Read Hmong Daw Yauj 24 Bible Online

Yauj 24 - Hmong Daw bible

Yauj 24

¹“Vim li cas Vajtswv tsis teem ib lub sijhawm tseg txiav txim, thiab ua li cas cov uas ua nws tes haujlwm tsis pom hnub uas txiav txim ncaj ncees li?

²Tej neeg uas nam luag ciamteb kom tau av dav; lawv mus nyiag luag tej yaj los ua lawv tug.

³Lawv mus txhav cov menyuam ntsuag tej neesluav, thiab cab cov pojntsuam tej nyuj los yuam nqi mus txog thaum uas lawv them nqi tas.

⁴Lawv yuam cov neeg txomnyem txoj cai thiab ntiab cov neeg pluag khiav tawm mus.

⁵“Yog li ntawd, cov neeg txomnyem thiaj mus nrhiav noj tom tiaj suabpuam ib yam li tej neesluav qus; tsis muaj ib thaj chaw twg uas lawv yuav mus nrhiav zaub mov los rau lawv tej menyuam noj li.

⁶Lawv yuav tau mus sau qoobloo tom tej teb uas tsis yog lawv li, thiab yuav tau mus de txiv hmab hauv cov neeg siab phem tej vaj.

⁷Hmo ntuj lawv pw liabqab tsis muaj ris tsho hnav, thiab tsis muaj ib yam dabtsi rau lawv vov tiv no li.

⁸Tej kob tuamtsam nag uas los lawv roob ua rau lawv ntub tas, thiab lawv mus nraim ntawm tej qab pobzeb xwb.

⁹“Cov neeg siab phem yuam tej menyuam uas tsis muaj niam tsis muaj txiv ua lawv qhev, thiab lawv mus coj cov neeg pluag tej menyuam los yuam tej nqi uas cov neeg pluag them tsis taus.

¹⁰Tiamsis cov neeg pluag yuav tau tawm liabqab mus tiv thaiv lawv tej menyuam; thiab lawv yuav tau yoo tshaib mus sau qoob.

¹¹Lawv yuav tau yoo nqhis mus tsuam txiv ntoo roj los ua roj thiab mus tsuam txiv hmab los ua cawv.

¹²Tej neeg uas raug mob thiab yuav tuag quaj ntsoog qees hauv tej nroog, tiamsis Vajtswv tsis quavntsej lawv tej lus thov li.

¹³“Muaj ib cov neeg tsis kam txais yuav txojkev kaj; lawv tsis totaub thiab tsis paub mus raws li txojkev kaj coj lawv.

¹⁴Thaum sawv ntxov cov neeg tua neeg sawv mus tua cov neeg pluag thiab txomnyem, thiab thaum tsaus ntuj lawv mus ua tubsab.

¹⁵Tus neeg uas ua kev nkauj kev nraug tos tsis taus tsaus ntuj; nws muab ntaub npog nws lub ntsejmuag kom tsis muaj leejtwg paub nws.

¹⁶Hmo ntuj tubsab tsoo los hauv tsev, tiamsis nruab hnub tubsab khiav nkaum kom luag tsis pom.

¹⁷Nruab hnub lawv ntshai qhov kaj, tiamsis hmo ntuj lawv tsis ntshai dabtsi li.”

¹⁸“Tus neeg siab phem yuav raug dej kuav mus, thiab nws tej liaj tej teb yuav raug Vajtswv foom tsis zoo; nws yuav tsis tau mus tu nws tej vaj txiv hmab lawm.

¹⁹Tshav ntuj ziab tej daus yaj thiab qhuav li cas, ces tubtuag teb yuav coj tus neeg txhaum mus li ntawd ntag.

²⁰Txawm yog nws niam los twb tsis nco txog nws li lawm; kas yuav noj nws lub cev thiab nws cev nqaij yuav puastsuaj ib yam li tus cav ntoo lwj.

²¹Tej ntawd los raug nws rau qhov nws tsis ua zoo rau tej pojntsuam thiab tsis ua siab dawb siab zoo rau cov pojniam uas tsis muaj menyuam.

²²Vajtswv lub hwjchim yuav rhuav tshem tus neeg uas muaj zog; tus neeg siab phem ua neej nyob tsis muaj kev cia siab.

²³Vajtswv cia nws nyob tso siab lug, tiamsis Vajtswv saib ntsoov nws txhua lub sijhawm.

²⁴Cov neeg siab phem tsuas vammeej ib ntu xwb, tiamsis tom qab ntawd nws yuav ntsws thiab qhuav ib yam li tej nroj tsuag, nws zoo li tej kav nplej uas luag muab txiav lawm.

²⁵Puas muaj leejtwg ua timkhawv hais tias tsis muaj li ntawd? Puas muaj leejtwg ua timkhawv hais tias kuv tej lus tsis tseeb?”