Read Hmong Daw Yauj 3 Bible Online

Yauj 3 - Hmong Daw bible

Yauj 3

¹Thaum kawg Yauj tsa suab foom hnub uas yug nws.

²Yauj hais tias, “Vajtswv, thov koj foom tsis zoo rau hnub uas yug kuv; thov koj cem hmo uas kuv xeeb rau hauv kuv niam plab!

⁴Vajtswv, thov koj cia hnub ntawd tsaus ntuj nti. Thov tsis txhob nco txog hnub ntawd thiab tsis txhob pub muaj duab ci rau hnub ntawd.

⁵Thov kom hnub ntawd tsaus ntuj ntom nti; Thov tso huab laum hnub ntawd ua kom lub hnub tsaus dub nciab.

⁶Thov muab hmo ntawd tshem tawm ntawm lub xyoo mus; tsis txhob suav hmo ntawd li lawm;

⁷thov kom hmo ntawd tsis txhob xeeb taus menyuam thiab tsis txhob muaj kev zoo siab.

⁸Hais kom tej txivneeb txivyaig thiab tej neeg uas txawj ua rau Levi-athas tawm tuaj foom tsis zoo rau hnub ntawd.

⁹Thov kom lub hnubqub uas ci thaum sawv ntxov qauj mus; thov kom hmo ntawd tsis txhob kaj ntug;

¹⁰thov foom tsis zoo rau hmo uas kuv yug los, rau qhov hmo ntawm cia kuv niam xeeb kuv, kuv thiaj raug kev txomnyem.

¹¹“Kheev lam kuv tuag thaum kuv tseem nyob hauv kuv niam plab lossis tuag thaum yug poob nthav los.

¹²Ua li cas kuv niam tseem tau puag kuv rau ntawm nws lub xubntiag? Ua cas nws tseem tau pub mis rau kuv noj?

¹³Yog kuv ntxov tuag, ces nimno kuv twb tau so thiab

¹⁴tau mus pw tsaug zog ib yam li tej vajntxwv thiab tej nomtswv uas txhim kho tej loog uas nyob tiam thaum ub.

¹⁵Ces kuv twb tau pw tsaug zog ib yam li tej nomtswv uas muaj nyiaj muaj kub puv nkaus lawv tej tsev,

¹⁶lossis tau pw tsaug zog ib yam li tus menyuam uas tuag thaum tseem nyob nruab thiab.

¹⁷Thaum nyob hauv qhov ntxa tej neeg siab phem yuav tsis ua kev phem kev qias lawm, thiab tej neeg uas tsaug leeg vim ua haujlwm sab yuav tau so.

¹⁸Tej neeg raug txim yuav tau zoo nyob tsis ntxhov siab, lawv tsis hnov tus uas saib lawv lub suab nthe lawm.

¹⁹Tej neeg uas muaj koob meej thiab tej uas tsis muaj koob meej puavleej nyob qhov ntawd, thiab tej tubtxib yuav dim plaws txojkev ua luag qhev.

²⁰“Ua li cas cia tus neeg txomnyem ua neej nyob lwj siab ntsuav? Ua li cas cia tus neeg quaj ntsuag pom qhov kaj?

²¹Lawv tos ntsoov txojkev tuag, tiamsis kev tuag tsis los li; lawv ntshaw lub qhov ntxa heev dua ntshaw nyiaj thiab kub.

²²Lawv tsis muaj kev zoo siab mus txog hnub uas lawv tuag thiab coj lawv mus faus;

²³Vajtswv thaiv lawv txoj hauv kev, thiab xov puagncig tsis pub lawv tawm.

²⁴Kuv tej kua muag yog zaub mov rau kuv noj, thiab kuv lub suab ntsaj tsis tu li.

²⁵Tej uas kuv txhawj thiab ntshai txawm los raug kuv.

²⁶Kuv tsis muaj kev kaj siab, tsis tau so, thiab niaj hnub raug kev txomnyem tsis paub tas li.”