Read Hmong Daw Yauj 23 Bible Online

Yauj 23 - Hmong Daw bible

Yauj 23

¹Yauj teb hais tias: “Kuv tseem yuav cam thiab yws Vajtswv; kuv nyiaj tsis taus lawm, kuv thiaj quaj thiab ntsaj ua luaj.

³Kuv xav paub saib nws nyob qhov twg, kom kuv thiaj paub mus txog ntawm nws qhov chaw nyob.

⁴Kuv yuav piav kuv zaj tabmeeg nws thiab hais txhua yam daws kuv zaj.

⁵Kuv xav paub saib nws yuav hais li cas, thiab nws yuav teb kuv tej lus li cas.

⁶Vajtswv yuav siv tagnrho nws lub zog tawmtsam kuv los? Tsis yog li ntawd, nws yeej yuav mloog kuv tej lus.

⁷Kuv yog neeg ncaj; kuv yeej muaj cuabkav hais kuv zaj tabmeeg Vajtswv; tus uas txiav txim rau kuv nws yuav tso kuv dim mus ibtxhis.

⁸“Kuv mus nrhiav sab hnubtuaj, tiamsis Vajtswv tsis nyob ntawd; kuv mus nrhiav rau sab hnubpoob, tiamsis tsis pom nws.

⁹Vajtswv yeej ua haujlwm rau sab qaumteb thiab sab qabteb, tiamsis kuv nrhiav tsis pom nws li.

¹⁰Vajtswv yeej paub txhua kauj ruam uas kuv mus; yog nws sim kuv, nws yuav pom hais tias kuv tsis muaj txhaum.

¹¹Kuv taug ncaj nraim txojkev uas nws xaiv rau kuv, kuv tsis ncaim mus sab twg li.

¹²Kuv ibtxwm ua raws li Vajtswv tej lus samhwm; kuv ua raws li nws siab nyiam, kuv tsis ua raws li kuv lub siab xav.

¹³Vajtswv yeej tsis hloov siab li. Tsis muaj leejtwg yuav tawmtsam tau nws, lossis txwv tau nws kom tsis txhob ua tej uas nws yuav ua.

¹⁴Tej uas nws npaj rau kuv lawm, nws yuav ua kom tiav; qhov no tsuas yog ib yam ntawm tej uas nws npaj xwb.

¹⁵Kuv ntshai ua ibce tshee hnyo tabmeeg nws.

¹⁶Vajtswv tus uas muaj hwjchim loj kawg nkaus ua rau kuv lub zog ntaug tas. Txawm yog qhov tsaus ntuj ua rau kuv tsis pom kev los tsis yog qhov tsaus ntuj ua rau kuv ntshai, tiamsis yog Vajtswv ua.