Read Hmong Daw Yauj 29 Bible Online

Yauj 29 - Hmong Daw bible

Yauj 29

¹Yauj rov hais ntxiv dua hais tias: “Kheev lam kuv lub neej rov zoo li yav thaum ub uas Vajtswv tseem saib xyuas kuv.

³Vajtswv ibtxwm nrog kuv thiab nws ua qhov kaj rau kuv thaum kuv taug txojkev tsaus ntuj.

⁴Tej ntawd yog hais txog thaum kuv lub neej tseem vammeej uas kuv nrog Vajtswv sib raug zoo thiab Vajtswv tseem tsomkwm kuv lub tsev.

⁵Thaum ntawd Vajtswv tus uas muaj hwjchim loj kawg nkaus, tseem nrog nraim kuv thiab kuv tej menyuam tseem nyob puagncig kuv.

⁶Kuv tej nyuj tej tshis muaj kua mis ntau heev, thiab kuv tej ntoo roj los loj hlob mos nyoos ntawm tej av uas muaj pobzeb.

⁷Txhua zaus uas cov txwjlaug hauv lub nroog sablaj, kuv kuj mus koom nrog lawv,

⁸thaum tej tub hluas pom kuv, lawv zam kev rau ob sab, thiab tej neeg laus sawv ntsug hwm kuv.

⁹Cov thawjcoj nyob ntsiag to tsis sib tham;

¹⁰txawm yog tej nomtswv los tsis hais lus li.

¹¹“Txhua tus uas pom kuv lossis hnov kuv hais lus, lawv puavleej qhuas tej uas kuv tau ua tas los lawm.

¹²Thaum tej neeg txomnyem quaj thov, kuv kuj pab lawv; kuv pab tej menyuam ntsuag uas tsis pom qab vamkhom leejtwg.

¹³Tej neeg txomnyem los qhuas kuv, thiab kuv pab cov pojntsuam kom nyob tso siab lug.

¹⁴Kuv yeej ua ncaj thiab ua siab dawb siab zoo.

¹⁵Yav tas los kuv ua qhovmuag rau cov digmuag thiab ua kotaw rau cov sav ceg.

¹⁶Kuv zoo ib yam li leej txiv rau cov neeg pluag thiab tuaj lwm haivneeg tog thaum lawv raug kev txomnyem.

¹⁷Kuv rhuav cov neeg nruj tsiv lub hwjchim thiab cawm cov neeg uas raug luag tsimtxom.

¹⁸“Kuv xav ua neej kom muaj txojsia nyob ntev thiab tuag kaj siab lug hauv kuv lub tsev.

¹⁹Yav tas los kuv zoo li tsob ntoo uas muaj dej yug nws tej cag thiab muaj lwg ntsu saum nws tej ceg.

²⁰Txhua tus puavleej qhuas kuv, thiab kuv lub zog yeej tsis ntaug li.

²¹Thaum kuv ntuas sawvdaws, txhua tus nyob ntsiag to thiab ua tib zoo mloog kuv tej lus;

²²thaum kuv hais tas, tsis muaj leejtwg hais ntxiv li lawm. Kuv tej lus nkag rau hauv lawv lub siab ib yam li tej lwg dej;

²³txhua tus txaus siab yuav kuv tej lus ib yam li tej tub qoob tub loo txaus siab rau tej nag tshiab.

²⁴Thaum lawv muaj kev nyuaj siab, kuv ua ntsejmuag luag ntxhi rau lawv, kuv lub ntsejmuag uas luag ntxhi txhawb lawv zog kawg li.

²⁵Kuv ua tus txiav txim thiab leg tagnrho lub luag haujlwm; kuv coj lawv ib yam li tus vajntxwv coj nws pab tubrog; thiab nplig lawv thaum lawv tas kev cia siab.