Read Hmong Daw Yauj 28 Bible Online

Yauj 28 - Hmong Daw bible

Yauj 28

¹Muaj ntau thaj chaw uas luag khawb nyiaj; thiab muaj ntau lub chaw uas luag nchuav kub.

²Neeg khawb tau hlau hauv av los, thiab muab pobzeb hlawv kom nchuav tau tooj liab.

³Neeg mus nrhiav nyiaj thiab kub hauv qhov tob tob uas tsaus ntuj nti. Lawv nrhiav hauv lub ntiajteb no qhov uas tob kawg nkaus, thiab lawv mus khawb tej pobzeb uas nyob hauv qhov uas tsaus ntuj nti.

⁴Neeg mus nrhiav khawb nyiaj khawb kub deb ntawm tej chaw uas neeg nyob, lossis qhov chaw uas neeg tsis tau mus txog dua li. lawv ua haujlwm kho siab khuav, dauv hlua nqis mus los hauv tej qhov av.

⁵Qoobloo tuaj hauv av tuaj, Tiamsis muaj hluavtaws kub nyob hauv nruab tivtxwv av.

⁶Tej pobzeb uas nyob hauv av puavleej muaj tej hlaws xafiles, thiab muaj kub nyob hauv tej hmoov av.

⁷Tsis muaj ib tug dav twg pom txojkev uas mus rau ntawm tej chaw khawb nyiaj, thiab tej dav npoj los tsis tau ya los hla tej chaw ntawd li.

⁸Tsis muaj tsov ntxhuav lossis tsiaj nyaum taug tej kev uas ntsiag to ntawd li.

⁹Neeg khawb tej pobzeb uas tawv tshaj plaws, lawv khawb tas tej roob saum ncov los ti hauv taw.

¹⁰Thaum lawv tho tej roob tsuas tshab lawm, lawv nrhiav tau tej pobzeb uas muaj nqis.

¹¹Lawv khawb mus tshwm rau hauv cov dej, lawv muab tej yam uas nyob nraim nkoos rho tawm los rau ntawm qhov pom kev.

¹²Tiamsis yuav nrhiav tswvyim qhov twg thiab tau? Thiab yuav kawm kev totaub qhov twg?

¹³Lub tswvyim tsis nyob ntawm tej neeg; Thiab tsis muaj leejtwg paub lub tswvyim tus nqi.

¹⁴Qhov uas tob tshaj plaws thiab hiavtxwv hais tias lub tswvyim tsis nyob hauv no.

¹⁵Txawm yog muab nyiaj muab kub yuav los yeej tsis tau lub tswvyim ntawd.

¹⁶Tej tseem kub thiab tej saw nyiaj saw kub ntaus tsis tau lub tswvyim tus nqi.

¹⁷Lub tswvyim muaj nqis tshaj kub, tej khob kub lossis khob iav pauv tsis tau lub tswvyim.

¹⁸Lub tswvyim muaj nqis dua tej qe zeb kaulas, qe zeb iav thiab hlaws.

¹⁹Tej tseem kub thiab tseem qe zeb khixaulais los yeej ntaus tsis tau lub tswvyim tus nqis li.

²⁰Lub tswvyim los qhov twg los? Thiab kev totaub nyob qhov twg?

²¹Txhua yam uas muaj sia yeej tsis pom lub tswvyim li, txawm yog tej noog uas ya saum nruab ntug los yeej tsis pom.

²²Txawm yog kev puastsuaj thiab kev tuag los tsuas hnov luag cav txog lub tswvyim xwb.

²³Vajtswv tib leeg thiaj paub txojkev uas mus nrhiav lub tswvyim, thiab paub hais tias lub tswvyim nyob qhov twg.

²⁴Rau qhov Vajtswv pom ti nkaus qab ntuj kawg thiab pom txhua yam uas nyob saum nruab ntug.

²⁵Thaum Vajtswv pub rau tej cua muaj hwjchim thiab cais kom hiavtxwv nyob muaj ciam;

²⁶Thaum Vajtswv txiav txim siab tso nag los, ua huab tsaus thiab xob laim rau qhov twg;

²⁷Vajtswv pom lub tswvyim, nws saib lub tswvyim yog qhov zoo, thiab nws qhuas hais tias zoo kawg nkaus.

²⁸Vajtswv hais rau neeg tias, “Yog nej xav txawj ntse, nej yuav tsum hwm tus TSWV. Yog nej xav totaub, nej yuav tsum tso kev phem kev qias tseg.”