thiab tuag mus.

¹¹Vajtswv chim thiab ua nruj ua tsiv tawmtsam kuv; nws ua rau kuv ib yam li kuv yog nws tus yeebncuab.

¹²Nws tso nws tej tubrog tuaj tawmtsam kuv; lawv khawb qhov thiab tsuam yeej ibncig kuv lub tsevntaub.

¹³“Vajtswv ua rau kuv tej kwvtij tso kuv tseg; cov neeg uas ibtxwm swm kuv tsis paub kuv lawm.

¹⁴Kuv tej kwvtij kwvnpawg khiav tas tso kuv tseg.

¹⁵Tej neeg uas ibtxwm tuaj ua qhua hauv kuv tsev tsis xam muaj kuv lawm; txawm yog kuv tej txhais qhev los saib kuv zoo li tus qhua thiab yog neeg txawv tebchaws lawm xwb.

¹⁶Thaum kuv hu kuv tus tubtxib, nws tsis teb kuv, txawm yog kuv thov nws los nws tsis pab.

¹⁷Kuv tus pojniam hnia tsis tau kuv tus ntxhiab, thiab kuv tej kwvtij tsis muaj ib tug txav los ze kuv.

¹⁸Thaum tej menyuam yaus pom kuv, lawv saib tsis taus kuv thiab luag kuv.

¹⁹Kuv tej phoojywg uas zoo los lawv qias kuv; cov neeg uas ibtxwm hlub kuv tig rov tawmtsam kuv.

²⁰Kuv yuag heev tshuav tawv qhwv txha lawm xwb; kuv twb yuav luag tsis ciaj los ua neej nyob.

²¹Nej yog kuv cov phoojywg, nej cia li hlub kuv! Vim Vajtswv tsa nws txhais tes ntaus kuv ntog lawm.

²²Ua li cas nej thiaj tsimtxom kuv ib yam li Vajtswv ua rau kuv? Nej tseem tsimtxom kuv tsis tau txaus los?

²³“Kuv xav kom muaj ib tug nco kuv tej lus thiab muab sau tseg rau hauv ntawv!

²⁴Lossis muab kuv tej lus txaug rau ntawm tej pobzeb kom nyob mus ibtxhis.

²⁵“Tiamsis kuv paub hais tias muaj ib tug nyob saum ntuj ceebtsheej, thaum kawg nws yuav los pab kuv daws kuv zaj.

²⁶Txawm yog tej kab mob noj kuv cev nqaij daim tawv tas lawm los tiam neej no kuv tseem yuav pom Vajtswv.

²⁷Kuv lub qhovmuag yuav pom ntsoov nws, nws yuav tsis zoo li tus neeg uas kuv tsis paub. “Kuv qaug zog rau qhov nej hais tias,

²⁸‘Peb yuav tsimtxom nws li cas?’ Nej nrhiav tswvyim ntau yam tawmtsam kuv.

²⁹Tiamsis nimno nej cia li ntshai hniav ntaj hniav riam, Vajtswv txojkev chim yog rab ntaj uas yuav los hlais tus neeg uas ua txhaum, kom nej paub hais tias muaj ib tug yuav txiav txim.”