Read Hmong Daw Yauj 22 Bible Online

Yauj 22 - Hmong Daw bible

Yauj 22

¹Elifas uas yog neeg Temas teb hais tias: “Neeg muaj nqis dabtsi rau Vajtswv? Txawm yog tej neeg txawj ntse los puas muaj qabhau rau Vajtswv?

³Qhov uas koj ua neeg ncaj puas haum Vajtswv siab, lossis yog koj ua neeg zoo puas pab tau Vajtswv?

⁴Tsis yog vim koj hwm Vajtswv, Vajtswv thiaj nplawm thiab rau txim rau koj los?

⁵Tsis yog li ntawd, twb yog vim koj ua kev txhaum thiab ua kev phem kev qias ntau heev.

⁶Koj yuam kom koj tus kwvtij them tej nqi uas nws tshuav koj rov qab, koj cia li mus sau nws tej tsoos tsho los thiab cia nws nyob liabqab.

⁷Koj tsis pub dej rau cov uas nqhis dej haus, thiab tsis pub mov rau cov uas tshaib plab noj.

⁸Koj siv koj lub hwjchim thiab lub meejmom hom tagnrho lub tebchaws ua koj tug.

⁹Tsis yog koj tsis pab cov pojntsuam xwb, tiamsis koj tseem mus huab tej menyuam ntsuag tug thiab tsimtxom lawv.

¹⁰Yog li ntawd, luag thiaj cuab hlua puagncig koj, thiab tos nco kev txhawj ntshai tuaj voob nkaus koj,

¹¹lossis tsaus ntuj nti ua rau koj tsis pom kev, thiab dej nyab tuaj npog nkaus koj.

¹²“Puas yog Vajtswv nyob siab heev puag saum ntuj ceebtsheej? Txawm yog tej hnubqub nyob siab heev los Vajtswv tseem tuaj saud saib tej hnubqub ntawd.

¹³Yog li cas koj nug hais tias, ‘Vajtswv tsis paub dabtsi? Muaj huab thaiv Vajtswv lawm, nws yuav ua li cas txiav txim tau rau peb?’

¹⁴Koj xav hais tias thaum Vajtswv mus kev saum nruab ntug, nws pom tshab tej tauv huab tuab tuab tuaj rau peb.

¹⁵“Koj txiav txim siab taug txoj qub kev uas tej neeg siab phem ibtxwm taug lawm los?

¹⁶Txawm yog tsis tau txog lawv lub sijhawm los dej twb muab lawv kuav mus tas lawm.

¹⁷Cov neeg ntawd yog cov uas tso Vajtswv tseg, thiab ntseeg hais tias Vajtswv ua tsis tau li cas rau lawv.

¹⁸Tiamsis twb yog Vajtswv ua rau lawv vammeej ntag, kuv tsis totaub cov neeg siab phem tej kev xav li.

¹⁹Cov neeg ua zoo thiab cov neeg ncaj ncees yuav zoo siab luag thaum lawv pom cov neeg siab phem raug txim.

²⁰Tej uas cov neeg siab phem tau yog kev puastsuaj xwb, thiab hluavtaws yuav kub tej uas seem kom tas dulug.

²¹“Yauj, nimno koj cia li nrog Vajtswv sib raug zoo thiab tsis txhob ua rau nws ib yam li nws yog yeebncuab; yog koj ua li kuv hais, nws yuav foom koob hmoov rau koj.

²²Cia li lees yuav nws tej lus qhuab ntuas; koj cia li khaws nws tej lus rau nruab siab.

²³Qhov tseemceeb, koj yuav tsum txo hwjchim tig los cuag Vajtswv thiab tshem tej kev phem kev qias hauv koj lub tsev mus kom deb.

²⁴Cia li muab koj tej kub coj mus povtseg thiab muab koj tej tseem kub coj mus pov rau hauv kwjha qhuav.

²⁵Cia Vajtswv tus uas muaj hwjchim loj kawg nkaus hloov koj tej kub chaw, thiab cia nws yog koj tej nyiaj uas teeb tej pawg.

²⁶Ces koj thiaj cia siab ntsoov rau Vajtswv, thiab koj yuav paub hais tias nws yog koj txojkev zoo siab.

²⁷Thaum koj thov Vajtswv, nws yuav mloog koj tej lus thov, thiab koj yuav ua tau tiav raws li koj tej lus cog tseg.

²⁸Txhua yam uas koj ua thiaj yuav tiav thiab koj txoj haukev yuav tshav ntuj nrig.

²⁹Vajtswv yuav txo tus uas khavtheeb thiab pab tus uas txo hwjchim.

³⁰Yog koj yeej yog neeg ncaj ncees thiab ua koj tes haujlwm ncaj nws yuav cawm koj.”