Read Hmong Daw Yauj 20 Bible Online

Yauj 20 - Hmong Daw bible

Yauj 20

¹Xaufas uas yog neeg Namas teb hais tias: “Yauj, koj ua rau kuv npautaws heev, kuv tos tsis taus yuav rawm teb koj.

³Tej uas koj hais ntawd yog lus txob thuam saib tsis taus kuv, tiamsis kuv paub hais tias kuv yuav teb koj li cas.

⁴“Koj yeej paub hais tias tiam thaum ub zoo li cas, txij thaum muaj neeg nyob hauv lub ntiajteb no

⁵yeej tsis muaj ib tug neeg siab phem yuav ua neej nyob ntev li.

⁶Txawm yog nws txojkev khavtheeb yuav siab mus nto ntuj, thiab nws lub taubhau yuav siab mus txog saum cov huab

⁷los nws yuav raug tshuab ya mus ib yam li tej hmoov av. Cov neeg uas ibtxwm paub nws yuav xav tsis thoob hais tias xyov nws mus dua qhov twg lawm.

⁸Nws yuav yaj ntshis mus ib yam li zaj npau suav lossis zaj yogtoog uas ploj mus tsis pom ntxiv li lawm.

⁹Nws yuav ploj ntais ntawm qhov chaw uas nws ibtxwm nyob;

¹⁰nws tej tub yuav xa tej uas nws nyiag ntawm cov neeg pluag los rov qab.

¹¹Nws lub cev tseem hluas, tiamsis tsis ntev yuav mus ua av.

¹²“Kev phem kev qias qab heev, nws thiaj muab ibtxhia npuav rau hauv nws qhovncauj kom nws zoo siab.

¹⁴Tiamsis tej zaub mov hauv nws plab iab heev, iab ib yam li tej tshuaj muaj taug.

¹⁵Tus neeg siab phem yuav ntuav tej kev npluanuj uas nws nyiag luag tug los tawm; Vajtswv yuav muab tej uas nws ntuav tawm los xa rov qab huv tibsi.

¹⁶Tej uas cov neeg siab phem nqos, zoo ib yam li tej tshuaj muaj taug; tej ntawd yuav tom nws tuag ib yam li tus nab muaj taug tom.

¹⁷Nws yuav tsis tau pom tus dej cag uas muaj kua mis thiab zib ntab lossis muaj roj txiv ntoo.

¹⁸Nws yuav tso txhua yam uas nws khwv tau los tseg; nws yuav tsis muaj kev zoo siab rau tej pajlaum uas nws tau,

¹⁹rau qhov nws tsimtxom thiab tsis quavntsej cov neeg txomnyem; thiab txhav luag tej tsev uas ua tau lawm yuav.

²⁰Nws txojkev ua neeg siab hlob tsis paub txaus li.

²¹Thaum nws noj, nws tsis tseg ib yam dabtsi seem li, tiamsis nimno nws txojkev npluanuj twb xaus lawm.

²²Thaum nws muaj txaus lawm, kev piamsij yuav los raug nws.

²³Cia nws noj kom txaus raws li nws lub siab! Vajtswv txojkev chim uas nruj tsiv yuav rau txim rau nws.

²⁴Txawm yog nws khiav dim rab ntaj hlau los xibxub tooj yuav chob nws.

²⁵Xibxub yuav chob nws lub cev tshab plaws; lub hauxub uas ntse yuav ua rau nws ntshav nrog, thiab kev txhawj ntshai yuav los raug nws ua rau nws lub siab tshee hnyo.

²⁶Txhua yam uas nws khaws tseg raug puastsuaj tas; cov nplaim taws uas tsis yog neeg txhais tes hlawv yuav kub nws thiab nws tsevneeg huv tibsi.

²⁷Lub ntuj qhia tus neeg no tej kev txhaum, thiab lub ntiajteb ua timkhawv tawmtsam nws.

²⁸Vajtswv txojkev chim yuav phwj tuaj ua rau tus neeg ntawd txojkev npluanuj puastsuaj tas.

²⁹“Tej no yog tej uas cov neeg siab phem tau, thiab yog tej uas Vajtswv npaj tseg rau lawv.”