Read Hmong Daw Yauj 26 Bible Online

Yauj 26 - Hmong Daw bible

Yauj 26

¹Yauj teb hais tias: “Ua li cas koj yuav sib zog pab kuv uas yog tus neeg txomnyem ua luaj! Ua li cas koj pab tus neeg uas tsis muaj zog!

³Koj pab tuav tswvyim zoo kawg, thiab qhia koj tej kev txawj ntse rau tus neeg ruam li kuv no!

⁴Koj xav hais tias leejtwg thiaj yuav mloog koj tej lus? Leejtwg tshoov koj siab kom hais tej lus no?”

⁵“Cov neeg tuag tej ntsujplig tshee laim dais hauv cov dej uas nyob hauv nruab tivtxwv.

⁶Tubtuag teb qhib lug tabmeeg Vajtswv; tsis muaj dabtsi thaiv tau tsis pub Vajtswv pom li.

⁷Vajtswv nthuav lub ntuj mus rau sab qaumteb thiab muab lub ntiajteb tso rau ntawm qhov chaw uas tsis muaj dabtsi.

⁸Vajtswv ua kom muaj dej nyob hauv cov huab, thiab tsis pub kom cov dej ntawd xau hauv cov huab los.

⁹Vajtswv cia tej tauv huab los roos thaum lub hli nra.

¹⁰Nws kom ciam rau saum nplaim hiavtxwv, ua ciam cais qhov kaj tawm ntawm qhov tsaus.

¹¹Thaum Vajtswv diaj tej ncej uas txheem lub ntuj, lub ntuj ua zog kais txaus ntshai kawg.

¹²Vajtswv lub hwjchim tswj hiavtxwv nyob tus yees; thiab nws txojkev txawj ntse rhuav tau Lahaj uas yog tus zaj.

¹³Vajtswv ua pa lub ntuj thiaj kaj nrig, thiab nws txhais tes tua tau tus zaj uas khiav dim lawm.

¹⁴Tiamsis tej ntawd tsuas yog Vajtswv lub hwjchim thiab yog tej uas peb hnov zoo li lub suab ntxhi xwb. Puas muaj leejtwg paub hais tias Vajtswv muaj hwjchim npaum li cas?”