Read Hmong Daw Yauj 30 Bible Online

Yauj 30 - Hmong Daw bible

Yauj 30

¹“Tiamsis nimno cov neeg uas hluas dua kuv muab kuv tso daj tso luag! Thaum lawv txiv yeej ibtxwm tsis muaj nqis rau kuv, kuv twb tsis pub lawv pab kuv cov dev zov yaj.

²Lawv tsis muaj nqis, rau qhov lawv lub zog ntaug tas ua tsis tau haujlwm rau kuv.

³Lawv pluag thiab tshaib nqhis heev, hmo ntuj lawv thiaj mus khaws tej cag ntoo qhuav tim tej nras mojsab qhua.

⁴Lawv mus de tej nroj tom tiaj suabpuam, thiab dawj tej cag ntoo uas tsis qab los noj!

⁵Tej neeg qw ua tsuj ua tsaug raws lawv tawm ib yam li luag qw tubsab.

⁶Lawv mus nyob hauv tej qhov tsua thiab qhov av uas luag khawb rau ntawm tej kis zeb.

⁷Lawv quaj ib yam li tej tsiaj qus quaj tim tej havzoov tuaj, thiab mus khooj rau hauv tej koog ntoo.

⁸Lawv yog ib pab neeg uas tsis muaj koob tsis muaj npe thiab tsis muaj nqis dabtsi! Lawv raug luag ntiab tawm hauv lub tebchaws mus.

⁹“Tiamsis nimno lawv tuaj luag kuv plig; thiab muab kuv tso daj tso luag.

¹⁰Lawv ua phem ua qias rau kuv; lawv xav hais tias lawv zoo dua kuv, kuv tsis phim lawv, thiab lawv tseem tuaj nti qaubncaug rau kuv ntsejmuag.

¹¹Rau qhov Vajtswv ua rau kuv qaug zog thiab tas kev cia siab, lawv thiaj ua nruj ua tsiv tawmtsam kuv.

¹²Cov neeg siab phem too hau lis tuaj tawmtsam kuv, lawv raws kuv tawm thiab npaj rawv tua kuv povtseg.

¹³Lawv xav ua kom kuv puastsuaj, lawv thiaj tav kuv txoj haukev tsis pub kom kuv khiav dim; thiab tsis muaj leejtwg cheem tau lawv li.

¹⁴Lawv sau nthwv nkag qhov lajkab tuaj tawmtsam kuv, thiab lawv ntog tsheej pawg tsuam kuv;

¹⁵Tej kev txhawj ntshai npog kuv tas, kuv lub koob meej ploj mus ib yam li nthwv cua, thiab kuv txojkev vammeej ploj tas ib yam li tauv huab.

¹⁶“Nimno kuv twb yuav tuag; tsis muaj ib yam dabtsi pab tau kom kuv dim kev txomnyem li.

¹⁷Thaum tsaus ntuj kuv tej pobtxha mob lwj ntsuav; tus mob noj rawv kuv tsis tso tseg li.

¹⁸Vajtswv tsawv nkaus kuv cajdab tshos thiab muab ntswj kiag ua ib caj.

¹⁹Nws muab kuv pov rau hauv pas av; kuv twb zoo tsis cuag tej plua tshauv.

²⁰“Vajtswv, kuv hu koj tiamsis koj tsis teb kuv li; thiab thaum kuv thov koj, koj yeej tsis quavntsej kuv.

²¹Koj ua nruj ua tsiv rau kuv; koj siv koj lub hwjchim tsimtxom kuv.

²²Koj tso cua los muab kuv ntsawj ya mus tas; koj muab kuv pov rau hauv nthwv cua daj cua dub uas ntswj pesyos.

²³Kuv paub hais tias koj muab kuv pov rau hauv txojkev tuag, thiab rau hauv lub tsev uas koj npaj rau txhua tus uas muaj sia mus nyob.

²⁴“Vim li cas koj tawmtsam tus neeg uas puastsuaj, yog tus neeg uas ua tsis tau dabtsi, tiamsis thov kom koj hlub xwb?

²⁵Puas yog kuv twb nrog tej neeg nyuaj siab quaj, thiab nrog cov neeg txomnyem nyuaj siab?

²⁶Kuv xav tau lub neej zoo thiab kaj siab lug; tiamsis kuv ua neej nyuaj siab thiab tsaus ntuj nti xwb.

²⁷Kev nyuaj siab thiab ntxhov siab ua rau kuv lwj siab ntsuav; kuv ua neej txomnyem ntsuav ib hnub dhau ib hnub.

²⁸Kuv ua neej tsaus ntuj nti tsis muaj hnub tshav ntuj li, kuv mus sawv ntawm tej chaw sablaj thov luag pab kuv.

²⁹Kuv tu siab thiab quaj ib yam li tej hma thiab tej noog ntxhuav quaj.

³⁰Kuv daim tawv dub, thiab kuv ua npaws kub heev.

³¹Qhov chaw uas kuv ibtxwm hnov tej suab nkauj nogncas lomzem xyivfab, nimno kuv tsuas hnov suab quaj thiab suab nyiav lawm xwb.