Read Hmong Daw Yauj 27 Bible Online

Yauj 27 - Hmong Daw bible

Yauj 27

¹Yauj hais ntxiv tias: “Kuv twv ntxhias ntawm Vajtswv tus muaj hwjchim loj thiab muaj sia nyob uas tsis pom kuv txojkev ncaj ncees thiab ua rau kuv lub neej txomnyem ntsuav hais tias,

³yog thaum twg Vajtswv tseem pub kuv muaj txojsia nyob,

⁴kuv lub qhovncauj yuav tsis hais ib lo lus phem thiab kuv tus nplaig yuav tsis hais ib lo lus dag li.

⁵Kuv yuav tsis lees hais tias nej hais yog; kuv yuav cam hais tias kuv tsis muaj txhaum mus txog hnub kuv tuag.

⁶Kuv yuav tuav rawv txojkev ncaj ncees tsis tso tseg li; kuv lub siab yeej paub meej li ntawd.

⁷“Thov kom txhua tus uas tsis tuaj kuv tog thiab tawmtsam kuv raug txiav txim ib yam li tus neeg siab phem thiab siab tsis ncaj.

⁸Cov neeg uas tsis hwm Vajtswv puas muaj kev cia siab thaum Vajtswv txiav txim rau lawv?

⁹Thaum lawv muaj kev nyuaj siab Vajtswv puas yuav hnov lawv tej lus thov?

¹⁰Tsimnyog lawv txaus siab rau Vajtswv thiab thov Vajtswv txhua lub sijhawm.

¹¹“Cia kuv qhia Vajtswv lub hwjchim thiab piav Vajtswv tus muaj hwjchim loj kawg nkaus tes haujlwm rau nej paub.

¹²Tiamsis tsis tas kuv yuav qhia nej, rau qhov nej twb pom lawm; yog li cas nej pheej hais tej lus uas tsis muaj qabhau?”

¹³“Tej no yog Vajtswv tus uas muaj hwjchim loj kawg nkaus, rau txim rau cov neeg siab phem thiab ua nruj ua tsiv.

¹⁴Txawm yog lawv tej tubki coob los yuav raug hniav ntaj hniav riam tuag tas rau hauv tshavrog; lawv tej menyuam yuav tsis muaj noj tsis muaj haus txaus.

¹⁵Cov uas seem yuav raug kab mob kev nkeeg tuag tas, thiab lawv cov pojntsuam yuav tsis quaj nyiav lawv tej neeg tuag.

¹⁶Cov neeg siab phem muaj nyiaj ntau suav tsis txheeb, thiab muaj tsoo tsho ntau hnav tsis tas;

¹⁷tiamsis qee leej neeg siab zoo yuav tau tej tsoo tsho ntawd hnav, thiab qee leej neeg ncaj ncees yuav tau tej nyiaj ntawd siv.

¹⁸Cov neeg siab phem ua tsev zoo li kab laugsab tej zes, lossis zoo ib yam li tus tubqhe lub tsev uas nws nyob zov teb.

¹⁹Thaum lawv pw, lawv tej nyiaj txiag nyob txhij, tiamsis thaum lawv sawv los, lawv tej nyiaj txiag ploj tas lawm.

²⁰Kev txhawj kev ntshai yuav los raug lawv ib yam li dej nyab; hmo ntuj cua daj cua dub yuav ntsawj lawv mus tas;

²¹cov cua sab hnubtuaj yuav ntsawj lawv tawm hauv lawv tej tsev mus;

²²thaum lawv nrhiav kev khiav kom dim, tej cua ntawd yuav ntsawj lawv, tsis hlub lawv li,

²³Thaum lawv khiav cua ntsawj nrov nroo ntws, lub hwjchim uas yog kev puastsuaj ua rau lawv ntshai heev.”