Read Hmong Daw Yauj 21 Bible Online

Yauj 21 - Hmong Daw bible

Yauj 21

¹Yauj teb hais tias: “Nej cia li mloog kuv tej lus; yog nej mloog kuv hais thiaj li nplig tau kuv siab.

³Cia sijhawm rau kuv hais kuv tej lus, thaum kuv hais tas lawm, nej xav txob thuam li cas los tau.

⁴“Kuv tsis yog nrog neeg sib cav; yog li ntawd, kuv thiaj ua tsis taus siab ntev.

⁵Nej cia li ntsia kuv. Nej yuav xav tsis thoob thiab tsis paub hais li cas.

⁶Thaum kuv xav txog tej xwmtxheej uas los raug kuv, kuv ibce tuag tas, kuv ntshai thiab tshee kawg li.

⁷“Ua li cas Vajtswv cia cov neeg siab phem muaj sia nyob, pub lawv vammeej thiab ua neej nyob laus nkoos?

⁸Lawv muaj tubki, muaj xeebntxwv, thiab tseem pom lawv tej tubki loj hlob.

⁹Vajtswv tsis tso kev puastsuaj los raug lawv tej vajtse; lawv lub neej tsis tau raug kev txhawj ntshai ib zaug li.

¹⁰Lawv tej nyuj muaj menyuam zoo thiab tsis muaj ib tug tshob li.

¹¹Lawv tej menyuam dhia ua si ib yam li tej menyuam yaj

¹²thiab seevcev nrog tej suab raj suab xyu.

¹³Thaum lawv ua neej nyob, lawv nyob kaj siab lug, thiab thaum lawv tuag, lawv tsis tuag txomnyem ntsuav.

¹⁴“Cov neeg siab phem kom Vajtswv tsis txhob thab lawv; lawv tsis nyiam ua lawv lub neej raws li Vajtswv lub siab nyiam.

¹⁵Lawv xav hais tias txawm yuav pehawm Vajtswv lossis thov Vajtswv los yeej tsis muaj qabhau dabtsi.

¹⁶Lawv khav hais tias qhov uas lawv ua tau yog lawv lub zog, tiamsis kuv tsis yuav tej lus uas lawv hais ntawd.

¹⁷“Tus neeg siab phem lub teeb puas txawj tuag? Cov neeg ntawd puas muaj ib tug tsis raug kev puastsuaj li? Vajtswv puas tau chim thiab rau txim rau cov neeg siab phem,

¹⁸thiab muab lawv tshuab ya ib yam li cua ntsawj tej quavnyab, lossis ib yam li cua daj cua dub ntsawj tej hmoov av ya?

¹⁹“Nej xav hais tias Vajtswv rau txim rau tej menyuam vim leej txiv tej kev txhaum. Tsis yog li ntawd! Vajtswv tsuas rau txim rau cov uas ua txhaum xwb; qhov uas Vajtswv ua li ntawd yog nws qhia hais tias vim lawv tej kev txhaum.

²⁰Cia cov neeg txhaum ris lawv lub txim vim lawv tej kev txhaum; cia lawv haus Vajtswv tus uas muaj hwjchim loj kawg nkaus txojkev chim.

²¹Thaum ib tug neeg twg tuag lawm, nws puas txhawj txog nws tej menyuam saib puas nrog luag ua neej zoo?

²²Neeg puas muaj peevxwm qhia Vajtswv; leejtwg yog tus uas txiav txim rau cov uas nyob siab tshaj plaws?

²³“Muaj ibtxhia neeg noj qab nyob zoo mus txog hnub uas lawv tas simneej; thaum lawv lub cev tseem muaj zog khov kho, lawv tuag kaj siab lug thiab tsis mob txomnyem ntsuav.

²⁵Muaj ibtxhia neeg tsis muaj kev tau zoo hlo li; lawv ua neej lwj siab thiab tuag txomnyem ntsuav.

²⁶Tiamsis txhua tus puavleej tuag, luag yuav muab faus, thiab kas yuav noj lawv txhua tus ib yam nkaus.

²⁷“Kuv paub tej uas nej xav, thiab lub tswvyim uas nej xav ua phem rau kuv.

²⁸Nej nug hais tias, ‘Nimno tus nomtswv loj uas yog neeg ua phem ua qias lub tsev nyob qhov twg lawm?’

²⁹“Nej puas tau nrog cov neeg uas mus tsham tebchaws tham? Nej puas paub tej uas lawv coj rov los piav rau sawvdaws?

³⁰Hnub uas Vajtswv chim thiab rau txim, tsuas yog cov neeg siab phem thiaj seem xwb.

³¹Tsis muaj leejtwg yuav nkaug tus neeg siab phem, lossis ua pauj rau nws tej uas nws tau ua los lawm.

³²Thaum luag kwv nws mus rau tom qhov ntxa, muaj neeg zov nws lub ntxa,

³³muaj neeg qas txhiab qas vam leej tuaj hlub tshua nws; thiab tej av los npog nws lub cev zoo kawg li.

³⁴“Tej lus uas nej tuaj nplig kuv tsis muaj qabhau li! Tej lus uas nej teb kuv yog lus dag xwb!”